ۇستەل تەننيسىنەن قازاقستاننىڭ ەرلەر قۇراماسى استانادا ءوتىپ جاتقان ازيا چەمپيوناتىن ءساتتى باستاعانىمەن, شيرەك فينالدىق مەجەدە وڭباي ءسۇرىندى.
توپتىق تۋرنيردە جەرلەستەرىمىز الدىمەن سولتۇستىك كورەيانى قاپى قالدىردى. بۇل كوماندانىڭ ساپىندا ارالاس جۇپتار اراسىنداعى پاريج وليمپياداسىنىڭ كۇمىس جۇلدەگەرى ري چون سيك وينادى. سول سپورتشىعا الان قۇرمانعاليەۆ (2:3) ەسە جىبەردى. ايدوس جۇماعۇلوۆ (1:3) كيم سون يلگە جول بەردى. ەسەسىنە ودان كەيىن ءبىزدىڭ جىگىتتەر ويىن تىزگىنىن قولعا الدى. الان (3:2) حەم يۋ سونعا سان سوقتىرسا, كيريلل حەم يۋ سون (3:2) مەن ري چون سيكتى (3:0) ءسۇرىندىردى. ەسەپ – 3:2. كەلەسى كەزدەسۋدە پاكىستاننىڭ تاس-تالقانىن شىعاردىق – 3:0. ساۋد ارابياسىنا قارسى وتكەن ويىن دا ءدال سونداي ەسەپپەن اياقتالدى – 3:0. بۇل باسەكەدە گەراسيمەنكو, قۇرمانعاليەۆ, كەنجەعۇلوۆ ءوز قارسىلاستارىنان باسىم ءتۇستى.
شيرەك فينالدا ءۇندىستان قۇراماسىمەن جولىمىز قيىستى. بۇل كەزدەسۋدە قوناقتار 3:1 ەسەبىمەن جەڭىسكە جەتتى. وتانداستارىمىزدىڭ اراسىنان تەك الان قۇرمانعاليەۆ قانا ءوزىنىڭ مىقتىلىعىن مويىنداتتى. ال كيريلل گەراسيمەنكو ەكى, ايدوس جۇماعۇلوۆ ءبىر رەتتەن ۇتىلدى. ءسويتىپ, جىگىتتەر جۇلدەلى ورىنعا تالاسۋ مۇمكىندىگىنەن ايىرىلدى. ال قىزدار توپتىق تۋرنيردە موڭعولداردى ۇتقانىمەن, سولتۇستىككورەيالىقتارعا جول بەردى.