قازاقستان ۇلتتىق بانكى «ەستە قالاتىن وقيعالار مەن ءبىرتۋار ادامدار» سەرياسىمەن «Joshy Ulysy. 800 jyl» كوللەكتسيالىق مونەتالارىن اينالىمعا شىعارادى.
مونەتالاردىڭ ديزاينىندا جوشى حان ەسكەرتكىشىنىڭ بەينەلەنگەن. ونىڭ اۆتورى – ەلىمىزگە بەلگىلى ءمۇسىنشى, مونۋمەنتاليست-سۋرەتشى عازيز ەشكەنوۆ. 5000 تەڭگەلىك نومينالدىڭ تارالىمى 100 دانا. ولاردىڭ بارىنە دە التىن جالاتىلعان, كۇمىس سىناماسى – 925/1000, ماسساسى – 777,5 گرامم, ديامەترى – 100 مم, دايىنداۋ ساپاسى – «proof». ايتا كەتەيىك, مونەتانىڭ بارلىق ءتۇرىن ەلىمىزدىڭ بۇكىل اۋماعىندا ءوزىنىڭ بەلگىلەنگەن قۇنىمەن تولەمنىڭ كەز كەلگەن تۇرىندە قابىلداۋعا, بانك شوتتارىنا ەسەپكە الۋعا, اۋدارۋعا, ۇساقتاۋعا, ايىرباستاۋعا بولادى.
كولەمدى گاۋھار تاس
ساحا رەسپۋبليكاسىنداعى ەبەلەەح كەن ورنىنان سالماعى 52 گرامم بولاتىن گاۋھار تاس تابىلدى.
باعالى تاستى ماماندار المازدى كەن ورنىنىڭ توپىراعىن تازالاۋ كەزىندە انىقتاعان. گرافيت, سۋلفيد سياقتى حيميالىق قوسپاسى بار زەرگەرلىك الماس ءمولدىر كريستالدارمەن كومكەرىلگەن. قازىر ول ساراپتامالىق باعالاۋعا جىبەرىلدى. مامانداردىڭ ايتۋىنشا, كولەمدى گاۋھار تاس وسىمەن ەكىنشى رەت ەبەلەەح كەن ورنىنان تابىلعان. بىلتىر قىركۇيەكتە سالماعى 78 گرامم كريستالل انىقتالعان. بۇل – كەيىنگى ون جىلداعى رەسەيدەن تابىلعان ەڭ ۇلكەن باعالى تاس.
عارىشتاعى توعىزقۇمالاق
دۇنيەجۇزىلىك كوشپەلىلەر ويىندارىنىڭ قارساڭىندا توعىزقۇمالاق ويىنىنىڭ تاقتاسى 35 مىڭ شاقىرىمداعى اۋە كەڭىستىگىنە ۇشىرىلدى.
وسىلايشا, ۇيىمداستىرۋشىلار جاھان جۇرتىنىڭ نازارىن ءتول ويىنىمىزعا اۋدارۋعا تىرىسقان. قازىر توعىزقۇمالاق ۇلتتىق ويىنىنا تەك قازاقتىڭ عانا ەمەس, وزگە ەلدەردىڭ دە قىزىعۋشىلىعى جوعارى. ماسەلەن, كوشپەلىلەر ويىنىندا كولۋمبيا, بانگلادەش, ۇلىبريتانيا, اقش, قىتاي سياقتى ەلدەردەن كەلگەن قاتىسۋشىلاردىڭ قاراسى مول. ايتا كەتەيىك, قازىر ەلىمىزدە 5 مىڭ توعىزقۇمالاق ۇيىرمەسى, 200-دەن استام جوعارى ساناتتاعى سپورتشىلار بار.