بەس بىردەي قۇرىلىس كومپانياسى سان سوعىپ قالدى

ماسەلە بىلاي, زاڭ­دى مەكەن­جايى شىم­كەنت قالا­سىن­دا ور­نالاسقان «گرادستروي­سەرۆيس» جشس مەملەكەتتىك ساتىپ الۋلار پورتالى ارقىلى پاۆلو­دار وبلىسى بويىنشا 9 جوبانى ۇتىپ العان. ۇلگىلىك شارتتار جەتەكشى مەكتەبىنىڭ عيمارا­تىن كۇردەلى جوندەۋ, اقسۋداعى سارىشىعا­ناق مەكتەبىنىڭ عيماراتىن كۇر­دەلى جوندەۋ جانە اۋلاسىن اباتتان­دىرۋ, وب­لىستىق مامانداندىرىلعان با­لا­لار ءۇيىنىڭ قاسبەتىن كۇردە­لى جوندەۋ جانە اۋلاسىن اباتتاندىرۋ, اقپاراتتىق تەحنو­لو­گيالار كوللەدجىنىڭ اۋلا­سىن جون­دەۋ, ەرتىس اۋلىندا سپورت قۇ­رىلىستارىن سالۋ جانە دەنە­شىنىقتىرۋ-ساۋىق­تىرۋ كە­شەنىن اباتتاندىرۋ, سونداي-اق اقسۋداعى تۇر­عىن ۇي­لەر اۋلالارىن اباتتاندىرۋ بو­يىن­شا جاسالعان. شارت تارماق­تا­رىندا ورىنداۋشى تاپسىرىس بەرۋشىنىڭ كەلىسىمىنسىز ءوزىنىڭ مىندەتتەمەلەرىن تولىقتاي نەمەسە ءىشىنارا وزگە سۋبەكتىگە بەرە المايتىنى ­تۋرالى تايعا تاڭبا باسقانداي ەتىپ جازىلعان. الايدا «گرادسترويسەرۆيس» جشس ءوزى ۇتىپ العان جوبالاردى اتقارۋ مىندەتىن ءبىر دەممەن ارالىق مەردىگەر «ADS-N group» جشس-نە اۋدارا سالعان. ال سوڭعى اتالعان فيرمانىڭ قۇرىلىس سالاسىنداعى تاجىريبەسى اتىمەن جوق كورىنەدى.

– «ADS-N group» جشس ارا­لىق مەردىگەر رەتىندە پاۆلو­دار­لىق بەس كومپانيامەن, اتاپ ايتقاندا, «Santeh Expert PV», «كۇن جارىق», «سك گەنستروي­پلان», «اسفالتوبەتون-­پۆ», «ينتەرلايت پاۆلودار» جا­ۋاپكەر­شىلىگى شەكتەۋلى سەرىك­تەس­تىكتەرىمەن جۇمىس­تى اتقارۋ تۋرالى كەلىسىمگە كەلەدى. «ADS-N group» جشس دە وڭتۇستىك وڭىر­دەن, 2022 جىلى تۇركىستان وب­لىسىنداعى جەتى­ساي قالاسىندا تىركەلگەن. كاسىپورىن شتاتى­نىڭ ەسەبىندە ءبىر عانا ادام – دي­رەكتور عانا ەسەپتە تۇر. ال «گراد­سترويسەر­ۆيس» جشس-ىندا ءوز مىندەتتەمەلەرىن وزگەگە بەرۋ تۋرالى تاپسىرىس بەرۋشىمەن جاساعان جازباشا كەلىسىمى جوق. نەگىزگى شارتتاردا جوباداعى جۇ­مىستى بىرلەسىپ ورىنداي­­تىن مەردىگەرلەر تارتىلعان جاع­داي­دا تاپ­سىرىس بەرۋشىگە بارلىق ارالىق مەردىگەرمەن جاسالعان كەلىسىمدەردىڭ كوشىرمەسىن ۇسى­ناتىنى كورسەتىلگەن. بۇعان ­قوسا ارالىق مەردىگەردە (ياعني «ADS-N group» جشس) ورىندالا­تىن جۇمىس كولەمدەرىن وزگە ارا­لىق مەردىگەرگە بەرۋ قۇقىعى زاڭ جۇزىندە بولماعان. عيمارات­تار مەملەكەتتىك ساتىپ الۋلار­دىڭ ءمانى بولعاندىقتان, وعان ەرەجەلەردە تىيىم سالىنعان, – دەپ ءتۇسىندىردى زارداپ شەگۋ­شى بەس كومپانيانىڭ قۇقىعىن قورعاۋشى ادۆوكات الماگۇل باحرالينوۆا.

«ADS-N group» كومپانيا­سى وسىنداي تالاپتارعا قا­را­­ماستان, پاۆلودارلىق بەس ارا­لىق مەردىگەرمەن ءوز بەتىنشە كەلى­سىمگە كەلگەن. ال جەرگىلىكتى كاسىپ­ورىندار جۇمىس­تاردى مە­جەلى مەرزىمدە تولىق ورىنداپ شىققان. الايدا «ADS-N group» جشس جۇمىستاردىڭ ورىندالعانى تۋرالى اكتىگە ءالى كۇنگە قول قويماي, تولەم جاساۋدان قاشىپ وتىر. ارالىق مەردىگەرلەر ونى سوتقا بەرىپتى. وكىنىشكە قاراي, شارتتار بويىنشا بەرەشەكتى ءوندىرىپ الۋ تۋرالى سوت شەشىمى ورىندالار ەمەس. جوبالارعا تاپسىرىس بەرۋشى مەكەمەلەر ورىندال­عان جۇمىستار ءۇشىن تولەمدى تو­لىق تۇردە «گرادسترويسەرۆيس» جشس-نىڭ ەسەپشوت­تارىنا اۋدارىپ جىبەرگەنىمەن, ودان پاۆ­لو­دارلىق قۇرىلىسشىلارعا سوقىر تيىن دا بۇيىرماي وتىر. سەبەبى ارالىق فيرما «ADS-N group» جابىلىپ قالعان.

