بيىل الەۋمەتتىك مەديتسينالىق ساقتاندىرۋ قورىندا قارجىلىق ماسەلەلەر تۋىندادى. مۇنىڭ سالقىنى قوردان قارجى الىپ وتىرعان مەديتسينالىق ۇيىمداردى دا اينالىپ وتپەدى. قازىر قور باسشىلىعى مەن جەرگىلىكتى ۇيىمدار جاعدايدى ەسكەرە وتىرىپ, قارجىنى ۇنەمدەۋ جاعىن دا ويلاستىرىپ جاتىر.
الەۋمەتتىك مەديتسينالىق ساقتاندىرۋ قورىنىڭ باسقارما توراعاسى ابىلقايىر سقاقوۆ دەنساۋلىق ساقتاۋ مينيسترلىگىنىڭ قوعامدىق كەڭەسىندە قارجىلاندىرۋعا قاتىستى قالىپتاسقان ءمان-جايدى اشىپ ايتىپ بەردى. سپيكەر 8 ايدا قوردىڭ نەگىزگى باعىتتارى بويىنشا ىسكە اسقان جۇمىستىڭ قورىتىندىسىن جاساپ, قىسقامەرزىمدى جوسپار تۋرالى مالىمدەدى. ەسەپتى كەزدەسۋگە دەنساۋلىق ساقتاۋ ءمينيسترى اقمارال ءالنازاروۆا دا قاتىستى.
الەۋمەتتىك مەديتسينالىق ساقتاندىرۋ قورى – مەديتسينالىق قىزمەتتەردىڭ ستراتەگيالىق ساتىپ الۋشىسى ءارى تولەۋشىسى بولعاندىقتان, ابىلقايىر سقاقوۆ جىل باسىنان بەرى مەديتسينالىق كومەكتى ساتىپ الۋ قورىتىندىسى مەن ونى مەديتسينالىق ۇيىمدارعا ءبولۋ بارىسى تۋرالى ايتتى. بيىل قوردا ساتىپ الۋ ويداعىداي, بارىنشا اۆتوماتتى تۇردە وتسە دە, قارجىلاندىرۋعا قاتىستى تۋىنداعان ماسەلەلەر بار.
«تاپشىلىقتى ايتار بولساق, باستاپقى قارجىلاندىرۋ بويىنشا – 116 ملرد جانە بۇرىننان كەلە جاتقانى – 571 ملرد تەڭگە شاماسىندا. ءبىز دەنساۋلىق ساقتاۋ مينيسترلىگىمەن, جەرگىلىكتى اتقارۋشى ورگاندارمەن بىرگە قارجىلىق تۇراقتىلىق جوسپارىن بەكىتتىك جانە قاراجاتتى ۇنەمدەۋگە باعىتتالعان ءىس-شارالاردى قابىلدادىق. قازىر داعدارىس بويىنشا تاپشىلىقتىڭ 70%-ى جابىلدى. الايدا جىل سوڭىنا دەيىن قاراجات تاپشىلىعى تۇبەگەيلى جاقسارماسى انىق. اقشالاي وتىمدىلىكتىڭ بولماۋى – دەنساۋلىق ساقتاۋ مينيسترلىگىنە نەمەسە قورعا بايلانىستى ەمەس وبەكتيۆتى فاكتور. جىل سوڭىنا دەيىن ۋاقتىلى تولەمدەر بولماۋى مۇمكىن», دەپ اتاپ ءوتتى باسقارما توراعاسى.
بۇگىندە قوردا قاراجات تاپشىلىعى شىعىنداردى جانە قور قابىلداعان مىندەتتەمەلەردى وڭتايلاندىرۋ ەسەبىنەن دە شەشىلىپ جاتىر. وسىلايشا, قور اسا ماڭىزدى كومەك تۇرلەرى بويىنشا قارىز سوماسىن 116 ملرد تەڭگەدەن 27 ملرد تەڭگەگە دەيىن ازايتا الدى. سونىمەن بىرگە قوردا مەديتسينالىق قىزمەتتەردىڭ تاريفتەرىن جەتىلدىرۋ جۇمىستارى تولاستاعان جوق. بەس باعىت بويىنشا تاريفتەر قايتا قارالىپ, كۇشىنە ەنگەن. تاعى توعىز باعىت بويىنشا جۇمىس وسى ايدا اياقتالادى.
