«قارتى بار ءۇيدىڭ قازىناسى بار» دەگەندەي, كەۋدەسىنەن كورىكتەي قايناتىپ عيبرات توككەن قارتتارىمىز قاشاندا تاربيە وزەگى. قاريالار ەلىمىزدىڭ تاريحىنا, ءوسىپ-وركەندەۋىنە, بولاشاعىنا مول ۇلەس قوسقانى انىق.
ۇلتتىق مۋزەيدىڭ 10 جىلدىق مەرەيتويى مەن «كۇمىس جاس» جوباسى اياسىندا مۋزەي ءىسى ارداگەرلەرىنىڭ قاتىسۋىمەن قارتتار كۇنىنە ارنالعان «قارتتارىم – اسىل قازىنام» اتتى سالتاناتتى ءىس-شارا ءوتتى. وعان «قامقور وتباسى», «شاڭىراق» قارتتار ۇيلەرى, «بەلسەندى ۇزاق ءومىر ءسۇرۋ» ورتالىقتارىنان زەينەت جاسىنداعى قاريالار قاتىستى.
مەرەكە قارساڭىندا تۇساۋى كەسىلىپ وتىرعان «كۇمىس جاس» جوباسى ەلىمىزدىڭ تاريحي-مادەني مۇراسىن ناسيحاتتاپ, زەينەتكەرلەرگە جان-جاقتى قولداۋ كورسەتۋ, بوس ۋاقىتتارىن پايدالى, ءتيىمدى وتكىزۋگە, قىزىقتى شارالار ۇيىمداستىرۋعا باعىتتالىپ وتىر.
ۇلتتىق مۋزەيدىڭ عىلىمي حاتشىسى سايالبەك عيززاتوۆ قوناقتاردى ءتول مەرەكەسىمەن قۇتتىقتاپ, «كۇمىس جاس» جوباسىن اعا بۋىن مەن جاس ۇرپاق اراسىنداعى التىن كوپىر دەي كەلە, يگى باستاماعا ساتتىلىك تىلەدى.
– بۇگىنگى ايتۋلى ءىس-شارامەن قاتار ۇلتتىق مۋزەيگە 10 جىل تولدى. باسقوسۋدىڭ تاعى ءبىر سەبەبى, «كۇمىس جاس» جاڭا جوباسىنىڭ تۇساۋكەسەرىنە كۋا بولىپ وتىرمىز. ىرگەلى جوبانىڭ باستى ماقساتى, ءوزىمىزدىڭ زەينەتكە شىققان ارداگەرلەرىمىزگە, ولاردىڭ باسىن قوسىپ سالاماتتى ءومىر سالتىن ۇستانۋعا, مۋزەيدىڭ شىعارماشىلىق الەۋەتىن ودان ءارى دامىتۋعا اتسالىسۋ ەكەنىن ايتا كەتكەن ءجون. جوبا اعا بۋىن مەن جاس ۇرپاقتىڭ اراسىنداعى التىن كوپىر ىسپەتتەس بولعالى تۇر. اتاقتى فرانتسۋز جازۋشىسى اندرە مورۋا «باتىلدىق, ەركىندىك ولگەندە, قارتتىق دۇنيەگە كەلەدى» دەگەن ەكەن. سىزدەر باتىل, ەركىن باسىپ جۇرە بەرىڭىزدەر, جاس ۇرپاق سوڭدارىڭىزدان ەرە بەرسىن», – دەدى ول.
مۇنان سوڭ ءىس-شاراعا كەلگەن قۇرمەتتى قوناق, مۋزەي مايتالمانى ساحان اسايىنقىزى ءسوز سويلەپ, مۋزەي قىزمەتكەرلەرىنىڭ سىي-قۇرمەتىنە العىسىن ءبىلدىردى.
– ون جىل بۇرىن وسى مۋزەيدىڭ شاڭىراعىن كوتەرەمىز دەپ ءبارىمىز اتسالىسقان بولاتىنبىز. سول جىلداردان بەرى ۇلتتىق بىرەگەي شاڭىراق جاندانىپ, جاڭا بەلەستەرگە قول جەتكىزدى. مۋزەي سالاسىندا 1967 جىلدان بەرى ەڭبەك ەتتىم. ەلىمىزدىڭ تاريحي مۇرالارىن, جادىگەرلەرىن تانىتۋ, ولاردى زەرتتەۋ – ۇلكەن, قوماقتى شارۋا. وسى جولدا ەڭبەكتەنىپ جۇرگەن ءاربىر قىزمەتكەرگە تەك تابىس تىلەيمىن,– دەدى ساحان اسايىنقىزى.
مەرەكەلىك داستارقان باسىندا ۆيكتورينالىق ويىندار ويناتىلىپ, قازاقستاننىڭ ەڭبەك سىڭىرگەن ءارتىسى بەكبولات بايساعاتوۆ پەن مۋزەي قىزمەتكەرلەرى قوناقتارعا ونەر كورسەتىپ, سىيلىق تابىس ەتتى.