استىقتى وڭىردەگى ىلكىمدى ىستەر

كاسىپورىن جۇمىسىنا وڭ باعا بەردى

پرەزيدەنت اۋەلى قوستانايدىڭ يندۋست­ريالىق ايماعىندا ورنالاس­قان «KamLitKZ» جاۋاپكەرشىلىگى شەك­تەۋ­لى سەرىكتەستىگىنىڭ شويىن قۇيۋ زاۋىتى­نا باردى. مەملەكەت باسشىسى مۇن­داعى جۇك كولىكتەرىنە ارنالعان قوسال­قى بولشەك وندىرىسىمەن تانىستى. سەرىك­تەستىكتىڭ باس ديرەكتورى دمي­تري گۋرتوۆويدىڭ ايتۋىنشا, زاۋىت جىلىنا 45 مىڭ توننا شويىن قۇي­ماسىن شىعارادى. قۇنى 78,2 ملرد تەڭگە بولاتىن جوبانى ىسكە اسىرۋ ناتيجەسىندە 500 جۇمىس ورنى اشىلعان.

كاسىپورىن باسشىسى پرەزيدەنتكە جوبانى جۇزەگە اسىرۋعا قازاقستان ينجەنەرلەرى مەن تەحنولوگتەرى اتسالىسىپ جاتقانىن باياندادى. زاۋىتقا الەمدىك دەڭگەيدەگى تاجىريبەلى ينجينيرينگ كومپانيالارىنىڭ ساراپشىلارى مەن ەۋروپالىق ماشينا جاساۋشىلار دا تارتىلعان.

پرەزيدەنتكە شويىن قورىتۋ, ونى قالىپقا قۇيۋ, سونداي-اق وڭدەۋ سەكىلدى جۇمىستاردىڭ تولىق ۇدەرىسى كورسەتىلدى. زاۋىت بارلىق زاماناۋي تالاپقا ساي كەلەدى. اۆتوماتتاندىرۋ جانە ەنەرگيالىق تيىمدىلىك دەڭگەيى جوعارى بولعاندىقتان, قورشاعان ورتاعا اسەرى از. قازىر مۇندا 30 روبوت بار. ولار اناعۇرلىم كۇردەلى ءارى اۋىر تەحنولوگيالىق وپەراتسيالاردى ورىندايدى.

مەملەكەت باسشىسى وزىق تەحنولوگيالارمەن جابدىقتالعان كاسىپورىنعا وڭ باعا بەردى. بۇدان سوڭ زاۋىتتا ەڭبەك ەتەتىن وتاندىق جاس ينجەنەرلەرمەن اڭگىمەلەستى.

«بۇگىندە ءبىز جۇمىسشى مامان­داردى قولداپ جاتىرمىز. ول جونىندە جول­داۋىمدا دا ايتتىم. كەلەسى جىلدى جۇمىسشى ماماندىقتارى جىلى دەپ جاريالادىق. ەڭبەك قاشان­دا قۇندى. بۇل جەردە كىل جاس­تار جۇمىس ىستەيدى ەكەن. ءبىز ءىرى جانە شاعىن كاسىپورىنداردا قىزمەت ەتەتىن مامانداردى, اسىرەسە جاس­تاردى مىندەتتى تۇردە قولدايمىز. ەلىمىزدە ەڭبەك ءوتىلى 100, 200 جىلدى قۇرايتىن, ءتىپتى ودان دا اساتىن جۇ­مىسشى اۋلەتتەر بارشىلىق. ءبىز مۇن­داي وتباسىلارعا, اۋلەتتەرگە قاشان­دا قۇرمەت كورسەتەمىز. سىزدەر سەكىلدى جاستاردىڭ ءومىر جولى ەندى باستالىپ جاتىر. ەلىمىزدىڭ دامۋىنا زور ۇلەس قوساتىن­دارى­ڭىزعا سەنىمدىمىن. بارشاڭىز­عا ساتتىلىك تىلەيمىن», دەدى قاسىم-جومارت توقاەۆ.

