ءماسليحات دەپۋتاتتارىنىڭ فورۋمى شەڭبەرىندە «ينفراقۇرىلىمدىق دامۋ جانە ونەركاسىپ» تاقىرىبىندا ارنايى سەسسيا ءوتتى, دەپ حابارلايدى Egemen.kz.
استانادا «AMANAT» پارتياسىنىڭ ۇيىمداستىرۋىمەن بارلىق دەڭگەيدەگى ءماسليحاتتار دەپۋتاتتارىنىڭ فورۋمى ءوتتى. فورۋم اياسىندا وتكەن پانەلدىك سەسسيالاردىڭ ءبىرى «ينفراقۇرىلىمدىق دامۋ جانە ونەركاسىپ» تاقىرىبىنا ارنالىپ, وعان پرەمەر-ءمينيسترىنىڭ ورىنباسارى قانات بوزىمباەۆ, ونەركاسىپ جانە قۇرىلىس ءمينيسترى قانات شارلاپاەۆ پەن كولىك ءمينيسترى مارات قاراباەۆ قاتىستى.
ءىس-شارانىڭ ماقساتى – تۇرعىن ءۇي-كوممۋنالدىق شارۋاشىلىق, قۇرىلىس, ونەركاسىپ جانە كولىك سالالارىن جاقسارتۋدىڭ ناقتى جولدارىن ىزدەۋ.
پانەلدىك سەسسيانى قر ۇكىمەت باسشىسىنىڭ ورىنباسارى ق.بوزىمباەۆ اشىپ, جينالعانداردىڭ الدىندا ەلىمىزدىڭ وڭىرلەرىندە ينفراقۇرىلىمدى دامىتۋ جونىندەگى جۇمىس جوسپارىمەن تانىستىردى.
ەلىمىزدىڭ تۇكپىر-تۇكپىرىنەن كەلگەن ءماسليحات دەپۋتاتتارى ۇكىمەت وكىلدەرىنە بەلسەندى تۇردە حالىقتى مازالاپ وتىرعان سۇراقتارىن قويىپ, ولاردى شەشۋ جولىنداعى ءوز ۇسىنىستارىن ءبىلدىردى.
سۇراقتاردىڭ ءبىرى جامبىل وبلىسىنداعى قانت زاۋىتىنىڭ جۇمىسىن جالعاستىرۋعا قاتىستى بولدى. بۇعان مينيستر قازىرگى كەزدەگى باستى مىندەت قانت وڭدەۋ زاۋىتىن جاڭعىرتۋ دەپ جاۋاپ بەردى. اتاپ ايتقاندا, ەلىمىزدەگى شيكىزاتتىڭ جەتكىلىكتى كولەمىن ەسكەرە وتىرىپ, جاڭعىرتۋعا ينۆەستيتسيا سالۋعا مۇمكىندىك بەرەدى.
ء«وز ءوندىرىسىمىز بولا تۇرا, وسىنداي ماڭىزدى الەۋمەتتىك ءونىم بويىنشا باسقا ەلدەرگە تاۋەلدى بولۋ – مۇلدەم دۇرىس ەمەس», دەدى ق.شارلاپاەۆ.
ودان باسقا ءماسليحات دەپۋتاتتارى قۇرىلىس سالاسىنا, وتاندىق تاۋارلار وندىرۋشىلەرىنىڭ جاۋاپكەرشىلىگى جانە باسقا دا بىرقاتار وتىنىشتەرىن جەتكىزدى. بارلىق سۇراققا ەگجەي-تەگجەيلى جاۋاپ بەرىلدى.