استانا قالاسى اكىمدىگىنىڭ ءازىربايجان مامبەتوۆ اتىنداعى مەملەكەتتىك دراما جانە كومەديا تەاترى ءVIى تەاتر ماۋسىمىنىڭ شىمىلدىعىن ش.ايتماتوۆتىڭ «بوراندى بەكەت» دراماسىمەن اشتى. سپەكتاكلدىڭ قويۋشى رەجيسسەرى – ۇلانمىرزا قارىپباەۆ.
قازاقستاننىڭ حالىق قاھارمانى, كسرو جانە قازاقستاننىڭ حالىق ءارتىسى, كسرو مەملەكەتتىك سىيلىعىنىڭ لاۋرەاتى رەجيسسەر ءازىربايجان مامبەتوۆتىڭ 90 جىلدىعىنا ارنالىپ قويىلعان سپەكتاكلدىڭ كورەرمەنىنە ايتارى مول. ءبىرتۋار رەجيسسەردىڭ قايتالانباس سۋرەتكەرلىك قولتاڭباسى ارقىلى ەڭ العاش قازاق كورەرمەنىنە جەتكەن ايتۋلى تۋىندى جاڭا عاسىرمەن بىرگە جاستاردىڭ جاڭاشىل قوزقاراسى نەگىزىندە تەاترسۇيەر قاۋىممەن قايتا قاۋىشىپ وتىر.
ءار تۋىندىسى الەمگە ايگىلى بولعان شىڭعىس ايتماتوۆتىڭ «عاسىردان دا ۇزاق كۇن» رومانى – تاعدىردىڭ تارامىس جولدارىن سۋرەتتەگەن عاسىرلىق تۋىندى. ءبىر بويىنا بوراندى بەكەت, سارىوزەك, ەل ءىشى, جەر پلانەتاسى سىندى بىرنەشە اۋقىمدى كەڭىستىكتى سىيدىرىپ تۇرعان شىعارمانىڭ كورەرمەنىن تولعانتاتىن تۇسى كوپ. وسى كەڭىستىكتەردىڭ توعىسىندا جازۋشى قالامىنان باس كەيىپكەر بوراندى ەدىگەنىڭ كەسكىنى قالىپتاسقان. «بوراندى بەكەت» قويىلىمىندا قازانعاپتىڭ اقتىق اماناتى ورىندالا ما؟ عاسىرعا تاتىعان ءبىر كۇندىك جاۋاپتى ساپاردىڭ ناتيجەسى قانداي بولماق؟
مىنە, وسى ساۋالدارعا جاۋاپ ىزدەگەن قويىلىم كورەرمەنىن دە بەيجاي قالدىرمايدى. ساحنا كورگەن كۇنىنەن باستاپ-اق تالاي تەاتر فەستيۆالىندە توپ جارىپ, قانجىعا مايلاعان سپەكتاكلدىڭ سۋرەتكەرلىك تۇرعىدا ساراپتالۋى كوڭىلگە قۇرمەت ورنىقتىردى. جازۋشى شىڭعىس ايتماتوۆتىڭ كلاسسيكالىق تۋىندىسىن بۇگىنگى كۇنمەن ءساتتى بايلانىستىرىپ, وزەكتىلىگى وتكىرىلەنە تۇسكەن قوعام تۇيتكىلدەرىن تەاتر تىلىندە شەبەر جەتكىزە بىلگەن رەجيسسەر ۇلانمىرزا قارىپباەۆ پەن تەاتر ارتىستەرىنىڭ ىزدەنىسى كورەرمەننىڭ قويىلىمدى لايىقتى دەڭگەيدە قابىلداپ, قورىتۋىنا تاماشا مۇمكىندىك سىيلادى.
ءازىربايجان مامبەتوۆ اتىنداعى تەاتردىڭ كورنەكتى رەجيسسەر مۇراتىنا, مامبەتوۆ مەكتەبىنە ادال بولىپ, تۇلعا ەسىمىن جاڭعىرتۋ جولىندا جاساعان تابىستى جۇمىسىنا تەك قانا قوشەمەت بىلدىرەمىز.