اگرارلى ءوڭىردىڭ اۋەلگى تابىس كوزى جەردەن باستاۋ الادى. ءتاتتى تۇبىردەن باستاپ, مال شارۋاشىلىعى, تۋريزم جانە وندىرىسپەن اينالىسۋعا بەيىل كاسىپكەرلەر ارتىق جەرگە قول جەتكىزە الماي ءجۇر. سوندىقتان جەرگە كونكۋرستى اشىق ءارى ءادىل وتكىزۋ ءۇشىن وڭىردە «زاڭ بويىنشا جەر» قاناتقاقتى جوباسى قولعا الىنباق. بۇل جەردە ءاربىر كاسىپ يەسى قۇجاتتاردى ونلاين تاپسىرىپ, بايقاۋدى سىرتتان باقىلاپ وتىرادى.
مەملەكەت باسشىسى حالىققا ارناعان جولداۋىندا جەر اۋىل شارۋاشىلىعى سالاسىنا ينۆەستيتسيا تارتۋدىڭ باستى كەپىلى ەكەنىن, ونى ءتيىمدى پايدالانۋدىڭ ماڭىزىن ەرەكشە اتاپ وتكەن ەدى. وسى ورايدا جەتىسۋ وبلىسىندا «زاڭ بويىنشا جەر» قاناتقاقتى جوباسى ىسكە اسىرىلا باستايدى. اۋىل شارۋاشىلىعى جەرلەرىن ءبولۋدىڭ بارلىق ۇدەرىسى تسيفرلاندىرىلعان بۇل جوبانى ادىلدىك پەن اشىقتىقتى قامتاماسىز ەتۋ ماقساتىندا وبلىستىق پروكۋراتۋرا جەر قاتىناستارى باسقارماسى بىرلەسىپ قولعا العان.
جوبا رەسپۋبليكادا ءبىرىنشى بولىپ الداعى قاراشا ايىندا سارقان اۋدانىندا جۇزەگە اسىرىلماقشى. ول ءوز تيىمدىلىگىن كورسەتسە, كەلەسى جىلدان باستاپ بارلىق ەل اۋماعىندا ىسكە قوسىلادى دەپ جوسپارلانعان. وسى رەتتە جەتىسۋ وبلىستىق جەر قاتىناستارى باسقارماسىنىڭ باسشىسى ەرمەك اپەكوۆ قاناتقاقتى رەجىمدەگى كونكۋرستى وتكىزۋدىڭ ەرەكشەلىكتەرى تۋرالى كەڭىنەن ءتۇسىندىرىپ بەردى.
«جەرگىلىكتى جەردە كەمى 5 جىل تۇرعان ازاماتتار مەن كاسىبىن باستاعانىنا ءۇش جىلدان اسپاعان كاسىپكەرلەرگە ارتىقشىلىق بەرىلەدى. وعان قوسا ەگىستىك جەرلەر ءۇشىن تەحنيكالارىنىڭ قۋاتتىلىعى, جايىلىم جەرلەر ءۇشىن مال باسىنىڭ سانى, سونىڭ ىشىندە تەحنيكا مەن مالدىڭ كەمىندە 12 اي بۇرىن تىركەلگەندىگى ەسەپكە الىنادى. ءتىپتى شارۋاشىلىقتاعى قىزمەتكەرلەر سانى, ولاردىڭ زەينەتاقى مەن سالىق اۋدارىمدارىنىڭ بولۋى دا ەسكەرىلەدى. وسىنىڭ بارىنە بەلگىلى دەڭگەيدە ۇپاي بەرىلەدى. بۇل تۇپتەپ كەلگەندە اۋىل شارۋاشىلىعىن ءتيىمدى دامىتۋعا باعىتتالىپ وتىر», دەيدى ە.اپەكوۆ.
