كەرەكۋ قالاسىنداعى ء«ماشھۇر ءجۇسىپ» ورتالىق مەشىتىندە قمدب-نىڭ ۇيىمداستىرۋىمەن قۇران كارىمدى جاتقا جانە مانەرلەپ وقۋدان ءحىىى رەسپۋبليكالىق بايقاۋى ءوتتى.
80 ۇمىتكەر قاتىسقان بايقاۋدا ۇمىتكەرلەر قۇراندى مانەرلەپ وقۋ, 10 پارا, 20 پارا, 30 پارا سىندى ءتورت اتالىم بويىنشا ءوزارا كىم مىقتىنى انىقتادى. «قازاق – ەرتەدەن قۇران دەسە قۇلاعى ءتۇرۋلى تۇراتىن, اللانىڭ ءسوزىن قۇرمەت تۇتاتىن حالىق. كىمنىڭ ۇيىنە بارساڭىز دا تورىندە قۇران ءىلۋلى تۇرادى, ال ونى بىرەۋ وقىسا, ۇيىپ تىڭدايدى. ەلىمىزدە جىل ساناپ قاريلارىمىزدىڭ قاتارى ارتىپ كەلەدى. وسى بايقاۋدى وتكىزۋگە دەمەۋشى بولعان باحاريدين نۇعمان ۇلىنا, سادۋاقاس ولجاباەۆ قاريىمىز باستاعان ادىلقازى مۇشەلەرىنە العىسىمدى بىلدىرەمىن», دەدى ءىس-شاراعا ارنايى قاتىسقان باس ءمۇفتي ناۋرىزباي قاجى تاعان ۇلى.
ەكى كۇنگە سوزىلعان جارىس ناتيجەسىندە جەڭىمپازدار مەن جۇلدەگەرلەر انىقتالىپ, قوماقتى قارجىلاي, زاتتاي سىيلىقتارعا يە بولدى. اتاپ ايتقاندا, قازىلار القاسىنىڭ شەشىمىمەن «مانەرلەپ وقۋ» سايىسىندا اتىراۋلىق سالامات يمانعاليەۆ, 10 پارا بويىنشا استانالىق دىنمۇحامەد ابىشەۆ, 20 پارا بويىنشا قاراعاندىلىق ارسەن ەسىمبەك, ال 30 پارا, ياعني قۇراندى تولىق وقۋ بويىنشا الماتىلىق ابىلقايىر جۇبان جەڭىمپاز دەپ تانىلدى.
باس جۇلدەنى جەڭىپ العاندار مەن جۇلدەگەرلەردىڭ بارىنە 300 مىڭ تەڭگەدەن 4 ملن تەڭگەگە دەيىن قارجىلاي سىياقى تابىس ەتىلدى. ال قۇراندى تولىق جاتتاۋدان الدىنا جان سالماعان ابىلقايىر جۇبان «Haval» ماركالى اۆتوكولىكتى تاقىمىنا باستى.
ەسكە سالا كەتسەك, رەسپۋبليكالىق بايقاۋعا قاتىسۋعا الدىمەن ءار وڭىردە وبلىستىق ىرىكتەۋ جارىستارى ۇيىمداستىرىلعان بولاتىن. مۇنداي قۇران جارىستارىن ەلىمىزدە جىل سايىن وتكىزۋ جاقسى داستۇرگە اينالعان.