قىرعىزدار الىمدى ەكەن

توپتىق كەزەڭدە قارسىلاستارىن ايقىن ۇتقان ەلىمىزدىڭ ۇلتتىق قۇراماسى قىرعىزستان قۇراماسىنا ەسە جىبەرىپ, كۇمىس مەدالدى مىسە تۇتتى. ءۇش تايمدىق سايىسقا قىرعىز كوكپارشىلارى 4:10 ەسەبىمەن جەڭىسكە جەتتى.

سايىس ءا دەگەننەن قىرعىز كوكپارشىلارىنىڭ باسىمدىعىمەن ءوتتى. وعان نەگىز دە جوق ەمەس. ويتكەنى ەلىمىزدە قازاندىققا كوكپار تارتۋ توقتاعالى كوپ جىلدىڭ ءجۇزى بولدى. كوك­پار­شىعا دا, استىنداعى اتىنا دا قاتەر ءتون­دىرىپ, ءجيى ارانداپ قالۋ قاۋپى دە جوعارى بولعاندىقتان قازاندىققا تارتۋعا دوعارىلعان. سول سەبەپتى قازاندىققا ەمەس, جەردەگى شەڭبەرگە سالىم سالۋ كەڭ ءورىس الدى. ال قىرعىزستاندا, كەرىسىنشە, جىل سايىن وتەتىن كوكبورى دوداسى تەك قازاندىققا تارتىلادى. وعان اتتارى دا ابدەن كوندىگىپ, ۇيرەنىپ العان.

اقىلباي مانكەەۆ باپتايتىن كوكبورىدەن ۇلتتىق قۇراما مۇشەلەرىن قىرعىز قارسى­لاستارىنان ويسىراي جەڭىلدى دەپ جۇندەي بەرگەن دە ءجون بولماس. قالىڭ جانكۇيەر كۋا, ءبىزدىڭ جىگىتتەر مىنگەن اتتاردىڭ قازاندىقتان ۇركىپ, جانىنا جۋىماي سىرت اينالۋى دا سالىم سالۋعا كەدەرگىسىن كەلتىردى. مىسالى, تاجىريبەلى كوكپارشى تەمىرحان ايتباەۆ تىزگىندەگەن «العا» سايگ ۇلىك قىرعىزستان قۇراماسىنىڭ قازاندىعىنا جەكە-دارا كەلگەندە توقتاماي وتە شىقتى. ال قىرعىز كومانداسىنىڭ قاي اتى بولسىن قازاندىققا جەتكەندە يەسىنە بولىسىپ كىلت توقتاي قالادى. مۇنى ءبىر دەڭىز. ەكىنشى تاعى وسى تەمىرحاننىڭ استىنداعى ارعىماق دودانىڭ ىشىندەگى ارپالىستا قارسىلاستىڭ اتى ومىراۋلاپ كەلىپ قاققاندا ءبىر ەمەس, ەكى رەت وماقاسىپ قۇلادى. دەمەك ءبىزدىڭ كوكپار اتتارى ءدال وسى كوكبورى سايىسىنىڭ ىرعاعىنا ءالى دە ىلەسە الماي تۇرعانىن ايعاقتايدى. تاعى ءبىر سەبەپ – كوكبورىنىڭ نەگىزگى كوزىرى سانالاتىن جەكپە-جەك دوداسىنا دا سالاتىن سايگ ۇلىگىمىزدىڭ جوقتىعى. ال قارسى جاقتىڭ قاي اتىن جەكپە-جەككە سالسا دا سۇرىنگەن جوق. وسىدان كەيىن دە قىرعىز كوكپارشىلار جەردەگى سەركەنى ەركىن ءىلىپ اكەتىپ سالىم سانىن ەسەلەپ وتىردى.

كوكبورى دوداسىنان بۇيىرعان كۇمىس مەدال دا از تابىس ەمەس. بىراق 2026 جىلى قىرعىزستاندا وتەتىن كەزەكتى دۇنيەجۇزىلىك كوشپەلىلەر ويىندارىندا ولارعا توتەپ بەرۋ ءۇشىن قازاندىققا تارتاتىن كوكبورىنى قالايدا دامىتپاسقا بولمايدى.