پرەزيدەنت جاڭا وندىرىلگەن تسي­ليندر­لەر بلوگىنە قولتاڭبا قالدى­رىپ, جوبا قاتىسۋشىلارىنا وتان­دىق ماشينا جاساۋ كلاستەرىن دامى­تۋعا ۇلەس قوسقانى ءۇشىن العىس ايتتى.

قوستاناي وبلىسىنىڭ اكىمى قۇمار اقساقالوۆ مەملەكەت باسشىسىنا وڭىرگە ينۆەستيتسيا تارتۋ ماسەلەسى جونىندە, اتاپ ايتقان­دا, يندۋستريالىق سەكتورداعى, اگروونەركاسىپ كەشەنىندەگى, مەتاللۋرگيا, ماشينا جاساۋ جانە لوگيس­تيكا سالالارىنداعى جاڭا جوبالار تۋرالى باياندادى.

وبلىس اكىمىنىڭ ايتۋىنشا, اتالعان جوبالاردى ىسكە اسىرۋ بارىسىندا جالپى وڭىرلىك ءونىم كولەمى ەكى ەسە ءوسىپ, جىل سايىنعى بيۋدجەت ءتۇسىمى 75 ملرد تەڭگەگە ۇلعايادى. سونداي-اق ورتاشا جالاقى مولشەرى 1,5 ەسە ارتىپ, 20 مىڭعا جۋىق جاڭا جۇمىس ورنى اشىلادى.

اۆتوونەركاسىپ سالاسىنىڭ الەۋەتى جوعارى

مەملەكەت باسشىسى قاسىم-جومارت توقاەۆ قوستاناي وبلىسىن­داعى «KIA» اۆتوموبيلدەرىن شىعارا­تىن زاۋىتتىڭ قۇرىلىس الاڭىنا باردى. زاۋىت قۇرىلىسى بىلتىر قازان ايىندا باستالعان. جوسپارعا سايكەس كونۆەيەردەن العاشقى كولىك سىناق رەجىمىندە كەلەسى جىلدىڭ شىلدە ايىن­دا شىعارىلادى.

«KIA» Qazaqstan» باس ديرەكتورى كيم دە كي پرەزيدەنتكە اتالعان زاۋىتتىڭ 2025 جىلدىڭ قازان ايىندا ىسكە قوسىلاتىنىن ايتتى. اۆتوكاسىپورىن باستاپقى كەزەڭدە «Sorento» مودەلىن شىعارۋدى جوسپارلاپ وتىر. 2026 جىلدىڭ قاڭتار ايىنان باستاپ جاڭارتىلعان «Sportage» مودەلى قۇراستىرىلادى.

پرەزيدەنتكە «KIA» زاۋىتى جىلىنا 70 مىڭعا جۋىق اۆتوكولىك شىعارا الاتىنى جونىندە مالىمەت بەرىلدى. كاسىپورىندا جاڭادان 1 500 تۇراقتى جۇمىس ورنى اشىلادى. مۇندا ءوندىرىستىڭ تيىمدىلىگىن ارتتىرۋعا ءارى ەكولوگيالىق تۇرعىدان زيانسىز ەتۋگە باعىتتالعان تەحنولوگيا­لىق شەشىمدەر قولدانىلادى. اۆتوماتتاندىرىلعان زاماناۋي كاسىپورىننىڭ دانەكەرلەۋ جەلىسىندە, اۆتوكولىكتى بوياۋ جانە قۇراستىرۋ جۇمىستارىنا 70 روبوت پايدالانىلادى. جوبانىڭ قۇنى 200 ملن دوللاردى قۇرايدى, ونىڭ 80 پايىزعا جۋىعى – تىكەلەي شەتەلدىك ينۆەستيتسيا ۇلەسىندە.

سونىمەن قاتار پرەزيدەنتكە جاڭا زاۋىتتىڭ جانىنان قوسالقى بولشەكتەر ءوندىرىسىنىڭ كلاستەرىن قۇرۋ جوباسى تانىستىرىلدى. قازىر مۇندا «لوكاليزاتسيا ورتالىعى» سالىنىپ جاتىر. ال «KIA» كومپانياسى لوكاليزاتسيالىق ورتالىققا اۆتوكولىك كومپونەنتتەرى مەن قوسال­قى بولشەكتەردى ءوندىرۋشى جاھاندىق كومپانيالاردى تارتۋ بويىنشا جۇمىس جۇرگىزىپ جاتىر.