– ءبىز «گرادسترويسەرۆيس» جشس-نا شا­عىمدانىپ بار­دىق. ونداعىلار تيەسىلى سومانى «ADS-N group» كومپانياسىنا تولەگەنىن جانە بارلىق ءوندىرىپ الۋ تۋرالى شاعىمدار­دى سولارعا جىبەرۋ كەرەكتىگىن جەتكىزدى. ماسەلەنى بايىپتاي كەلە, «ADS-N group» جشس ادى­لەت مينيسترلىگىنىڭ بورىشكەرلەر رەەسترىندە تۇرعانىن جانە ول سۋبەكتى رەتىندە جۇمىسىن توق­تاتقانىن انىقتادىق. ال ونىڭ يەلىگىندە ءوندىرىپ الۋعا جاتا­تىن م ۇلىك اتىمەن جوق. ءبىزدىڭ ويى­مىزشا, «گرادسترويسەرۆيس» جشس بۇل كۇماندى الاياقتىق سحە­مانى الدىن الا ويلاستىرعان. ول قارجىلىق پايدا تابۋ ءۇشىن «ADS-N group» سياقتى ءبىر كۇندىك جالعان فيرمانى ادەيى قۇرعان دەگەن پىكىردەمىز. وسىلايشا, ارالىق مەردىگەرلەرگە تيەسىلى تولەمدەردى بەرۋدەن زاڭسىز تۇردە جالتارىپ وتىرعانى انىق, – دەيدى ادۆوكات.

الماگۇل باحرالينوۆانىڭ ايتۋىنشا, «گرادسترويسەرۆيس» مەملەكەتتىك ساتىپ الۋلار پورتالىندا ءالى دە شارتتار جاساسىپ, الگىندەي كۇماندى سحەمالاردى قولدانىپ جاتىر. فيرما ۇتىپ العان تەندەرلەرىن كۇمان­دى ءارى سا­لادا مۇلدە تاجىريبەسى جوق كوم­پانيالارعا ۇستاتا سالا­دى ەكەن. ءارى قاراي ول جو­عا­رىداعىداي ستسەناريمەن جال­­عاسىن تاۋىپ, سالدارىنان جۇمىسىن ادال اتقارىپ وتىرعان ارالىق مەردىگەرلەر سان سوعىپ قالىپ جاتىر.

– «Santeh Expert PV», «كۇن جا­رىق», «سك گەنسترويپلان», «اسفالتوبەتون-­پۆ», «ينتەر­لايت پاۆلودار» جاۋاپكەر­شى­لىگى شەكتەۋلى سەرىكتەستىكتەرى قازىرگى ۋاقىتتا ­وتە ۇلكەن سو­ما­داعى شىعىندارعا باتىپ وتىر. ولار الگى جوبالاردى ءوز قا­راجاتتا­رىنا اتقارىپ شىق­تى. ەندى تولەنۋگە ءتيىس قارا­جات ەسە­بىنەن قىزمەتكەرلەردىڭ ەڭبەك­اقىسى, ماتەريالدارعا, تەحني­كالارعا جانە وزگە دە باعىتتار­عا جۇمسالعان شىعىندار جابىلۋى كەرەك ەدى. ماسەلەگە جا­ۋاپتى ورگاندار, اسىرەسە, پرو­كۋراتۋرا كەڭىنەن ارالاسىپ, «گرادسترويسەرۆيس» مەن «ADS-N group» كومپانيالارىن جاۋاپكەرشىلىككە تارتۋدى سۇرايمىز. ادال كاسىپكەرلەر­دىڭ قۇقىعى اياققا تاپتالىپ ­وتىر. ولاردىڭ تيەسىلى تولەم­دەرى قاي­تارىلۋى كەرەك, – دەيدى ا.باحرالينوۆا.

پاۆلودار وبلىسى پروكۋ­رو­رىنىڭ كومەكشىسى اسحات اتيكەەۆ بۇل ماسەلەگە ەڭ اۋەلى ىشكى مەم­لەكەتتىك اۋديت دەپارتامەنتى تارتىلاتىنىن مالىمدەدى. ەگەر مەكەمە قۇرىلىس كومپانيالا­رىنا شىعىننىڭ شىنىمەن كەل­تىرىلگەنىن انىقتاسا, وندا تەكسە­رۋ ماتەريالدارىنىڭ قورىتىن­دىسى قاداعالاۋشى ورگانعا تاپ­سىرىلىپ, قىلمىستىق ءىس قوز­عالادى. قازىرگى ۋاقىتتا بۇل تۇيت­كىلگە وڭىرلىك كاسىپكەرلەر پالاتاسى دا ارالاسىپ, مۇددەلى ورگانداردىڭ ءوزارا بايلانىسىن ۇيلەستىرۋگە كىرىستى.

پاۆلودار وبلىسى