باسقارما باسشىسىنىڭ ايتۋىنشا, ەلەكتروندى كونكۋرستىڭ وتكىزىلۋ ۇدەرىسىنە جەرگىلىكتى اتقارۋشى ورگاننىڭ قىزمەتكەرلەرى قاتىسپايدى. سونداي-اق وندا بۇرىنعىداي ينۆەستيتسيا كولەمى ەسكەرىلمەيدى. وعان قوسا ءىرى جەر كولەمىنىڭ ءبىر قولدا شوعىرلانۋىنا دا جول بەرمەۋ قاراستىرىلعان. سونداي-اق كونكۋرسقا قاتىسۋشىلار ءتۇرلى انىقتاما مەن قۇجات جيناپ اۋرەلەنبەيدى, سەبەبى تسيفرلىق جۇيە اۋىل شارۋاشىلىعى, ادىلەت, قارجى, ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ دەرەكتەر بازاسىمەن ينتەگراتسيالانعان.
قازىرگى قولدانىستاعى كونكۋرس تىكەلەي كوميسسيا مۇشەلەرىنىڭ قاتىسۋىمەن, ياعني ادام قولىمەن اتقارىلاتىندىقتان, وندا جەمقورلىق تاۋەكەلدەرى جوق دەي المايمىز دەيدى وبلىستىق پروكۋراتۋرا وكىلدەرى. ولار تالداۋ بارىسىندا اۋىل شارۋاشىلىعى جەرلەرىن ءبولۋ ماسەلەسى قوعامدا ءجيى كوتەرىلەتىنىن انىقتاعان.
«بۇل ورايدا ءبىز جەر قاتىناستارى باسقارماسىمەن بىرىگىپ, كونكۋرس وتكىزۋدىڭ تسيفرلىق جۇيەسى جوباسىنا كىرىستىك. بۇل جەردى ءبولۋدىڭ ەسكىرگەن تاسىلىنەن باس تارتىپ, ونى تولىق اۆتوماتتاندىرۋعا قول جەتكىزۋگە باعىتتالعان. كونكۋرسقا رەيتينگتىك-بالدىق جۇيە ەنگىزىلىپ, ونىڭ قورىتىندىسى ادامنىڭ قاتىسۋىنسىز بىردەن جاريالانادى. بۇل ەنگىزىلگەن جاڭاشىلدىق جەمقورلىقتىڭ الدىن الۋعا, بيزنەسىن جاڭا باستاعان جانە الەۋمەتتىك باعىتتاعى كاسىپكەرلەردى قولداۋعا, بيزنەس وكىلدەرىنىڭ ءوز ءىسىن اشىق جۇرگىزۋىن ىنتالاندىرۋعا, شارۋا قوجالىقتارىندا ىستەيتىن جۇمىسشىلاردىڭ قۇقىعىن قورعاۋعا وڭ ىقپالىن تيگىزەدى دەگەن سەنىمىمىز بار», دەدى وبلىستىق پروكۋراتۋرانىڭ قوعامدىق مۇددەلەردى قورعاۋ باسقارماسى باستىعىنىڭ ورىنباسارى ب.ەرۇزاقوۆ.
اتاپ وتسەك, جەر كودەكسىنە سايكەس وبلىستا نىسانالى ماقساتى مەن پايدالانىلۋ رەجىمi بويىنشا جەر اۋماعى 7 ساناتقا تولىققاندى بولىنگەن العاشقى ايماق سارقان اۋدانى بولعاندىقتان, قاناتقاقتى جوباعا قاتىسۋشى رەتىندە تاڭدالىنىپ وتىر. جەردى اۋماقتارعا ءبولۋ قازىر تاعى 4 اۋداندا – اقسۋ, كوكسۋ, ەسكەلدى, كەربۇلاق اۋداندارىندا جۇرگىزىلىپ جاتىر.
جەتىسۋ وبلىسىندا جىل باسىنان بەرى جەر بولۋگە قاتىستى 28 كونكۋرس وتكىزىلگەن. وعان 659 ادام قاتىسىپ, ولارعا 84 مىڭ گەكتاردان استام جەر ءبولىنىپ بەرىلگەن.
جەتىسۋ وبلىسى