كەشە وردو سپورتىنىڭ توپتىق كەزەڭىندە ونەر كورسەتكەن قۇراما ۇزدىكتەرى جارىستى ءساتتى باستادى. سپورتتىڭ بۇل ءتۇرى قىرعىز حالقىنىڭ اسىقپەن وينايتىن ۇلتتىق ويىنى سانالادى. ءار كوماندانىڭ قۇرامىندا 8 ويىنشىدان بولادى. ويىن ەرلەر اراسىندا تەگىس جەردە وتەدى. مۇندا شەڭبەردىڭ ديامەترى 12 مەتر بولسا, ويىنشىلار اسىقتى سول شەڭبەردەن شىعارۋعا ءتيىس. وي̆ىننىڭ ۇزاقتىعى 2 ساعاتقا دەيىن سوزىلادى.
ويىن قىرعىزدىڭ «وردو ويۋنۋ» سپورت فەدەراتسياسىنىڭ قولدانىستاعى ەرەجەلەرىنە ساي̆كەس وتەتىنى الدىن الا حابارلاندى. بۇل كۇنى ءبىزدىڭ قۇراما سپورتشىلارى ب توبىندا ونەر كورسەتىپ, العاشقى ويىنىن چەحيا قۇراماسىنا قارسى وتكىزدى. سول كەزدەسۋدە اسىقشىلار قارسىلاستارىن ايقىن باسىمدىقپەن جەڭىپ, قارىمىن بىردەن كورسەتتى. اقتىق سىنعا وتۋگە ءۇمىتتى ەكەنىن بايقاتتى. ۇلتتىق قۇراما سپورتشىلارى ەكىنشى كەزەڭدە موڭعوليا سپورتشىلارىن دا ويسىراتا جەڭدى. وسىلايشا, اسىقشىلار توپتىق كەزەڭنەن وڭاي ءوتىپ, فينالعا جولداما الدى. ەندى اقتىق ويىن بۇگىن «الاۋ» كەشەنىندە وتەدى.
وۆاري سپورتىنان اسەل داليەۆا مەن اڭساعان قوجاناسىپ قورجىنعا مەدال سالدى. وزىق ويلىلاردىڭ تارتىسىندا سپورتشىلاردىڭ ءبىرى – التىن, ەكىنشىسى – قولا جۇلدە جەڭىپ الدى.
وۆاري – باتىس افريكا حالىقتارىنىڭ زياتكەرلىك وي̆ىنى. سىرتتان باقىلاعان ادام ويىننىڭ ءتۇرىن ءوزىمىزدىڭ توعىزقۇمالاققا ۇقساتاتىنى انىق. ويىندى ەكى ادام وي̆ناي̆دى. وي̆ىننىڭ ءوزى تاقتانىڭ ەكى قاتارىندا ورنالاسقان التى بىردەي̆ شۇڭقىرشامەن بايلانىستى. تاقتادا باس-اياعى 12 كىشكەنتاي̆ شۇڭقىرشا بولادى. بۇدان بولەك وي̆ىنشىلاردا تاستاردى جيناي̆تىن تاعى ۇلكەن جيناقتاۋشى شۇڭقىرشالار بولادى. زياتكەرلىك ويىندى سپورتشىلار 48 شارمەن وي̆نايدى. ياعني تاقتانىڭ ءوز جاعىنداعى التى كىشكەنتاي̆ شۇڭقىرشا وي̆ىنشىنىڭ ءوز الاڭى, ال قاراما-قارسى التى شۇڭقىرشا ساي̆كەسىنشە – قارسىلاستىڭ الاڭى. وي̆ىنشىلار ءوز قوي̆ماسىندا مۇمكىندىگىنشە كوپ شار جيناۋعا تىرىسادى. كىم كوپ شار جيناسا, سول وي̆ىنشى جەڭىسكە جەتەدى.
سونىمەن باتىس افريكا حالىقتارىنىڭ زياتكەرلىك ويىنىندا ايەلدەر اراسىندا سىنعا تۇسكەن ەكى سپورتشى دا جۇلدەگەر بولدى. التىن العان اسەل داليەۆا – قىزىلوردانىڭ تۋماسى, ەڭبەك سىڭىرگەن سپورت شەبەرى. توعىزقۇمالاقتى 9 جاسىنان وينايدى. توعىزقۇمالاقتان الەمنىڭ, ەلدىڭ بىرنەشە دۇركىن چەمپيونى دەگەن اتاعى تاعى بار. اڭساعان قوجاناسىپ تە قاراجاياۋ ەمەس, توعىزقۇمالاقتان حالىقارالىق دارەجەدەگى سپورت شەبەرى. ارۋلارىمىز بۇل جولى توعىزقۇمالاقتان عانا ەمەس, وۆاري زياتكەرلىك ويىنىنان دا مىقتىلىعىن دالەلدەدى.