پالاتا توراعاسى ەرلان قوشانوۆ باستاعان ءماجىلىس دەلەگاتسياسى دۇنيەجۇزىلىك كوشپەندىلەر ويىندارى اياسىنداعى كوكپار ويىنىنىڭ فينالىنا باردى. تارتىستى باسەكەدە قازاقستان قۇراماسى قىرعىزستان كومانداسىنان باسىم ءتۇستى, دەپ حابارلايدى Egemen.kz.
ۇزدىكتەر اراسىنان سۋىرىلىپ شىققان قوس كوماندانىڭ كەزدەسۋى اسەرلى ساتتەرگە تولى بولدى. قازاقستان مەن قىرعىزستان نەگىزگى ويىندى 4:4 ەسەبىمەن تەڭ اياقتادى. ال قوسىمشا ۋاقىتتا قازاقستان قۇراماسى العا شىقتى.
ويىن سوڭىندا ەرلان قوشانوۆ چەمپيوندار مەن بارشا قازاقستاندىقتى كوكپار ويىنىنداعى جىگەرلى جەڭىسىمەن قۇتتىقتادى. ول اقتىق سىندا لايىقتى قارسىلاستار, ەكى باۋىرلاس حالىقتىڭ مىقتى ويىنشىلارى كەزدەسكەنىن اتاپ ءوتتى. سونداي-اق ءماجىلىس توراعاسى مەملەكەت باسشىسىنىڭ باستاماسىمەن ەلىمىزدە ءوتىپ جاتقان دۇنيەجۇزىلىك كوشپەندىلەر ويىندارى كورەرمەندەرگە جارقىن ەموتسيالار سىيلاعان ناعىز سپورت مەرەكەسىنە اينالعانىن ەرەكشە اتاپ ءوتتى.
ويىندار ۇلتتىق سپورت تۇرلەرىنىڭ تارتىمدىلىعى مەن بىرەگەيلىگىن, كوپتەگەن باۋىرلاس حالىقتى بىرىكتىرەتىن كوشپەندىلەردىڭ تاريحىنىڭ رۋحىن سەزىنۋگە مۇمكىندىك بەردى. بۇل ون مىڭداعان شەتەلدىك قوناقتىڭ قازاقتىڭ ۇلتتىق مادەنيەتىمەن, ادەت-عۇرپىمەن تەرەڭىرەك تانىسۋىنا دا جول اشتى.
اقتىق كەزدەسۋدە كوكپارشىلاردى قولداۋعا ءماجىلىس دەلەگاتسياسىمەن بىرگە پرەزيدەنتتىڭ كومەكشىسى رۋسلان جەلدىباي مەن استانا قالاسىنىڭ اكىمى جەڭىس قاسىمبەك كەلدى. جارىس باستالار الدىندا ەرلان قوشانوۆ دوداعا سپورتتىڭ 21 تۇرىنەن قاتىسىپ جاتقان قازاقستاندىق سپورتشىلارمەن اڭگىمەلەسىپ, ولارعا ساتتىلىك پەن جەڭىس تىلەدى.
V دۇنيەجۇزىلىك كوشپەندىلەر ويىندارى استانادا 8-13 قىركۇيەك ارالىعىندا وتەدى. ۇلتتىق سپورت تۇرلەرىنەن جارىسقا 89 ەلدەن كوماندالار قاتىسىپ جاتىر.