باسەكەنىڭ كورىگىن قىزدىرادى

قالىڭ كورەرمەننىڭ كوپتەن كۇتكەن كوكپار ويىنىنىڭ دوداسى تارتىسپەن ءوتتى. جارتىلاي فينالدىق سايىستا «ا» توبىندا قازاقستان ۇلتتىق قۇراماسى رەسەي كوكپارشىلارىن ايقىن باسىم­دىقپەن ەڭسەردى. ءتىپتى ءبىرىنشى تايمدا رەسەيلىك كوكپارشىلار ەلىمىزدىڭ ۇلتتىق قۇراماسىنىڭ شەڭبەرىنە بەتتەي العان جوق. قانشا شابۋىلدى ورىستەتۋگە تىرىسقانىمەن, قورعانىستاعى سپورتشىلارىمىز ءابجىل قيمىلمەن ولاردىڭ ارەكەتىن قيىپ تاستاپ وتىردى.

ۇلتتىق قۇرامانىڭ مۇشەسى ابىلاي­حان نىشانبەكوۆ «نۇرتوبەل» اتتى ارعىماعىن ويقاستاتىپ, بىرنەشە سالىم سالدى. «استانا تورىندە ءوتىپ جاتقان دۇنيەجۇزىلىك كوشپەلىلەر ويىندارىندا فينالدىق دوداعا وتتىك. جوسپار ورىندالىپ كەلەدى, ەندى باستى قارسىلاسىمىز قىرعىز قۇراماسىنان باسىم ءتۇسىپ, ەلىمىزدى قۋانتساق دەيمىز. ەكى جىل بۇرىن تۇركيانىڭ يزنيك قالاسىندا وتكەن ءدۇبىرلى الاماندا كوكپاردان وسى قىرعىز قۇراماسىمەن فينالدا جولىمىز ءتۇيىسىپ, ەلگە جەڭىسپەن ورالعان ەدىك. ءوز جەرىمىزدە وتكەن دودانىڭ اۋراسى مۇلدەم بولەك ەكەن. «قازانات» يپپودرومىنا جينالعان قالىڭ جانكۇيەردىڭ قولداۋىن سەزىنگەندە ەرەكشە كۇيگە بولەنەسىڭ. جارتىلاي فينالدىق تارتىس­تا رەسەي قۇراماسىنىڭ قورعانىسى ءالسىز بولدى. مۇمكىن الاڭعا بوي ۇيرەتە المادى ما, الدە شيرەك فينالدىق تارتىستا كوپ كۇشىن سارقىپ الدى ما, ەكپىنىمىزدى تويتارۋعا شىداس بەرمەدى. ەكىنشى تايمدا ەس جيعانداي بولىپ, ەكى سالىم سالدى. جارتىلاي فينالدىق ويىندا ءىرى ەسەپپەن (18:2) جەڭىسكە جەتۋ التىن الۋعا قۇلشىنىسىمىزدى ارتتىردى», دەدى ا.نىشانبەكوۆ.

بۇل ويىندا قۇرمانبەك تۇرعانبەك تە يپپودرومعا جينالعان كوكپار جانكۇيەرلەرىن ءوزىنىڭ سامداعايلىعىمەن ءتانتى ەتىپ, ساقا كوكپارشى ەكەنىن تانىتتى. رەسەيلىك قارسىلاستارىنىڭ ءىرى ەسەپپەن ۇتىلۋىنا اتتارىنىڭ باس بەرمەۋى, الاڭعا ۇيرەنىسە الماۋى دا اسەر ەتتى دەيدى كوكپارشى. ء«بىز ءا دەگەننەن بىرنەشە سالىمدى سالۋىمىز ولارعا پسيحولوگيالىق تۇرعىدان دا اۋىر سوققى بولدى. وزدەرىڭىز دە كوردىڭىزدەر, ءبىرىنشى تايمدا ءتىپتى شەڭبەرىمىزگە ماڭايلاي العان جوق», دەدى قۇرمانبەك تۇرعانبەك.

