استانادا «جۇلدىزاي-2024» اتتى ۇلتتىق ينكليۋزيۆتى ويىندار ءوتتى, دەپ حابارلايدى Egemen.kz. بۇل تۋرالى استانا قالاسىنىڭ دەنە شىنىقتىرۋ جانە سپورت باسقارماسى مالىمدەدى.
باسەكەگە 10-16 جاستاعى مۇمكىندىگى شەكتەۋلى بالالار مەن جاسوسپىرىمدەر قاتىسىپ, جەڭىل اتلەتيكا, گولبول, ميني-فۋتبول, ۇستەل تەننيسى, ۇلتتىق ويىن تۇرلەرى: بەس تاس, اسىق اتۋ جانە توعىزقۇمالاق سياقتى سپورتتىڭ جەتى تۇرىنەن سىنعا ءتۇستى. جارىسقا ەلىمىزدىڭ ءار وڭىرىنەن 600-گە جۋىق سپورتشى قاتىستى.
ۇيىمداستىرۋشىلاردىڭ ايتۋىنشا, ءىس-شارانىڭ نەگىزگى مىندەتى – بالالاردىڭ سپورتقا دەگەن قىزىعۋشىلىعىن وياتۋ, سالاۋاتتى ءومىر سالتىن ۇستانۋعا, ولاردىڭ سپورتتىق الەۋەتىن دامىتۋعا جانە فيزيكالىق, ينتەللەكتۋالدىق شەكتەۋلەرگە قاراماستان جوعارى ناتيجەلەرگە قول جەتكىزۋگە ىقپال ەتۋ. سونىمەن قاتار ويىندار مۇمكىندىگى شەكتەۋلى بالالاردىڭ الدىندا تۇرعان ماسەلەلەرگە قوعامنىڭ نازارىن اۋدارادى.
سالتاناتتى ءىس-شارانىڭ اشىلۋ راسىمىنە پارادزيۋدودان پاريج پاراليمپياداسىنىڭ كۇمىس جۇلدەگەرى ەرعالي شامەي ارنايى قاتىستى.
«سوڭىمنان ەرىپ كەلە جاتقان ءىنى-قارىنداستارىما ساتتىلىك تىلەيمىن! ءوزىم پارادزيۋدو سپورتىنان ۇلكەن جەتىستىكتەرگە جەتتىم. ءالى دە توقتاپ قالمايمىن. سىزدەر دە ءبىز سەكىلدى قازاقتىڭ كوك تۋىن ابىرويمەن اسقاقتاتىن بولاسىزدار. بىزدەن دە اسىپ تۇسۋگە تىلەكتەسپىن. سول ءۇشىن تىنىمسىز ەڭبەك ەتىپ, ۇمىتتەرىڭىزدى ەشقاشان ۇزبەڭىزدەر. وسىندا كەلىپ وتىرعان قادامدارىڭىزدىڭ ءوزى – ۇلكەن جەڭىس. بارلىعىڭىزعا ساتتىلىك تىلەيمىن!», دەدى ول.
ايتا كەتەيىك, اۋقىمدى ءىس-شارا 2016 جىلدان بەرى تۇراقتى تۇردە ۇيىمداستىرىلىپ كەلەدى.