قارجىلىق مونيتورينگ اگەنتتىگى ۇلىتاۋ وڭىرىندە مارگانەتس رۋداسىن رۇقساتسىز وندىرۋگە, كەيىن ونى زاڭداستىرۋعا قاتىستى تەرگەۋدى اياقتاپ, ءىستى سوتقا جىبەرگەن. قىلمىس «قازاقستان عارىش ساپارى» اق-نىڭ اەروعارىشتىق سۋرەتتەرىنىڭ كومەگىمەن انىقتالعان, دەپ حابارلايدى Egemen.kz.
انىقتالعانداي, ءوڭىر تۇرعىنى 2020-2023 جىلدار ارالىعىندا رۇقسات قۇجاتتارىنسىز ۇلىتاۋ وبلىسىنداعى «ۆوستوچنىي كارەرىنەن» مارگانەتس رۋداسىن زاڭسىز وندىرۋمەن اينالىسقان.
جەر قويناۋىن ءوز بەتىنشە پايدالانۋ فاكتىلەرىن تەرگەپ-تەكسەرۋ بارىسىندا كارەر ورنالاسقان جەر ۋچاسكەسىن پايدالانۋ جونىندەگى رۇقسات قاعازى ۋاكىلەتتى ورگانداردان بەرىلمەگەنى, سونداي-اق جوعارىدا اتالعان ازاماتتىڭ ءتيىستى تىركەۋى جوق ەكەنى بەلگىلى بولعان.
«كەيىننەن كۇدىكتى جالعان شوت-فاكتۋرالاردى جازىپ, زاڭسىز وندىرىلگەن مارگانەتس رۋداسىن زاڭداستىرىپ, رەسپۋبليكا بويىنشا جانە وزگە مەملەكەتتەرگە وتكىزگەن. مەملەكەتكە 1 ملرد تەڭگەدەن استام شىعىن كەلتىرىلگەن. زاڭسىز وندىرىلگەن كەن كولەمى 16 مىڭ توننانى قۇراپ, جالپى سوماسى 3 ملرد تەڭگەدەن اسادى», دەپ حابارلادى قارجىلىق مونيتورينگ اگەنتتىگىنىڭ ءباسپاسوز قىزمەتى.
اتالعان قىلمىستى جاساعان ادامنىڭ 337 ملن تەڭگەلىك جىلجىمالى جانە جىلجىمايتىن مۇلكى تاركىلەنگەن.