«قازانات» يپپودرومىنىڭ ماڭىنان ىرگە تەپكەن ەتنواۋىلدا اۋدارىسپاقتان دۇنيەجۇزىلىك كوشپەلىلەر ويىندارىنىڭ تارتىسى باستالدى. 9 مەملەكەتتەن اتان جىلىك, ءاپايتوس تولاعايلار قاتىسۋعا ىقىلاس تانىتقان دودادا بالۋاندارىمىز بارىن سالۋعا بىلەك سىبانىپ وتىر.
قىرعىزستان, وزبەكستان, موڭعوليا, تۇركيا, ماجارستان, قىتاي, اقش جانە رەسەيدەن كەلگەن سپورتشىلاردىڭ وسالى جوق. دەسە دە ۇلتتىق قۇراماداعى ەرمەك قۇرالباي, المات لاتىپبەك, دارىن وتكەلباي, ەسىمحان ءراحماتىللا, سىرىم ءىزباساروۆ جانە ءبىرجان قوساليەۆ سىندى ۇزدىكتەرگە زور سەنىم ارتامىز.
جاستار اراسىنان ەرەسەكتەر دۋىنا قوسىلعانىنا كوپ بولا قويماعان دارىن وتكەلباي 80 كگ سالماقتا باستى قارسىلاسى سانالعان قىرعىز بالۋانى قالىبەك بۇسىرمانقۇل ۇلىن اتىنان اۋدارىپ تاستادى.
«اۋدارىسپاقتان ەكى دۇركىن الەم چەمپيونى اتاندىم, ەندى ءوز جەرىمىزدە ءوتىپ جاتقان دۇنيەجۇزىلىك كوشپەلىلەر ويىندارىندا جەڭىسكە جەتۋدى ماقسات تۇتىپ وتىرمىن. قۋانارلىعى, باستى قارسىلاس سانالعان قىرعىزستاندىق سپورتشىدان باسىم ءتۇستىم. تاجىريبەسى مول, مەنەن جاسى دا ەداۋىر ەرەسەك وتە تەگەۋرىندى بالۋان. اۋدارىسپاقتان حالىقارالىق دودالارعا قاتىسىپ ىسىلعان», دەدى دارىن.
ەندى ول التىن ءۇشىن ايقاستا نوديرجان جۋنايدۋللاەۆتىڭ كۇشىن سىناپ كورەدى.
70 كگ سالماقتا المات لاتىپبەككە جەرەبە جەڭىل تۇسكەن جوق. ءبىرىنشى اينالىمدا موڭعوليا قۇراماسىنىڭ نامىسىن قورعاعان قازاق ەركىنبەك ءومىرتايدى جىقتى. دۇنيەجۇزىلىك كوشپەلىلەر ويىندارىنىڭ التىن مەدالى ءۇشىن قىرعىزستاندىق باقىتگۇل رايحان ۇلىمەن تارتىسقا تۇسەدى. بۇل سالماقتىڭ قولا مەدالى موڭعوليالىق ەركىنبەك ءومىرتاي مەن وزبەكستاندىق كوديرجان ەگامبەرديەۆكە بۇيىردى. 60 سالماقتا ەرتەك قۇرالباي دا فينالعا ءوتتى, ول التىن مەدال ءۇشىن سايىستا قىرعىز بالۋانى جەكسەنبەك تۇردىبەكپەن تارتىسادى.