اتىراۋ وبلىسىنىڭ قىزىلقوعا اۋدانىندا اسكەردەن ورالعان ەگىز سارباز اكە-شەشەسىمەن بىرگە داۋىس بەرۋگە كەلدى. يندەر اۋدانىندا تۇراتىن ەگىز زەينەتكەر دە بىرگە داۋىس بەردى.
قىزىلقوعا اۋداندىق اكىمدىگىنىڭ مالىمەتىنشە, ەگىز بوزبالا – تۇڭعىشباي مەن ءمادىحات ەگىنباي اسكەر قاتارىنا بىلتىر كۇزدە شاقىرىلعان. ال بۇگىن, 6 قازاندا ۇيىنە امان-ەسەن ورالعان.
وسى اۋدانداعى ويىل اۋىلدىق وكرۋگىندە تۇراتىن مىرزاتاي قازيەۆ پەن الماگۇل مومىنوۆا ەگىز ۇلىنىڭ اسكەردەن ورالعانىنا قۋانىپ ءجۇر. ولار قۋانىشىن جاسىرا الماي, №147 رەفەرەندۋم ۋچاسكەسىنە ەگىز ۇلىمەن بىرگە كەلدى.
«اسكەر – جىگىتتەردى شىڭدايتىن مەكتەپ. دەگەنمەن, بىلتىر ۇلدارىمىز اسكەرگە اتتانعاندا, كوڭىلدە ازداعان قوبالجۋ بولعان ەدى. بىراق, بۇرىنعىداي ەكى جىل ەمەس, ءبىر جىل تەز وتە شىعادى عوي. ونىڭ ۇستىنە ۇلدارىمىزبەن ءجيى حابارلاسىپ تۇردىق. ەندى مىنە, بۇگىن ەگىز ۇلىمىز وتاندى قورعاۋ بورىشىن ابىرويمەن اتقارىپ, امان-ەسەن ورتامىزعا ورالدى. بۇل – ءبىز ءۇشىن ۇلكەن قۋانىش. سول قۋانىشىمىزدى اۋىلداستارىمىزدان جاسىرماي, رەفەرەندۋمدا داۋىس بەرۋگە بىرگە كەلدىك. ەلدىڭ بولاشاعى ءۇشىن تاڭداۋىمىزدى ۇلدارىمىزبەن بىرگە جاسادىق. الدا دا ەلىمىز امان, جۇرتىمىز تىنىش بولسىن», دەيدى مىرزاتاي قازيەۆ.
سونداي-اق يندەر اۋدانىنىڭ ەسبول اۋىلىندا ەگىز زەينەتكەر دە داۋىس بەرۋ ۋچاسكەسىنە بىرگە كەلدى.
زەينەت جاسىنداعى انداقۇلوۆالاردىڭ ەسىمى ءبىر-بىرىنە ۇقساس. ءبىرى – ايسۇلۋ, ەكىنشىسى – كۇنسۇلۋ. ەكەۋى دە يندەر اۋدانىنداعى ەسبول اۋىلىنداعى №122 رەفەرەندۋم ۋچاسكەسىندە تىركەلگەن. ءبىر كۇندە ومىرگە كەلگەن ەگىز زەينەتكەر ءبىر-بىرىنەن اجىراماي, داۋىس بەرۋ ءۇشىن ۋچاسكەگە بىرگە كەلۋدى ۇيعارىپتى.
ء«بىز ءبىر-ءبىرىمىزدى ىزدەپ تۇرامىز. ويتكەنى, ءبىز –ەگىزبىز. بۇگىنگى رەفەرەندۋمدا تاڭداۋ جاساۋ ءۇشىن بىرگە كەلدىك. زەينتكەر بولساق تا, ەلدىڭ كەلەشەگى جارقىن بولعانىن قالايمىز», دەيدى ولار.