وتكەن تۇندە اەس قۇرىلىسىنا قاتىستى رەسپۋبليكالىق رەفەرەندۋمنىڭ exit-poll ناتيجەلەرى بەلگىلى بولدى. مۇنداي زەرتتەۋدى بىرنەشە ينستيتۋت قاتار جۇرگىزگەن. بىراق ولاردىڭ بارلىعىنىڭ ۇسىنعان ناتيجەلەرى ازداعان پايىز ايىرماشىلىعى بولعانىمەن, نەگىزىنەن ۇقساس.
«سوتسيس-ا»: 69,8% داۋىس قولداۋ تاپتى
ورتالىق كوممۋنيكاتسيالار قىزمەتىندە وتكەن بريفينگتە «استانا – كەشەندى الەۋمەتتىك زەرتتەۋلەر ينستيتۋتى» («سوتسيس-ا») جەكە قورى جۇرگىزگەن exit-poll ناتيجەلەرى جاريالاندى.
اتالعان ينستيتۋتتىڭ تالداۋشىسى الىبەك تاجىباەۆتىڭ ايتۋىنشا, «استانا – كەشەندى الەۋمەتتىك زەرتتەۋلەر ينستيتۋتى» جەكە قورى «حابار» اگەنتتىگى» اق تاپسىرىسىمەن 2024 جىلدىڭ 6 قازانىندا داۋىس بەرۋ ۋچاسكەلەرىنەن شىعا بەرىستە exit-poll ادىستەمەسى نەگىزىندە ازاماتتاردىڭ ەرىك ءبىلدىرۋ ناتيجەلەرىنىڭ الدىن الا ەسەبىن جۇرگىزدى.
ول «ۇزدىكسىز اعىن» ادىستەمەسىنىڭ كومەگىمەن ەلىمىزدىڭ 189 ۋچاسكەسىندە داۋىس بەرگەن 283 519 ازامات قامتىلعانىن ايتتى. ولاردان رەفەرەندۋم اياسىندا قويىلعان ء«سىز قازاقستاندا اتوم ەلەكتر ستانساسىن سالۋعا كەلىسەسىز بە؟» دەگەن سۇراققا قالاي جاۋاپ بەرگەنى سۇرالدى.
«Exit-poll قورىتىندىسى مىناداي: ساۋالناماعا قاتىسقان ازاماتتاردىڭ 69,8%-ى اەس قۇرىلىسىن قولداپ داۋىس بەرگەنىن مالىمدەدى. ساۋالناماعا قاتىسۋشىلاردىڭ 30,2%-ى وزدەرىنىڭ كەلىسپەيتىنىن ايتقان. ۋچاسكەلەرگە كەلۋ كورسەتكىشى 67,3% دەڭگەيىندە تىركەلدى. دەرەكتەردىڭ قاتەلىگى ± 1,5% قۇرايدى», دەدى ءا.تاجىباەۆ.
ەي: 71,8% داۋىس – ء«يا»
ەۋرازيالىق ينتەگراتسيا ينستيتۋتى Zakon.kz اقپاراتتىق پورتالىنىڭ تاپسىرىسىمەن اەس قۇرىلىسى بويىنشا رەفەرەندۋمدا exit-poll ساۋالناماسىن جۇرگىزدى. بۇل ناتيجەنى ينستيتۋت وكىلى ايگەرىم ەسەنبولاتقىزى ءمالىم ەتتى.
ونىڭ ايتۋىنشا, «سايلاۋ تۋرالى» جانە «رەسپۋبليكالىق رەفەرەندۋم تۋرالى» زاڭدار تالابىنا سايكەس ينستيتۋت رەفەرەندۋمنىڭ ورتالىق كوميسسياسىن exit-poll وتكىزەتىنى تۋرالى الدىن الا قۇلاقتاندىرعان. اتالعان ساۋالناما ەلىمىزدىڭ 17 وبلىسى مەن استانا, الماتى, شىمكەنت قالالارىندا 250 ۋچاسكەدە جۇرگىزىلدى. ونىڭ ىشىندە 159-ى – قالالاردا, 91-ءى اۋىلداردا ارنايى دايىندالعان سۇحباتشىنىڭ كومەگىمەن face-to-face, ياعني بەتپە-بەت ادىسىمەن وتكەن. زەرتتەۋ ناتيجەسىنىڭ قاتەلىگى 1 پايىزدان اسپايدى.
تاڭعى ساعات 7.00-دەن كەشكى 20.00-گە دەيىن جۇرگىزىلگەن ساۋالناما ناتيجەسىندە ء«سىز قازاقستاندا اتوم ەلەكتر ستانساسىن سالۋعا كەلىسەسىز بە؟» دەگەن سۇراققا داۋىس بەرۋشىلەردىڭ 71,8 پايىزى ء«يا, كەلىسەمىن» دەپ جاۋاپ بەردى. ال 28,2 پايىزى «جوق, كەلىسپەيمىن» دەگەن جاۋاپتى تاڭداعانىن مالىمدەدى.
ينستيتۋت ماماندارى exit-poll ساۋالناماسىنا قاتىسقان ءاربىر داۋىس بەرۋشى اتى-ءجونىنىڭ قۇپيالىعى قاتاڭ ساقتالاتىنىن ايتادى.