بۇگىن جەتىسۋ وبلىسىندا بىرقاتار اتاۋلى ءىس-شارا ۇيىمداستىرىلدى. قىزىلتاستىڭ بىرەگەي پەتروگليفتەرى مەملەكەت قورعاۋىنا الىندى, دەپ حابارلايدى Egemen.kz وبلىستىڭ قوعامدىق دامۋ باسقارماسىنىڭ اقپاراتىنا سىلتەمە جاساپ.
«تازا قازاقستان» ەكولوگيالىق اكتسياسى اياسىندا بۇگىن تالدىقورعان قالاسىندا «قىزىلتاس – تاسباقا» ەكولوگيالىق اكتسياسى ءوتىپ, وعان وبلىس اكىمىنىڭ ورىنباسارى دياس ەسداۋلەتوۆ, قالا اكىمى ەرنات ءبازىل, قوعام بەلسەندىلەرى, ءوڭىر جاستارى, ەكو-ەرىكتىلەر, «جاسىل ەل» ەڭبەك جاساقتارى قاتىستى.
شارا بارىسىندا قىزىلتاس اۋماعىنداعى بىرەگەي پەتروگليفتەر جەرگىلىكتى ماڭىزى بار قورعالاتىن تاريحي-مادەني نىساندار تىزىمىنە ەنگىزىلگەندىگى تۋرالى تاقتا ورناتىلدى.
وسى ورايدا ءوڭىردىڭ ەكوبەلسەندىسى دينارا باكيروۆا تاسقا قاشالعان پەتروگليفتەردى تاريحتان سىر شەرتەتىن ەسكەرتكىش رەتىندە قورعاۋعا العانى ءۇشىن مەملەكەت باسشىسى مەن وبلىس باسشىلىعىنا العىس ءبىلدىردى.
ەسكە سالا كەتسەك, بۇعان دەيىن وبلىس اكىمى بەيبىت يساباەۆ ەكولوگتارمەن, قالا تۇرعىندارىمەن, قۇزىرەتتى مەملەكەتتىك ورگاندارمەن بىرلەسىپ, «تاسباقا» تاۋى مەن جارتاستاعى پەتروگليفتەردى ساقتاۋ بويىنشا قاجەتتى شارالار قابىلداعانىن, كارەردى يگەرۋ زاڭ اياسىندا توقتاتىلعانىن, بىرلەسكەن كۇش-جىگەردىڭ ارقاسىندا ماسەلەنىڭ شەشىمى تابىلعانىن مالىمدەگەن ەدى.
«قازاقستان ستۋدەنتتەر اليانسى» جەتىسۋ وبلىسى بويىنشا فيليالىنىڭ توراعاسى, ەكوۆولونتەر ەسكەندىر اماندوس: «ەل كولەمىندە وتكىزىلىپ جاتقان اۋقىمدى تازالىق اكتسياسى – اسا ماڭىزدى ناۋقان. جاستار عانا ەمەس, اعا بۋىن – ارداگەرلەردىڭ, ورتا بۋىن – ەل اعالارىنىڭ, جاس ۇرپاقتىڭ يىق تىرەسۋىمەن بىرگە اتقارىلىپ جاتقان تازالىق شارالارى تۋعان ەلگە دەگەن شىنايى سۇيىسپەنشىلىكتىڭ دالەلى ىسپەتتەس. مۇنداي ءىس-شارالار وسكەلەڭ ۇرپاقتىڭ تۋعان ولكەنىڭ تابيعاتى مەن تاريحىنا دەگەن سۇيىسپەنشىلىگىن, جەر الدىنداعى جاۋاپكەرشىلىگىن وتە جاقسى تاربيەلەيدى جانە ادامداردىڭ ەكولوگيالىق ساۋاتتىلىعىن ارتتىرادى», دەدى.
سونىمەن قاتار تەكەلى قالاسىندا جازۋشىلار وداعىنىڭ مۇشەسى تورعىن تۇرلىباەۆامەن «جان مەن ءتاننىڭ تازالىعى – رۋحاني تازالىقتىڭ وزەگى» اتتى دوڭگەلەك ۇستەل ءوتتى. ءىس-شارادا قالا جاستارى, ەكو-ەرىكتىلەر باس قوستى. دوڭگەلەك ۇستەل بارىسىندا جاستار تابيعاتقا ۇقىپتى قاراۋ, قورشاعان ورتانى تازا ۇستاۋ جونىندە پىكىر الماستى.
جەتىسۋ وبلىسىندا «تازا قازاقستان» تازالىق اكتسياسى اياسىندا تازالىق شارالارى تۇراقتى ۇردىسكە اينالىپ, جالعاسىن تاۋىپ كەلەدى. تۇرعىندار تاراپىنان زور قولداۋعا يە بولعان ەكولوگيالىق شاراعا بۇگىندە 200 مىڭعا جۋىق ادام ات سالىسىپ, ءتۇرلى تازالىق شارالارىنا قاتىسۋدا بەلسەندىلىك تانىتىپ ءجۇر.
جالپى «تازا قازاقستان» تازالىق اكتسياسىن وتكىزۋگە جەتىسۋ وبلىسى بويىنشا جالپى سانى 1 611 تەحنيكا جۇمىلدىرىلدى. ناتيجەسىندە 7 793 توننا قوقىس شىعارىلىپ, 30 726 ءتۇپ اعاش وتىرعىزىلدى.