كوكپاردان ۇلتتىق قۇرامانىڭ باس باپكەرى اقىلباي مانكەەۆ جارتىلاي فينالدىق ويىندا رەسەيلىكتەردى ءىرى ەسەپپەن ۇتقانعا قۋانۋ ەرتە ەكەنىن, نەگىزگى كۇشتى فينالدا قىرعىز كوكپارشىلارىنا قارسى تارتىسقا ىركىپ وتىرعانىن اتاپ ءوتتى. ءتىپتى تاكتيكالىق جوسپارعا دا وزگەرىس ەنگىزگەنىن ايتتى. «رەسەي قۇراماسىنىڭ ساپىندا ويناعان كوكپارشىلاردىڭ كوپشىلىگى – قىرعىز باۋىرلارىمىز. ولار دا ەرتەدەن كوكپار تارتىپ, ات باۋىرىندا وسكەن ۇلت. فينالدىق باسەكە ءبىز ءۇشىن ماڭىزدى. ويتكەنى ارقامىزدا – كوكپار سايىسىنان التىن الۋ اماناتى. قالىڭ جانكۇيەر بىزدەن تەك جەڭىس كۇتەدى. دۇنيەجۇزىلىك كوشپەلىلەر ويىندارىنىڭ فينالدىق سايىسىندا جەڭىمپاز اتانۋعا ۇمتىلامىز», دەدى ا.مانكەەۆ.

كوك­پاردان قىرعىزستان قۇرا­ما­سىنىڭ ويىنشىسى ماناس نيازوۆ ەتنوسپورت الامانى استانا تورىندە جوعارى دەڭگەيدە ءوتىپ جاتقانىنا العىسىن ءبىلدىردى. «كوكپار ويىنى – قىرعىز بەن قازاققا ورتاق يگىلىك. توسكەيدە مالىمىزعا ءورىس ءبىر بولعانى سەكىلدى, ۇلتتىق ويىن دا ەكى ەلدىڭ نەسىبەسى. ءبىز دە ءساتىن سالىپ فينالدىق تارتىسقا جولداما الدىق. 2022 جىلى تۇركيادا وتكەن دۇنيەجۇزىلىك كوشپەلىلەر ويىندارىنىڭ فينالدىق تارتىسىندا ءبىز جەر ۇلاق دەپ اتايتىن كوكپاردان قازاق سپورتشىلارىنا 3:4 ەسەبىمەن ەسە جىبەرگەن ەدىك. بۇل جولى جەڭىسكە جەتۋگە بارىمىزدى سالامىز. قازاق ەلىنىڭ سپورتشىلارعا دەگەن قولداۋى, قۇرمەتى ەرەكشە ەكەن. استاناعا تابانىمىز تيگەن كۇننەن كوشەدە, يپپودرومدا كورگەن كوكپار كورەرمەندەرى تانىپ, امانداسىپ, ساتتىلىك تىلەپ جاتىر. بۇل  – دودا عانا ەمەس, باۋىرلاس ەلدەردىڭ دوستىعىن نىعايتاتىن شارا. سوندىقتان ىنتىماعىمىز ارتا بەرسىن», دەدى ماناس نيازوۆ.

قىرعىزستان قۇراماسى جار­تىلاي فينالدا تۇركيا كوكپار­شىلارىن 15:1 ەسەبىمەن ۇتتى.كوشپەلىلەر ويىندارىنا كوكپاردان قازاقستان, اقش, رەسەي, وزبەكستان, قىرعىزستان, ماجارستان, قىتاي, موڭعوليا جانە تۇركيا ەلىنىڭ كوكپارشىلارى قاتىستى. بۇگىن ەلىمىزدىڭ كوكپارشىلارى قىرعىزدارمەن التىن ءۇشىن تارتىسسا, تۇركيا مەن رەسەي قۇرامالارى قولا جۇلدە جولىندا دوداعا تۇسەدى.

ال كوكبورىدەن دە فينالدىق تارتىس وسى ەكى ەلدىڭ ۇلتتىق قۇراماسى اراسىندا ءوربيدى. جارتىلاي فينالدىق سايىستا قىرعىزستان قۇراماسى رەسەي كومانداسىن 11:6 ەسەبىمەن جەڭسە, ءبىزدىڭ جىگىتتەر تۇركيا ۇلتتىق قۇراماسىن 15:1 ەسەبىمەن ويسىراتا ۇتتى.

بۇگىنگى فينالدىق باسەكە «قازانات» يپپودرومىندا ساعات 11:00-دە باستالادى.