اۋستراليا – چەمپيون

سونىمەن جارىس جولىنا يسپانيا, يتاليا, سينگاپۋر, سلوۆاكيا, قىرعىزستان, ين­دونەزيا, موڭعوليا, اۋستراليا, وڭتۇستىك كورەيا, وزبەكستان, ماجارستان, فران­تسيا, رۋمىنيا, رەسەي, تۇركيا جانە قازاقستان قۇرامالارى شىقتى. ءار كوماندادا 3 ەر, 2 ايەل بولدى.

قازىرگى تاڭدا ءداستۇرلى ساداق اتۋ ونەرىن الەمنىڭ كوپتەگەن ەلىندە بەل­سەندى ۇيرەنىپ, يگەرىپ جاتىر. بۇرىن كوشپەلى بولعان مەملەكەتتەر عانا ەمەس, «كوشپەلىلىكتىڭ» ءيىسىن دە سەزبەگەن حالىقتاردىڭ بۇگىنگى ۇرپاقتارى ساداق تارتقاندا الدىنا جان سالمايتىن بولعان. ءبىز مۇنى وسى كۇنگى جارىس كەزىندە تاعى دا بايقادىق.

ويتكەنى كوماندالىق ايقاستار وتە تارتىستى ءوتتى. ءبىر-بىرىنەن اسىپ ءتۇسىپ جاتقان ساداقشىلاردىڭ اتقان جەبەلەرى ءمۇلت كەتپەي, نىسانانى ءدال كوزدەپ جاتتى. وسىلايشا, مىقتىلار ىرىكتەلە كەلىپ, جارتىلاي فينالعا ءتورت قۇراما سۋىرىلىپ شىقتى. ولار – يسپانيا, رەسەي, اۋستراليا جانە قازاقستان كوماندالارى.

جارتىلاي فينالدىق سىندا اۋس­تراليا مەن قازاقستان قۇرامالارى يسپانيا مەن رەسەيدى جەڭىپ, فينالعا جولداما الدى. ودان ءارى 3-ورىن ءۇشىن بولعان تارتىستى باسەكەدە رەسەيدىڭ باعى جانىپ, كوشپەلىلەر ويىندارىنىڭ قولا جۇلدەگەرى اتاندى.

ءداستۇرلى ساداق اتۋ ءتۋرنيرىنىڭ سوڭعى باسەكەسى قازاقستان مەن اۋستراليا ساداقشىلارى اراسىندا ءوتتى. ولىسپەي بەرىسپەيمىز دەپ بىلەك سىبانا ىسكە كىرىسكەن ەكى ەل سپورتشىلارى دا بار ونەرىن ورتاعا سالىپ باقتى. دەگەنمەن سپورتتا جەڭىسپەن قاتار جەڭىلىس تە قاتار جۇرەتىنى بەلگىلى. جەرگىلىكتى جانكۇيەرلەردىڭ جاپپاي قولداۋى مەن تىلەگىنە قاراماستان قازاق ساداقشىلارى اۋستراليالىقتارعا جول بەرۋگە ءماجبۇر بولدى. سونىمەن اۋستراليا – چەمپيون, قازاقستان – كۇمىس, رەسەي – قولا جۇلدەگەر.

سايىس اياقتالا سالا ءبىز جەڭىسكە جەتكەن اۋستراليا ساداقشىلارىنىڭ جانىنا بارىپ, التىن مەدالدارىمەن قۇتتىقتاپ, وسى جارىستان العان اسەرلەرىن بىلگەن ەدىك. «بۇگىنگى سىندا چەمپيون بولىپ, ەلىمە التىن مەدال سىيلاپ جاتقانىما ءوزىمدى وتە باقىتتى سەزىنىپ تۇرمىن, دەدى اۋستراليا قۇراماسىنىڭ مۇشەسى ۋبەيت يىلدىز. – ماعان قازاقستان دا, استانا دا قاتتى ۇنادى. وسىندا جۇرگەنىمە ءبىر اپتا بولدى. قازى-قارتا سەكىلدى قازاق تاعامدارىنىڭ ءدامىن تاتىپ كوردىم. ولاردى دا ءبىر جەگەننەن جاقسى كورىپ قالدىم».

التىن مەدال يەگەرى وسىعان دەيىن تۇركيادا وتكەن ءىV دۇنيەجۇزىلىك كوشپەلىلەر ويىندارىنا دا قاتىسقان ەكەن. الايدا بيىلعى ويىندار بۇرىن­عىعا قاراعاندا الدەقايدا كەڭ كولەمدە ءوتىپ جاتقانىن, ۇيىمداستىرۋ دەڭگەيى جوعارى بولعانىن ايتادى. «ەگەر تاعى دا قازاقستانعا كەلۋگە مۇمكىندىك بولسا, سىزدەردىڭ ادەمى ەلدەرىڭىزگە ءالى دە تابان تىرەيتىن بولامىن» دەپ ءسوزىن اياقتادى.

ەسكە سالا كەتسەك, بۇگىن – V دۇنيە­جۇزىلىك كوشپەلىلەر ويىندارىنىڭ سوڭعى كۇنى. تەڭگە ءىلۋ, بايگە, قۇسبەگىلىك, مانگالا جانە وردو سپورت تۇرلەرىنەن سايىستار وتەدى. كەشكى ساعات 16:00-دە «ەتنواۋىل» كەشەنىندە كوشپەلىلەر ويىندارىنىڭ جابىلۋ سالتاناتى وتەدى.