سۇيەك كەمىگى دونورىنىڭ دۇنيەجۇزىلىك كۇنى قارساڭىندا دەنساۋلىق ساقتاۋ مينيسترلىگىنىڭ ترانسفۋزيولوگيا عىلىمي-وندىرىستىك ورتالىعى مەن سۇيەك كەمىگى دونورلارى ۇلتتىق تىركەلىمىنىڭ ۇجىمى ءباسپاسوز ءماسليحاتىن وتكىزدى.
ادەتتە وسى كۇنى گەماتولوگيالىق, ونكولوگيالىق, ترانسپلانتتاۋدى قاجەت ەتەتىن باسقا دا كۇردەلى اۋرۋلارعا شالدىققان بالالار مەن ەرەسەكتەرگە سۇيەك كەمىگى مەن پەريفەريالىق قاننىڭ ءدىڭ جاسۋشالارىن بەرۋگە كەلىسكەن بارلىق دونورعا قۇرمەت كورسەتىلەدى. دونورلاردى تارتۋعا, تىركەلىمدەردى قالىپتاستىرۋعا كوڭىل ءبولىنىپ, وسى باعىتتا ەڭبەكتەنىپ جۇرگەن دارىگەرلەردىڭ دە ەڭبەگى ەسكەرۋسىز قالمايدى.
ءباسپاسوز ءماسليحاتىندا ترانسفۋزيولوگيا عىلىمي-وندىرىستىك ورتالىعىنىڭ باسقارما توراعاسى سانيا ءابدىراحمانوۆا سۇيەك كەمىگى دونورى بولعان, ۇلتتىق تىركەلىمگە ەنگەن ازاماتتارعا العىس ايتتى.
«سۇيەك كەمىگى دونورىنىڭ دۇنيەجۇزىلىك كۇنى 2015 جىلدان بەرى اتالىپ ءوتىپ كەلەدى. بۇل كۇندى ترانسفۋزيولوگيا عىلىمي-وندىرىستىك ورتالىعىنىڭ دارىگەرلەرى دە نازاردان تىس قالدىرعان ەمەس. جىل سايىن سۇيەك كەمىگى مەن پەريفەريالىق قاننىڭ ءدىڭ جاسۋشالارىن بەرۋگە كەلىسكەن دونورلارعا العىس ايتىپ, قۇرمەت كورسەتەمىز. سونداي-اق ءىس-شارالار اياسىندا ەلدەگى قان ورتالىقتارىندا ەڭبەك ەتەتىن بارشا ماماننىڭ كومەگىمەن سۇيەك كەمىگى دونورى تۋرالى اقپاراتتاندىرۋعا كۇش سالامىز, سۇيەك كەمىگى ترانسپلانتاتسياسىنىڭ ماڭىزىن, قانداي اۋرۋلار كەزىندە ترانسپلانتاتسيا قاجەت ەكەنىن تۇسىندىرەمىز. ترانسپلانتاتسيا كەزىندەگى قاۋىپسىزدىك تۋرالى اقپاراتتاندىرىپ, سۇيەك كەمىگى دونورلارىنىڭ ۇلتتىق تىركەلىمىنىڭ جۇمىسى تۋرالى باياندايمىز. ارينە, ءبىز مۇنداي ءىس-شارالاردى تەك سۇيەك كەمىگى دونورىنىڭ دۇنيەجۇزىلىك كۇنى قارساڭىندا عانا ۇيىمداستىرمايمىز. مىسالى, بيىل ماۋسىم ايىندا «100 qadam» دەپ اتالاتىن جوبا اياسىندا تۇرعىندارعا ناسيحات جۇرگىزدىك. بۇل اكتسيانىڭ نەگىزگى ماقسات-مۇراتى سۇيەك كەمىگى دونورىنىڭ قاۋىپسىزدىگى تۋرالى كەڭىنەن اقپاراتتاندىرۋ بولدى. ويتكەنى ۇلتتىق تىركەلىمگە كوبىرەك ادام تارتۋ قاجەت. ءبىز كۇش بىرىكتىرسەك قانا حال ۇستىندە جاتقان ناۋقاستارعا ءۇمىت سىيلاپ, امان الىپ قالا الامىز. وسى باعىتتاعى ءىس-شارا 100 كۇنگە جالعاسادى», دەدى س.ءابدىراحمانوۆا.
كونفەرەنتسيادا ۇلتتىق سۇيەك كەمىگى دونورلارى رەگيسترىنىڭ مەڭگەرۋشىسى انار بايسماقوۆا گەموپوەتيكالىق ءدىڭ جاسۋشالارىنىڭ دونورلىعى تۋرالى بايانداما وقىدى. ونىڭ ايتۋىنشا, جىل سايىن ەلدە شامامەن 300 ناۋقاسقا لەيكەميا, باسقا دا قان اۋرۋلارى دياگنوزى قويىلادى. ءارى ولاردىڭ كوبىنە سۇيەك كەمىگىن اۋىستىرۋ قاجەت بولادى. ءباسپاسوز ءماسليحاتىنا جاسۋشالارى پاتسيەنتتەردىڭ ءومىرىن ساقتاپ قالۋعا سەپتىگىن تيگىزگەن سۇيەك كەمىگى دونورلارىنىڭ ۇلتتىق تىركەلىمىندە تۇرعان دونورلار دا قاتىستى. ولار وزدەرىنىڭ دونور تاجىريبەسى تۋرالى اڭگىمەلەدى.