الماتى قالاسىندا افريكا ەلدەرىنەن كەلگەن التى جانە كورشىلەس مەملەكەتتەردەن كەلگەن ءبىر ازامات انىقتالعان, دەپ حابارلايدى Egemen.kz.
شەت مەملەكەتتەن كەلگەن ازاماتتاردىڭ قۇجاتتارى بولماعان, سونداي-اق ولار جەكە قۇرىلىس الاڭىندا, مەيرامحانادا جانە كولىك جۋ ورنىندا زاڭسىز جۇمىس ىستەگەن.
«شەتەلدىكتەردىڭ جەكە باسىن كۋالاندىراتىن قۇجاتتارى بولماعان. ولار قازاقستان رەسپۋبليكاسىنىڭ كوشى-قون زاڭناماسىن بۇزعانى ءۇشىن اكىمشىلىك جاۋاپكەرشىلىككە تارتىلىپ, ەلدەن شىعارىلادى», دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
سونىمەن قاتار كوشى-قون قىزمەتى باسقارماسىنىڭ باستىعى وسى كۇندەرى الماتىدا جەدەل جاعدايدى جاقسارتۋعا, قوعامدىق ءتارتىپتى, جول قاۋىپسىزدىگىن قامتاماسىز ەتۋگە, زاڭسىز كوشى-قوننىڭ جانە باسقا دا زاڭسىز ارەكەتتەردىڭ جولىن كەسۋگە باعىتتالعان «ۋچاستوك» جەدەل-الدىن الۋ ءىس-شاراسى وتكىزىلىپ جاتقانىن ەسكە سالدى.