ەلىمىزدەگى ەكونوميكالىق قىلمىس جانە سىبايلاس جەمقورلىقپەن كۇرەس جۇرگىزەتىن قىزمەتكەرلەر قاتارى جاڭا لەكپەن تولىقتى. ولاردىڭ ىشىندە كەدەن ماماندارى دا بار. اشىلعانىنا ون ءبىر جىل تولعان قارجى پوليتسياسىنىڭ اكادەمياسى وسىمەن توعىزىنشى رەت تولىققاندى دايارلىقتان وتكەن ءتۇلەكتەرىن شىعارىپ, ءورىسىن كەڭەيتتى. جالپى بيىل, تۇتاستاي العاندا, 101 تۇلەك ءتورت جىلعى وقۋلارىنىڭ قورىتىندىسىن ءساتتى اياقتاپ, “لەيتەنانت” پوگونىن تاقتى. ەندى ولار, جوعارىدا ايتقانىمىزداي, ويى ارام, قولى لاس جانداردىڭ جولىن قيۋ ءۇشىن ءتيىستى مەملەكەتتىك ورگانداردا قىزمەت اتقارۋ قۇقىعىنا يە بولىپ, ارنايى جولداما الدى.
الايدا, وسى جۇزدەن اسا ءتۇلەكتىڭ مۇنداي ابىرويلى دا جاۋاپتى ىسكە قول جەتكىزۋلەرى ءۇشىن كوپتەگەن تالاپ پەن مىندەتتەردى ورىنداپ, بىرقاتار بەلەستەردەن وتۋلەرىنە تۋرا كەلدى. بۇل ولاردىڭ مەكتەپ قابىرعاسىنان شىعىپ, اكادەميا تابالدىرىعىن اتتاعان كەزەڭىنەن باستاۋ العان ەدى. سول وقۋ جىلدارىندا ەرتەڭگى كۇنى جەمقور قىلمىسكەرلەردى اشكەرەلەۋدە نە ىستەپ, نە قويۋ قاجەتتىگىن ءۇتىر, نۇكتەسىنە دەيىن شاعۋداي شاعىپ ۇيرەنىپ, ويلارى مەن بويلارىنا ءسىڭىرىپ الدى. ەندىگى مىندەت – مەملەكەت بەرگەن ءبىلىم مەن تاجىريبەنى حالىق يگىلىگى ءۇشىن جاراتا ءبىلۋ. بۇل تالاپ ۇردىسىنەن تابىلا العان جاس ماماننىڭ باعى ودان ءارى جانا تۇسەرى انىق, ال تابىلا الماسا, مەملەكەتتىڭ ءتورت جىل بويى باعىپ-قاققان, وقىتىپ-توقىتقان قارجىسىن قايتارىپ الۋعا قاقىسى بار. سوندىقتان وقالى كيىم كيىپ, يىقتارىنا قوس جۇلدىز تاققان, جۇرەكتەرىندە قۋانىش, كەۋدەلەرىندە سەنىم بار جاس ماماندارعا الدارىنا تاۋداي تالاپ جانە زور مىندەت قويىلىپ وتىرعانىن ەستەن شىعارماعاندارى ابزال.
ەرتەڭگى كۇندەرىنە بەك سەنىمدى 101 تۇلەكتىڭ 24-ءى ەلىمىزدىڭ كەدەن سالاسىنا بارىپ, قىزمەت ەتەدى دەپ كۇتىلۋدە. ولاردىڭ ءبارى دە مەملەكەتىمىزدىڭ ەكونوميكالىق قاۋىپسىزدىگىن قامتاماسىز ەتۋ ءۇشىن جۇمىس ىستەيتىن بولادى. ءسويتىپ, اكادەميا ازداعان جىلدار ىشىندە قۇقىق قورعاۋ ورگاندارى ءۇشىن قاجەتتى مامانداردى دايارلاپ شىعاراتىن وزىندىك بىرەگەي وقۋ ورنى ەكەنىن دالەلدەپ بەردى. سونىڭ ارقاسىندا تمد ەلدەرى ءبىلىم بەرۋ قىزمەتى رىنوگىندا تانىلىپ, جالپى, قۇقىق قورعاۋ جۇيەسىنىڭ مامانداندىرىلعان جوعارى وقۋ ورىندارى اراسىندا بەدەلدىلەرىنىڭ بىرىنە اينالدى. بۇل تۋرالى جاس تۇلەكتەردىڭ “قۇقىق قورعاۋ قىزمەتى” ماماندىعى بويىنشا كوپتەن كۇتكەن ديپلومدارىن تاپسىرۋعا كەلگەن ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى مەن قارجى پوليتسياسى اكادەمياسىنىڭ باسشىلىعى ايتىپ ءوتتى.
ءبىزدىڭ زاڭ جانە ەكونوميكا سالاسىنداعى مىقتى جانە بىلىكتى عالىمداردىڭ بىلىمدەرىمەن سۋسىنداعان تۇلەكتەرىمىز مەملەكەتىمىزدىڭ ەكونوميكالىق قاۋىپسىزدىگىن جانە قۇقىقتىق ءتارتىبىن ارتتىرۋ ءتيىمدىلىگىنە لايىقتى ۇلەس قوساتىنىنا سەنىم بىلدىرەمىز, – دەيدى قارجى پوليتسياسى اكادەمياسى باستىعىنىڭ مىندەتىن اتقارۋشى سەرىك شوقاتاەۆ.
الەكساندر تاسبولاتوۆ, استانا.