ەلىمىزدە سۋ تاپشىلىعى ماسەلەسىنىڭ جىلدان جىلعا كۇردەلەنىپ وتىرعانى راس. ەلىمىز الداعى شيرەك عاسىرعا جۋىق ۋاقىتتا سۋعا ءزارۋ مەملەكەتتەر قاتارىنا ەنۋى مۇمكىن دەگەندى ساراپشى-ماماندار قاشاننان بەرى ايتىپ كەلەدى. مەملەكەت باسشىسى قاسىم-جومارت توقاەۆ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىندا يرريگاتسيا جۇيەلەرى جانە جالپى سۋ شارۋاشىلىعى ماسەلەسىمەن مۇقيات اينالىسۋ قاجەتتىگىن اتادى.
ول سونىمەن قاتار گيدرولوگيا بەكەتتەرىن جوندەپ, جاڭعىرتۋ, سۋدى بارىنشا ۇنەمدەۋ جۇمىسىن ۇيىمداستىرۋ كەرەكتىگىن ايتتى. بۇل ەڭ الدىمەن, اۋىل شارۋاشىلىعىنا قاتىستى ماسەلە. ياعني سۋ ۇنەمدەۋ تەحنولوگياسىن اۋىل شارۋاشىلىعىندا كەڭىنەن قولدانۋدى, سۋ قورىن جيناپ, ونى ءتيىمدى پايدالانۋدى دۇرىس جولعا قويسا اتالعان سالاعا دا ينۆەستيتسيا تارتۋعا بولاتىنىن جەتكىزدى.
جالپى, بىزدەگى سۋ رەسۋرستارىنىڭ جارتىسىنا جۋىعى شەتەلدەن باستاۋ الىپ, 100-دەن اسا تەكشە شاقىرىم سۋدىڭ 50 پايىزى ەلدەن تىسقارى مەملەكەتتەردەن قۇيىلادى. وڭتۇستىك ءوڭىردىڭ ەگىستىك القاپتى سۋاراتىنىن, ءونىم وندىرەتىنىن, اۋىل شارۋاشىلىعىن دامىتىپ وتىرعانىن ەسكەرسەك, ولاردىڭ قانشالىقتى سۋعا زارۋلىگىن ۇعىناتىن كەز جەتتى. ءيا, ەلدەگى سۋدىڭ 65 پايىزى اۋىل شارۋاشىلىعىنا جۇمسالادى. الايدا سول سۋدىڭ جارتىسىنا جۋىعى تەحنيكالىق جاعدايى ەسكىرگەن كانالداردان ەگىستىككە جەتپەي جەرگە ءسىڭىپ كەتىپ جاتىر.
ەلىمىزدىڭ سۋ قاۋىپسىزدىگىن قامتاماسىز ەتۋ جانە سۋ تاپشىلىعىن شەشۋ ءۇشىن سۋ رەسۋرستارى جانە يرريگاتسيا مينيسترلىگىنىڭ 2024-2030 جىلدارعا ارنالعان كەشەندى جوسپارى بار. وندا سۋ رەسۋرستارىنىڭ كولەمىن 3,7 تەكشە شاقىرىمعا ارتتىرۋ, سۋارمالى سۋ شىعىنىن ازايتۋ, ونىڭ كولەمىن 3 تەكشە شاقىرىمعا جوعارىلاتۋ كوزدەلگەن. 55 مىڭنان اسا حالقى بار 41 ەلدى مەكەندى سۋمەن قامتاماسىز ەتۋگە, سونداي-اق ەلىمىزدىڭ كورشىلەس ەلدەردەن سۋ جەتكىزۋ بويىنشا تاۋەلدىلىگىن 25 پايىزعا ازايتۋعا مۇمكىندىك بەرەتىندىگى ايتىلعان.
سالاعا زاماناۋي تەحنولوگيالار تۋرالى ءبىلىمى بار, ەكونوميكالىق, ەكولوگيالىق تەپە-تەڭدىكتى ساقتاۋ شارتىمەن تانىس, سۋ ماسەلەسىنىڭ شەشىمىن كورۋگە قابىلەتتى, جان-جاقتى, بىلىكتى كادرلار كەرەك.
وسى ماسەلە ەسكەرىلىپ, بيىل ءال-فارابي اتىنداعى قازاق ۇلتتىق ۋنيۆەرسيتەتىندە سۋ ديپلوماتياسى ماماندىعى اشىلدى. بۇل – ەلىمىزدە, سونداي-اق ورتالىق ازيادا ەنگىزىلگەن العاشقى ءارى بىرەگەي ءبىلىم باعدارلاماسى نەگىزىندەگى باستاما. بۇگىنگى كۇننىڭ وزەكتىلىگىنە اينالعان سۋ ماسەلەسىن شەشۋدە ءارى تۇراقتى حالىقارالىق قاتىناس قۇرۋدا وسى ماماندىقتى تامامداعان جاستار بىلىكتى ساراپشى بولارى انىق.
ناريمان قىپشاقباەۆ,
سۋ شارۋاشىلىعى سالاسىنىڭ ارداگەرى