«كسس Corporation» كومپانياسى اۆتوكولىك كومپونەنتتەرى ءبولىمىنىڭ باسقارۋشىسى پاك سەيون مەن «Seoyon Ehwa Global» كومپانياسى جاھاندىق بيزنەستى باسقارۋ توبىنىڭ جەتەكشىسى چانگ سەوكۆون وڭتۇستىك كورەيانىڭ وندىرۋشىلەرى قازاقستاندا ءوز ءوندىرىسىن اشۋعا ءازىر ەكەنىن ايتتى.

مەملەكەت باسشىسى ودان كەيىن «اگروماشحولدينگ KZ» اكتسيونەرلىك قوعامىنىڭ لوكاليزاتسيا ورتالىعىن ارالاپ كوردى. كاسىپورىن دوڭعالاقتى اۋىلشارۋاشىلىق تەحنيكالارى مەن جالپى ماشينا جاساۋ سالاسى ءۇشىن قوسالقى بولشەكتەر شىعارادى. بۇگىندە مۇندا 700 ادام ەڭبەك ەتەدى. زاۋىت جىلىنا 250 مىڭعا جۋىق بولشەك وندىرەدى. جىل باسىنان بەرى زاۋىتتان 1 مىڭعا جۋىق تراكتور مەن 300 كومباين شىعارىلعان.

كاسىپورىن باسشىسى پرەزي­دەنت­كە لوكاليزاتسيا ورتالىعى­نىڭ «Claas» تراكتورلارى مەن كومبايندارىنىڭ بىرقاتار قوسالقى بولشەگىن دايىنداۋعا تاپسىرىس العانى جونىندە باياندادى. بۇعان قوسا جۋىردا اسپالى جانە تىركەمەلى تەحنيكالاردى وندىرۋدە الەمدە ۇزدىك سانالاتىن «Amazone» كومپانياسىمەن كەلىسىمشارتقا قول قويىلعان. بيىل زاۋىتتا ءدان سەبۋ جانە بۇركۋ قوندىرعىلارىنىڭ ءوندىرىسى دە ىسكە قوسىلماق.

مەملەكەت باسشىسىنا ورتالىق قازىرگى ۋاقىتتا «KIA» كومپانيا­سىمەن بىرلەسىپ, 2025 جىلى ىسكە قوسى­لاتىن جاڭا زاۋىتتىڭ قۇرامداس بولىكتەرىنە ارنالعان جابدىقتاردى شىعارۋ جۇمىستارىن باستاعانى تۋرالى مالىمەت بەرىلدى.

قاسىم-جومارت توقاەۆ كاسىپ­ورىننىڭ ەڭبەك ۇجىمىمەن كەز­دەس­تى. زاۋىت جۇمىسشىلارى پرە­زي­دەنتتىڭ قازاقستان حالقىنا ار­ناعان جولداۋىن زور ىقىلاسپەن تىڭداعانىن, اسىرەسە جۇمىسشى مامانداردىڭ بەدەلى ارتا تۇسەتىنىنە ەرەكشە قۋانعانىن جەتكىزدى. مەم­لەكەت باسشىسى جۇمىسشىلارعا وندىرىستەگى جەرگىلىكتى ۇلەستى ارتتىرۋ, بىلىكتى ماماندار دايارلاۋ جانە اۋىل شارۋاشىلىعى تەحنيكالارىن جاڭارتۋ قاجەت ەكەنىن ايتتى.

