سوڭعى جىلدارى جاسالعان «AD Scientific Index» حالىقارالىق رەيتينگىسىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ حيميا جانە حيميالىق تەحنولوگيا فاكۋلتەتىنىڭ ورگانيكالىق زاتتار, تابيعي قوسىلىستار جانە پوليمەرلەر حيمياسى كافەدراسىنىڭ وقىتۋشىلارى قازاقستاننىڭ ەڭ ۇزدىك 2 مىڭ عالىمىنىڭ تىزىمىنە ەنىپ, بىرنەشە جىلدان بەرى الدىڭعى قاتاردى بەرمەي كەلەدى.
ال Alper-Doger Scientific Index – جەكە عالىمداردىڭ سوڭعى 6 جىلداعى عىلىمي ونىمدىلىگىنە نەگىزدەلگەن رەيتينگ ءارى Google Scholar تالداۋ جۇيەسىمەن يندەكستەلەدى.
پوليمەرلەر حيمياسى سالاسىندا ايتارلىقتاي تابىسقا جەتكەن عالىمداردىڭ ءبىرى – پەريزات ۇركىمباەۆانىڭ گيدروفيلدى, بيوىدىرايتىن پوليمەرلەر مەن ولاردىڭ قولدانىلۋى جونىندەگى 20 شاقتى ماقالاسى يمپاكت فاكتورى جوعارى جۋرنالداردا جارىق كورگەن. ال رايحان راحمەتۋللاەۆانىڭ ستيمۋلسەزىمتال پوليمەرلەردىڭ سينتەزى, بيومەديتسينالىق پوليمەرلەر مەن ولاردىڭ قولدانىلۋى تۋرالى 14 ەڭبەگى Scopus, Clarivate Analytics دەرەكقورىنا كىرەتىن جۋرنالداردا جاريالانعان.
– ارينە, بۇل جەتىستىكتەر مەملەكەت تاراپىنان عىلىمنىڭ زاماناۋي باعىتتارىن دامىتۋدى قولداۋدىڭ ارقاسىندا ىسكە اسىپ جاتىر. ۋنيۆەرسيتەت باسشىلىعى دا عىلىم كوشىن العا سۇيرەيتىن جوبالارعا ۇنەمى قولداۋ كورسەتىپ وتىرادى. سوڭعى جىلدارى عىلىمي جۇمىستاردى قورىتىندىلاۋ بارىسىندا Web of Science جانە Scopus دەرەكتەر بازاسىندا يندەكستەلگەن حالىقارالىق باسىلىمدارداعى جاريالانىمدار سانى ارتىپ كەلەدى. ءبىر جاعىنان بۇل عىلىمي زەرتتەۋلەردىڭ ساپاسىن ارتتىرۋ, الەمنىڭ جەتەكشى ۋنيۆەرسيتەتتەرى مەن عىلىمي-زەرتتەۋ ينستيتۋتتارىمەن ىنتىماقتاستىقتىڭ ارقاسىندا اتقارىلىپ جاتىر, – دەيدى حيميا عىلىمدارىنىڭ كانديداتى پەريزات يبراگيمقىزى.
پەريزات ۇركىمباەۆا كافەدرادا اتقارىلىپ جاتقان عىلىمي جوبالاردىڭ كوپشىلىگى قورشاعان ورتانى قورعاۋ مەن ەكولوگيا ماسەلەسىنە باعىشتالىپ جاتقانىن ايتادى.
عالىم رايحان راحمەتۋللاەۆا: «قازاقستان نارىعىندا پوليمەر نەگىزىندەگى پاكەتتەردىڭ تەك ءبىر ءتۇرى بار, ول پوليەتيلەننەن جاسالعان پاكەتتەر. قازىر ونىڭ قورشاعان ورتاعا زيانى, قوقىستاردا جاتىپ, جىلدار بويى ىدىرامايتىندىعى بەلگىلى. 2025 جىلدان باستاپ بيوىدىرامايتىن پاكەتتەردى قولدانۋعا زاڭمەن شەكتەۋ قويىلادى. وسىعان وراي قازۇۋ-دىڭ عالىمدارى: پروفەسسور گ.مۋن مەن دوتسەنت پ.ۇركىمباەۆانىڭ باسشىلىعىمەن كوپ جىلدان بەرى وسى ماسەلەنى شەشۋ ءۇشىن عىلىمي جۇمىستار جۇرگىزىلىپ كەلەدى. بىرنەشە يننوۆاتسيالىق پاتەنتتەر الىنىپ, عىلىمي ماقالالار جوعارى رەيتينگىلىك باسىلىمداردا جارىق كورگەن», دەيدى.
پەريزات ۇركىمباەۆا كافەدرا 2021 جىلى عىلىم جانە كوممەرتسيالاندىرۋ جونىندەگى حالىقارالىق كەڭەستىڭ جاريالاعان كونكۋرسىنا «تۇرلەندىرىلگەن كراحمال نەگىزىندەگى بيولوگيالىق ىدىرايتىن ماتەريالدار ءوندىرىسى» اتتى جوبانى ۇسىنىپ, جەڭىپ العانىن اتاپ وتسە, وسى عىلىمي جوبانىڭ جەتەكشىسى رايحان راحمەتۋللاەۆا:
«جوبا حالىقارالىق قايتا قۇرۋ جانە دامۋ بانكىنىڭ ماقۇلداعان ء«ونىمدى يننوۆاتسيالاردى ىنتالاندىرۋ» باعدارلاماسى شەڭبەرىندە ءجۇردى. جوبانى ىسكە اسىرۋ ءۇشىن 96 038 805 تەڭگە ءبولىندى. جوبانىڭ نەگىزگى ماقساتى – ارزان, قول جەتىمدى, بيوىدىرايتىن, كۇندەلىكتى ومىردە قولدانىلاتىن پاكەتتەر شىعارۋ. مۇنداي پاكەتتەردى جاساۋ ءۇشىن كراحمالدى قولدانامىز. قازىرگى تاڭدا اقمولا وبلىسى ارشالى اۋدانىنداعى «ەر-باتىر بيوپوليمەر» جشس-دە جۇمىس ءجۇرىپ جاتىر. وندىرىلەتىن پاكەتتەردىڭ بيوىدىرايتىن قاسيەتتەرى قازۇۋ-دىڭ حيميا فاكۋلتەتىندە زەرتتەلۋ ۇستىندە. ءىرى سۋپەرماركەتتەرمەن كەلىسسوزدەر جۇرگىزىلدى», دەيدى.