ول كىشكەنتايىنان بي ونەرىنە قىزىعاتىن. بۇل دا اپكەسى سامالعا ەرىپ الدىمەن بي ۇيىرمەسىنە باردى. سودان سوڭ جەزقازعان قالاسىندا قۇرىلعان «ماقپال» بي ءانسامبلىنىڭ قۇرامىنا قابىلداندى. وسى انسامبل ساپىندا سان مارتە گاسترولدىك ساپارعا شىقتى. ءوز ەلىمىزدە عانا ەمەس. سول ساپارلاردا سايا بي ونەرىنە دەگەن حالىقتىڭ ىنتا-ىقىلاسىن كوردى, سەزىندى.
«ەرتەڭ وسكەندە حورەوگراف بولامىن» دەگەن ويعا بەرىك بەكىندى. ءسويتىپ, مەكتەپ بىتىرگەن كەزدە ماماندىق تاڭداۋدا ەش قينالعان جوق. استانا قالاسىنداعى قازاق ۇلتتىق حورەوگرافيا اكادەمياسىنا وقۋعا ءتۇستى. اراداعى جىلدار قالاي جىلدام زىمىراپ وتە شىقتى دەسەڭىزشى. ول قولىنا ديپلوم العان سوڭ كوپ ويلانىپ جاتپادى. تۋعان جەرگە قىزمەت ەتۋدى پارىز ساناپ, جەزقازعانعا جول تارتتى. قازىر س.قوجامقۇلوۆ اتىنداعى جەزقازعان مۋزىكالى دراما تەاترىندا بالەتمەيستەر بولىپ ەڭبەك ەتەدى. نەگىزگى جۇمىسىنان قولى بوساعاندا جاس قىزداردى بي ونەرىنە تارتۋدى ماقسات تۇتقان ءبيشى ءوزىنىڭ مەكتەبىن اشۋدى ۇيعاردى. بۇل ويىن اتا-اناسى دا, اپكەسى سامال دا قولدادى. «دامۋ» باعدارلاماسى بويىنشا عيماراتقا قول جەتكىزدى. بۇل ويداعى ارمانعا قول جەتكىزۋدىڭ تەك العاشقى قادامى بولاتىن.
«بىزگە قۇرال-جابدىقتار قاجەت بولدى. سونداي-اق مەنىڭ تۇسىنىگىمدە, بي – سۇلۋلىقتىڭ ءرامىزى. مۇندا بي ۇيرەنۋگە كەلگەندەر ەڭ الدىمەن وزدەرى جاتتىعاتىن نىساننىڭ ادەمىلىگىنە سۇيسىنە ءبىلۋى كەرەك. سوندىقتان بي زالىن كوركەمدەپ, ادەمىلەپ, ياعني ينتەرەرىن كوزدىڭ جاۋىن الاتىنداي ەتىپ قويۋ دا كەرەك بولدى. ءسويتىپ, جەزقازعان قالاسى اكىمىنىڭ «تاۋەلسىزدىك ۇرپاقتارى» دەپ اتالاتىن جاس كاسىپكەرلەرگە ارنالعان بايقاۋىنا قاتىسىپ, گرانت يەگەرى اتاندىم», دەيدى سايا سادىقوۆا كاسىپكەرلىككە قالاي كەلگەنى حاقىندا.
ول جۋىردا سالتاناتتى جاعدايدا «SSS» دەگەن بي مەكتەبىن اشتى. سالتاناتتى شاراعا قالا اكىمى ق.شايجانوۆ قاتىستى.
ء«اربىر كاسىپكەر, جاڭادان اشىلعان نىسان قالامىزدىڭ ەكونوميكاسىنا تامشىداي بولسا دا ۇلەس قوسادى. سوندىقتان ولاردىڭ ارقايسىسىنىڭ جۇمىستارىنا تەك قانا ساتتىلىك تىلەيمىز. سايانى دا, سامالدى دا «ماقپالدا» جۇرگەن كەزدەرىنەن بىلەمىن. ەندى ولاردىڭ وزدەرى كەيىنگى بۋىندى تاربيەلەۋدى قولعا الىپ جاتىر. بۇعان قالاي سۇيىنبەسكە؟» دەدى ول. ءاربىر اكىم جاس كاسىپكەرلەردى وسىلايشا قولداي بىلسە, قانداي عانيبەت.
سايانىڭ «SSS» مەكتەبىندە قازىردىڭ وزىندە 5 جاڭا جۇمىس ورنى اشىلدى. كەيىن مەكتەپتىڭ اياسى كەڭىسە, جۇمىس ورىندارى دا كوبەيە ءتۇسۋى ابدەن مۇمكىن. بۇل جاعىن ۋاقىت ەنشىسىنە قالدىرا تۇرالىق.
قازىر مۇندا 40 جاس قىز بي ونەرىنىڭ الىپپەسىمەن تانىسۋدا.
«مەكتەپكە ءتورت جاستان باستاپ قابىلدايمىز. ولار 7 جاسقا دەيىن بالالار حورەوگرافياسىمەن اينالىسادى. بۇدان سوڭ ءۇش باعىتتىڭ, ياعني كلاسسيكالىق ءبيدى, بالەتتى, سونداي-اق حالىقتىق جانە زاماناۋي حورەوگرافيانى تاڭدايتىن بولادى. ءبىزدىڭ ماقسات – بي ونەرىنە ۇمتىلاتىن جاس وسكىندەردى كاسىبي تۇرعىدا تاربيەلەۋ» دەگەن سايا بۇل ىستە اپكەسى سامالدىڭ اقىل-كەڭەسىنە, كومەگىنە جۇگىنەتىنىن جاسىرمادى.
«سامال استانا قالاسىنداعى قازاق ۇلتتىق ونەر ۋنيۆەرسيتەتىنىڭ تۇلەگى, پەداگوگ-ماگيستر. سوندىقتان ونىڭ ءبىلىمى, تاجىريبەسى مول» دەيدى سايا جانىندا جۇرگەن ەڭ جاقىن ۇستازى تۋرالى.
ونەرلى بولۋ بار دا, سول ونەردى كاسىپكە اينالدىرۋ بار. مۇنىڭ ەكەۋى دە سايانىڭ بويىنان تابىلىپ تۇر. ءوزى – ونەرلى, ءوزى – كاسىپكەر. كوپ كەشىكپەي «SSS» مەكتەبىنەن قانشاما شاكىرتتەر بي الەمىنە تۇلەپ ۇشاتىن بولادى. دەمەك ونىڭ كاسىپكەرلىكپەن بىرگە ۇستازدىق جولى دا باستالىپ جاتىر.
جەزقازعان