«ەلىمىزدە توزىعى جەتكەن تەحنيكالار وتە كوپ. كەيبىر مامانداردىڭ ايتۋىنشا, ول 80 پايىزعا دەيىن جەتكەن. قازاقستاندا شىعارىلعان تەحنيكانىڭ ەسەبىنەن بارلىق پاركتى جاڭارتاتىن ۋاقىت كەلدى. قازىر كوللەدجدەردە جۇمىسشى ماماندىقتار بويىنشا ءبىلىم العان جاستاردىڭ وندىرىسكە كەلگەنى قۋانتادى», دەدى قاسىم-جومارت توقاەۆ.

ءوز كەزەگىندە زاۋىت ەڭبەككەرلەرى ماشينا جاساۋشىلاردىڭ اتىنان پرەزيدەنتكە جۇمىسشى ماماندارعا قولداۋ كورسەتكەنى ءۇشىن العىس ايتتى.

فەرمەرلەردى قولداۋ جالعاسادى

مەملەكەت باسشىسى قوستاناي اۋدانىنىڭ مايكول اۋىلدىق وكرۋگىن­دەگى «نادەجدينكا» جاۋاپكەر­شىلىگى شەكتەۋلى سەرىكتەستىگىندە بولىپ, اۋىل شارۋاشىلىعى تاۋارلارىن وندىرۋشىلەرمەن كەزدەستى.

قاسىم-جومارت توقاەۆقا وبلىس اكىمى وڭىردەگى اۋىل شارۋاشىلىعىن دامىتۋ شارالارى جونىندە مالىمەت بەردى.

قۇمار اقساقالوۆتىڭ باياندا­ۋىنشا, بيىل ديقاندار 5 ميلليون گەكتار القاپقا ەگىن ەككەن. ەليتالىق تۇقىمنىڭ ۇلەسى مەن مينەرالدى تىڭايتقىشتاردى سەبۋ كولەمىن ۇلعايتۋ, سونداي-اق ماشينا-تراكتور پاركىن جاڭارتۋ ارقىلى ەگىن شارۋاشىلىعى ونىمدىلىگىن ارتتىرۋ جوسپارلانىپ وتىر.

سونداي-اق مەملەكەت باسشىسىنا وڭىردە مال جانە قۇس شارۋاشى­لىعى سالالارىن دامىتۋ تۋرالى باياندالدى. اتاپ ايتقاندا, ال­داعى ءۇش جىلدا 14 تاۋارلى ءسۇت فەرماسىنا ينۆەس­­تيتسيا تارتىلادى. مال شارۋا­شىلى­عىنا ارنالعان 44 كەشەن جانە ەكى ءىرى قۇس فابريكا­سى سالىنادى. اتالعان جوبالار ەسەبى­نەن وبلىستاعى ءسۇت جانە ەت ءون­­دىرۋ كولەمى 1,4 ەسە, ال قۇس ەتى ءوندى­­رىسى 5 ەسە كوبەيەدى. بۇعان قوسا بىر­­قاتار ين­ۆەس­تيتسيالىق جوبانى جۇزەگە اسى­رۋ ناتيجەسىندە ءۇش جىل ىشىندە تەرەڭ وڭدەلەتىن ونىمدەردىڭ ۇلەسىن 70 پا­يىزعا دەيىن جەتكىزۋ مىندەتى قويىلعان.

پرەزيدەنت «نادەجدينكا» جشس-نىڭ ەگىس القابىن ارالاپ كورىپ, اۋىل شارۋاشىلىعى ەڭبەككەرلەرىمەن اڭگىمەلەستى.

مەملەكەت باسشىسى ەگىندى ۋاق­تىلى جيناپ الۋ, ەڭبەك ونىمدى­لىگىن ارتتىرۋ جانە اگرارلىق سالاعا جاڭا تەحنولوگيالار ەنگىزۋ, اۋىل شارۋاشىلىعى جەرلەرىن ماقساتقا ساي پايدالانۋ ماڭىزدى ەكەنىن اتاپ ءوتتى. قاسىم-جومارت توقاەۆ مەملەكەت وتاندىق فەرمەرلەردى قولداۋدى جالعاستىراتىنىن جانە تابىستى جوبالاردى جۇزەگە اسىرۋعا كومەك كورسەتەتىنىن جەتكىزدى.

