اقكول اۋدانىنداعى نوۆورىبينكا سەلولىق وكرۋگىندەگى «اگروفيرما حالىق جەرى» سەرىكتەستىگى بيزون اكەلىپ باعىپ جاتىر دەگەن حاباردى ەستىگەندە تاڭ قالعانىمىز راس. سويتسەك, بيزون باعۋمەن بىرگە بىرقىدىرۋ يگىلىكتى ءىس قولعا الىنىپتى.
ءيا, سونىمەن بيزون باققاندى دا كوردىك. شىن ەكەن. سەرىكتەستىك جالعىز بيزون ەمەس, تابىن-تابىن جىلقى ءوسىرىپ, تابىسقا كەنەلىپ وتىر. اۋداندىق اۋىل شارۋاشىلىعى ءبولىمى قىزمەتكەرلەرىنىڭ ايتۋلارىنا قاراعاندا, جوسىعى بولەك جاڭا جوبانىڭ جالپى قۇنى – 340 ملن تەڭگە. توسىن ءىس قولعا الىنىپ, جاڭادان 10 جۇمىس ورنى اشىلىپتى. ءتورت ت ۇلىكتى توسكەيگە جايىپ, تابىس كوزىن مولايتقان سەرىكتەستىك 6 مىڭعا جۋىق مال باعادى.
«شۆەيتساريانىڭ «Swiss Choice Holding SA» كومپانياسىمەن بىرلەسىپ قولعا الىنعان جوبا شەڭبەرىندە 12 بيزون جەتكىزىلگەن. بارلىق مال دارىگەرلىك, كارانتين شارالارى ساقتالعان. باعىمى بولەك بيزون شارۋاشىلىعىن وركەندەتۋ ءۇشىن جەر بولىنگەن. ارنايى مال قامايتىن ورىندار مەن ەت وڭدەيتىن, مال ازىعىن دايىندايتىن زاۋىتتار قۇرلىسى ءجۇرىپ جاتىر», دەيدى اۋداندىق اۋىل شارۋاشىلىعى ءبولىمىنىڭ باسشىسى ۆالەنتينا سيتنيكوۆا.
اقكول اۋدانىندا اۋقىمدى ءىس از ەمەس. قاراساي سەلولىق وكرۋگىندەگى «تىڭ جەر 18» سەرىكتەستىگىندە ءبىر ساعاتتىڭ ىشىندە 100 توننا استىق تازالاي الاتىن جەلى سالىنباق. قۇرىلعى سەرىكتەستىكتىڭ وزىنە عانا ەمەس, قاناتتاس قونعان وزگە دە اۋىل شارۋاشىلىعى قۇرىلىمدارىنا سەپتىگىن تيگىزبەك. كەڭەس سەلولىق وكرۋگىندەگى ايدارلى اۋىلىندا فورەل شارۋاشىلىعى ۇيىمداستىرىلعان. قۇرىلتايشىلار جوباعا 100 ملن تەڭگە توڭىرەگىندە قاراجات سالعان.
اقكول اۋىلىندا «روك اقكول» سەرىكتەستىگى ساۋىقتىرۋ كەشەنىنىڭ قۇرىلىسىن قولعا العان. بۇل ماقساتقا 500 ملن تەڭگە قاراجات قۇيىلعان. ازىرگە 10 جاڭا جۇمىس ورنى اشىلىپتى. جوبا تولىقتاي جۇزەگە اسقان كەزدە قىرىقتان استام ادام تۇراقتى جۇمىسپەن قامتىلماق. اۋدانداعى تاعى ءبىر اۋقىمدى جۇمىس – تاۋارلى ءسۇت فەرماسىنىڭ قۇرىلىسى. «ەڭبەك» سەرىكتەستىگى بۇل جوباعا 8,3 ملرد تەڭگە قاراجات قۇيماق. جوبا قازىر مەملەكەتتىك ساراپتاۋدان وتكىزىلگەن. ينجەنەرلىك, ەلەكتر جەلىلەرى تارتىلىپ, العاشقى كەزەكتە قاجەت بولاتىن بار شارۋا اتقارىلعان. جازدا گولشتەين تۇقىمدى 816 مال جەتكىزىلگەن. تاۋارلى ءسۇت فەرماسىنا نەمىستىڭ وتە ساپالى ساۋ قۇرىلعىلارى الىنىپتى.
جىل باسىنان بەرى اۋدانداعى وندىرىلگەن ونەركاسىپ ونىمدەرىنىڭ قۇنى 3 ملرد تەڭگەنى قۇرايدى. تابيعاتى تامىلجىعان اۋدانعا ينۆەستورلار دا ايرىقشا ىقىلاس اۋدارىپ وتىر. اقكول ورمان شارۋاشىلىعىنداعى «سەنىم» ەمدەۋ-ساۋىقتىرۋ ورتالىعى قوماقتى ينۆەستيتسيانىڭ ارقاسىندا جۇزەگە اسىرىلماق.
اقكول قالاسىنىڭ وزىندە «اقكول» كوپسالالى كەشەنىنىڭ قۇرىلىسى ءجۇرىپ جاتىر. «Ramadan» ماكارون وندىرەتىن زاۋىت قۇرىلىسى باستالدى. زاۋىتقا قۇيىلاتىن ينۆەستيتسيا كولەمى – 3,5 ملرد تەڭگە. كاسىپورىن تاۋلىگىنە 48 توننا ماكارون وندىرمەك. ۋريۋپين سەلولىق وكرۋگىنە قاراستى تالقارا اۋىلىندا باعالى بالىق ءوسىرۋ قولعا الىنعان. باعىتتالعان ينۆەستيتسيا 100 ملن تەڭگە شاماسىندا. كراسنوبور سۋ قويماسىندا التاي تۇقىسى مەن اق امۋر ورىستەتىلگەن. جىلىنا 20 تونناعا جۋىق بالىق اۋلانباق.
اقمولا وبلىسى,
اقكول اۋدانى