ءا.سقاقوۆ مەديتسينالىق ۇيىمداردى باقىلاۋ ناتيجەلەرى, ءمامس قامتۋ اياسىن كەڭەيتۋ, قوردىڭ اعىمداعى جۇمىسى جانە كادرلىق ساياساتى تۋرالى دا ەسەپ بەردى. سونىڭ ىشىندە تسيفرلاندىرۋعا قاتىستى ماسەلەلەر ءسوز بولىپ, قور باسشىسى كەڭەس مۇشەلەرىنە احۋالدىق-تالدامالىق ورتالىقتىڭ جۇمىسىن تانىستىردى. «Saqtandyru» اقپاراتتىق جۇيەسى تۋرالى حابارلادى. دەنساۋلىق ساقتاۋ ءمينيسترى اقمارال ءالنازاروۆا تسيفرلاندىرۋعا قاتىستى ماسەلەلەردى رەتتەۋدىڭ ماڭىزىنا توقتالدى.
– مەملەكەت باسشىسى تسيفرلاندىرۋدىڭ جەتىلمەگەنىن ايتىپ, بىرنەشە مىندەت جۇكتەدى. بۇگىندە سالانىڭ تسيفرلىق ترانسفورماتسياسى بويىنشا جول كارتاسى بەكىتىلدى. مەملەكەت باسشىسىنىڭ قولداۋىمەن رەسپۋبليكالىق ەلەكتروندى دەنساۋلىق ساقتاۋ ورتالىعى دەنساۋلىق ساقتاۋ مينيسترلىگىنە قايتا بەرىلدى. بۇل جۇيەنى جەتىلدىرۋ ماسەلەلەرىن تەزىرەك شەشۋگە مۇمكىندىك بەرەدى دەپ ويلايمىن, – دەدى مينيستر.
دەنساۋلىق ساقتاۋ مينيسترلىگى قوعامدىق كەڭەس توراعاسى نادەجدا پەتۋحوۆا قوردا احۋالدىق-تالدامالىق ورتالىقتىڭ ىسكە قوسىلۋى سالانىڭ تيىمدىلىگىن ارتتىرىپ, مەديتسينالىق قىزمەتتەردىڭ ساپاسىن جاقسارتۋعا سەپتەسەتىنىن ايتتى.
– قور تۇراقسىز قارجىلىق جاعدايدا جۇمىس ىستەۋگە ءماجبۇر. ءبىز قوردىڭ مەديتسينالىق ۇيىمداردىڭ جۇمىسىنا, قارجىلاندىرۋ ادىستەرىنە, ولاردى باقىلاۋ بويىنشا ناقتى تۇسىنىگى, ۇستانىمى بار ەكەنىن كوردىك. قور دەنساۋلىق ساقتاۋ مينيسترلىگىمەن بىرگە ورتاق ماقساتتارعا جەتۋگە ۇمتىلاتىنىن بايقاتىپ وتىر. راسىندا, دەنساۋلىق ساقتاۋ سالاسىنداعى ماسەلەلەردى رەتتەۋگە كەلگەندە بىرلەسىپ تىندىرعان ءىس ناتيجەسىن بەرەدى, – دەيدى ن.پەتۋحوۆا.
قوعامدىق كەڭەستە الەۋمەتتىك مەديتسينالىق ساقتاندىرۋ قورىنىڭ باسقارما توراعاسى ءا.سقاقوۆ كەلەر جىلدىڭ جۇمىس جوسپارى تۋرالى دا باياندادى. اشىقتىق پەن ەسەپتىلىك قاعيدالارىنا نەگىزدەلگەن جوسپار مەديتسينالىق قىزمەتتەردىڭ بىرىڭعاي ساتىپ الۋشىسى مەن تولەۋشىسى رەتىندەگى باسىمدىقتار بويىنشا ناقتى قادامداردى قامتيدى.