قورعانىس ءمينيسترى, گەنەرال-پولكوۆنيك رۋسلان جاقسىلىقوۆ الماتىداعى «ارىستان» ليتسەيىندە ءبىلىم الىپ جاتقان تاربيەلەنۋشىلەرمەن كەزدەسىپ, اسكەري ماماندىقتىڭ سىرىمەن ءبولىستى.
«ارىستان» مامانداندىرىلعان ليتسەيىنىڭ باستىعى, گەنەرال-لەيتەنانت مۇرات مايكەەۆ وقۋ ورنىنىڭ جابدىقتالۋى, تاربيەلەنۋشىلەر ءۇشىن بوس ۋاقىتتىڭ ۇيىمداستىرىلۋى, سپورتتىق ءىس-شارالاردى وتكىزۋ ءۇشىن جاسالىپ جاتقان وزگەرىس تۋرالى ايتىپ بەردى.
قورعانىس ءمينيسترى رۋسلان جاقسىلىقوۆ كازارماعا, وقۋ كابينەتتەرىنە, اتىس تيرىنە, بوكس جانە باسقا دا سپورت تۇرلەرىمەن اينالىسۋعا ارنالعان سپورت زالدارىندا بولدى. تاربيەلەنۋشىلەر اراسىندا جۇزۋدەن وتكەن جارىسقا قاتىسقان جەڭىمپازدار مەن جۇلدەگەرلەردى ماراپاتتادى.
كەزدەسۋدە جاس جەتكىنشەكتەرگە قارۋلى كۇشتەردىڭ ءار تۇرىندەگى قىزمەت ەرەكشەلىكتەرىنە قىزىعۋشىلىق تانىتىپ, وسى تۇرعىدا ماماندىققا بارۋ جانە وفيتسەر رەتىندە قالىپتاسۋ تۋرالى سۇراقتار قويدى.
– ءبىزدىڭ وتباسىمىزدا اسكەري ادام بولعان جوق. اكەم – مەرزىمدى اسكەري قىزمەتتە بولعان كىسى. ودان سوڭ كوپ جىلدار بويى اۋىل شارۋاشىلىعىندا ەڭبەك ەتتى, ال انامىز مۇعالىم بولىپ جۇمىس ىستەدى. مەن جۇرەك قالاۋىمەن اسكەري ۋچيليششەنى تاڭدادىم. قىزمەتتە ءاردايىم سپورتپەن شۇعىلدانۋعا مۇمكىندىك بولدى. قىزمەتتى موتواتقىشتار ۆزۆودىنىڭ كومانديرىنەن باستاعان ۋاقىتتا گەنەرال بولام دەگەن وي ءۇش ۇيىقتاسام, تۇسىمە كىرمەپتى. ءوز مىندەتىمدى ادال ورىنداۋىم, قيىندىقتارعا مويىماۋىم مەنى وسى جەتىستىكتەرگە جەتكىزدى. مەن سىزدەرگە ءاردايىم تاباندى بولىپ, ماقساتتارىڭىزدى ايقىنداپ, سپورتپەن شۇعىلدانۋعا كەڭەس بەرەمىن. سوندا مىندەتتى تۇردە جەتىستىككە جەتەسىزدەر, – دەدى ول جاس «ارىستاندىقتارعا».
گەنەرال-پولكوۆنيك وتانعا قىزمەت ەتۋ قۇرمەتتى دە قاسيەتتى پارىز ەكەنىن اتاپ ءوتىپ, ولاردى قارۋلى كۇشتەر قاتارىنا قوسىلۋعا شاقىردى. جاستارعا اسكەري ينستيتۋتتارعا ءتۇسۋ شارتتارى, ليتسەيدە وقىعاننان كەيىن يگەرە الاتىن اسكەري ماماندىقتار, ونىڭ ىشىندە شەتەلدىك اسكەري وقۋ ورىندارىندا جانە اسكەردە قىزمەت ەتكەننەن كەيىنگى جەڭىلدىكتەر تۋرالى ايتىپ بەردى.
كەزدەسۋ سوڭىندا ليتسەي تاربيەلەنۋشىلەرى ءوز كۇشىمەن دايىنداعان كونتسەرت بەرىپ, ەستەلىك سۋرەتكە ءتۇستى.