دارىندى بالالارمەن جۇزدەستى

مەملەكەت باسشىسى وڭىرگە جۇمىس ساپارى بارىسىندا قوستاناي قالاسىنداعى دەنەشىنىقتىرۋ-ساۋىقتىرۋ كەشەنىن ارالاپ كوردى. «يۋبيلەينىي» شاعىن اۋدانىندا ورنالاسقان سپورت نىسانى تاياۋدا عانا پايدالانۋعا بەرىلگەن. مۇندا جەرگىلىكتى تۇرعىندار سپورتتىڭ شاعىن فۋتبول, باسكەتبول, ۆولەيبول جانە ۇستەل تەننيسى سياقتى تۇرلەرىمەن ەمىن-ەركىن اينالىسا الادى. سونداي-اق ورتالىقتا جاتتىعۋ جانە حورەوگرافيا زالدارى جۇمىس ىستەيدى. ەرەكشە قاجەتتىلىگى بار جاندارعا ءتيىستى جاعداي جاسالعان.

قوستاناي قالاسىنىڭ اكىمى مارات جۇندىباەۆ پرەزيدەنتكە وبلىس ورتا­لىعىندا بۇقارالىق سپورتتى دامىتۋ شارالارى تۋرالى مالىمەت بەردى. ونىڭ ايتۋىنشا, قالا تۇرعىندارىنا دەنەشىنىقتىرۋ نىساندارىنىڭ قولجەتىمدىلىگىن قامتاماسىز ەتۋگە باسا نازار اۋدارىلادى.

مەملەكەت باسشىسى كەشەندەگى زالداردى ارالاپ كورىپ, جەرگىلىك­تى تۇرعىندارمەن جانە جاس سپورتشىلارمەن اڭگىمەلەستى.

قاسىم-جومارت توقاەۆ قوستاناي قالاسىنداعى بالالارعا ارنالعان «IQostanay smart» ورتالىعىنىڭ قىز­مەتىمەن تانىستى. قازىرگى ۋاقىتتا مۇندا ەكى مىڭعا جۋىق وقۋشى قوسىمشا ءبىلىم الادى. وسكەلەڭ ۇرپاقتىڭ يگىلىگى ءۇشىن 24 ۇيىرمە جۇمىس ىستەيدى. وقۋشىلار سارايىن­دا جوعارى تەحنولوگيالىق قۇرالدارمەن جابدىقتالعان كيبەرسپورت, ينجەنەريا, اۆيامودەلدەۋ كابينەتتەرى, جاڭارتىلاتىن ەنەرگيا كوزدەرى, حيميا جانە فيزيكا-تەحنيكالىق زەرتحانالارى, سونداي-اق ءماجىلىس, وقۋ جانە حورەوگرافيا زالدارى بار. ورتالىقتاعى روبوت تەحنيكاسى, ينجەنەريا جانە اۆيامودەلدەۋ ۇيىرمەلەرىنە قاتىساتىن بالالار پرەزيدەنتكە ءوز جوبالارىن تانىستىرىپ, ۆيرتۋالدى زەرتحانادا تاجىريبە جاساپ كورسەتتى.

«بولاشاقتا ءوز ءبىلىم-بىلىكتەرىڭىزدى ىسكە اسىرۋعا مول مۇمكىندىك بار دەپ ويلايمىن. ويتكەنى مۇنىڭ ءبارى قازىرگى زاماندا, ەكونوميكادا جانە باسقا دا سالالاردا سۇرانىسقا يە. ءبىز ۋاقىت تالابىنا ساي تەحنولوگيانى مەڭگەرگەن ۇلتقا اينالۋىمىز قاجەت. ەلىمىزگە وتاندىق تەحنولوگيانى دامىتاتىن سىزدەر سەكىلدى ازاماتتار كەرەك», دەدى مەملەكەت باسشىسى.

وقۋشىلار پرەزيدەنتكە تەحنيكا­لىق ماماندىقتارعا ارنالعان ءبىلىم گرانتتارىن كوبەيتكەنى ءۇشىن العىس ايتتى.

قوستاناي وبلىسى