كوگىلدىر ساعىمعا ورانعان كوكشەتاۋ اتىرابى سەن تۇر, مەن اتايىن دەيتىندەي ونەرلى ازاماتتاردىڭ سايىسىنا كۋا بولىپ, كوڭىل دەمدەدى. جاستاردىڭ بويىندا ەر جىگىتكە جاراسار قاسيەت بار ەكەن.
بۇل جولى وبلىستىق اكىمدىكتىڭ قولداۋىمەن وتكەن ايماقتىق «جىگىت سۇلتانى» بايقاۋى اقمولا وبلىسىنىڭ – 85, ءبىرجان سالدىڭ – 190, بالۋان شولاقتىڭ – 160, راقىمجان قوشقارباەۆ پەن كوكەن شاكەەۆتىڭ 100 جىلدىعىنا ارنالدى. تاعىلىمى مول شارانى تاماشالاۋعا كەلگەن كوزى اشىق, كوكىرەگى وياۋ جۇرتشىلىق الاشتىڭ اسىپ تۋعان ازاماتتارىنىڭ ءومىر جولىنان ونەگە الىپ, تىرشىلىكتەگى ءتالىمدى ىستەرىن تاعىلىم قىلدى دەسەك, ارتىقتىعى جوق. وسى تۇرعىدان العاندا پاۆلودار, سولتۇستىك قازاقستان وبلىستارىنىڭ بىرقاتار اۋدانىنان كەلگەن ورىمدەي جاستاردىڭ قاتىسۋىمەن وتكەن بايقاۋ وتە تارتىستى بولدى.
ەكى كەزەڭنەن تۇراتىن «جىگىت سۇلتانى» ايماقتىق بايقاۋىنا قاتىسۋشىلار ۇلى دالا سەرىلەرىنىڭ بويىنداعى قاسيەتتەرىن پاش ەتتى. كىلەڭ قاقپاق جاۋىرىندى, ونەرى ورلەپ تۇرعان, سايدىڭ تاسىنداي جاستار كورەرمەندەردى ءتانتى ەتتى. بايقاۋ شارتى بويىنشا ءبىرىنشى كەزەڭدە جىگىتتەر وزدەرىن كوركەم سوزبەن كەستەلەپ, ولەڭمەن ءورىپ, تانىستىرىپ شىقتى. ارقانىڭ ءداستۇرلى ءان مەكتەبىنىڭ شوق جۇلدىزدارى ءبىرجان سال, بالۋان شولاقتىڭ اسەم اندەرىن ورىنداپ, حالىقتىڭ ءان قازىناسىن جاقۇتتاي جارقىراتىپ, كورسەتە ءبىلدى. ەكىنشى كەزەڭدە جامبى اتۋ, اۋدارىسپاق, گىر كوتەرۋ, قازاق كۇرەسى ءتارىزدى ۇلتتىق سپورتتىق سايىستاردا دا شەبەرلىكتىڭ شىڭىنا شىققان ورەندەر ەكەنىن ايگىلەدى.
قازىلار القاسىنىڭ شەشىمى بويىنشا ايماقتىق «جىگىت سۇلتانى» بايقاۋىنىڭ باس جۇلدەسىنە استانالىق ءالي ريزابەك لايىقتى دەپ تانىلدى. وزگە اتالىمدار بويىنشا زەرەندىلىك حامزا ايدىن, ەگىندىكول اۋدانىنان كەلگەن تاتتىمبەك ايبەك, ساناح ەركەبۇلان, كراسنويار سەلوسىنىڭ وكىلى ىسقاق ايبەك ماراپاتتالدى.
كوكشەتاۋ