كوكپاردان دۇنيەجۇزىلىك كوشپەلىلەر ويىندارىنىڭ توپتىق كەزەڭدەگى تارتىسىن باستاعان ەلىمىزدىڭ قۇراماسى ءىرى ەسەپپەن جەڭىسكە جەتتى. ا توبىندا وزبەكستان ۇلتتىق قۇراماسىنا قارسى ويناعان كوكپارشىلار 16:0 ەسەبىمەن ايقىن ۇتتى.
ۇلتتىق قۇرامانىڭ باس باپكەرى اقىلباي مانكەەۆ وزبەك كوكپارشىلارىنىڭ السىزدىك تانىتۋىنا ءوز اتتارىن اكەلمەۋى اسەر ەتكەنى ايتادى.
ء«دۇبىرى ءدۇيىم جۇرتقا جايىلعان كوشپەلىلەر ويىندارىنىڭ ءىزاشار تارتىسىن وتكىزگەن قۇراما ويىنشىلارى جەڭىسكە جەتكەنى قۋانتىپ وتىر. تاكتيكالىق جوسپاردىڭ ورىندالۋىن, جىگىتتەردىڭ فيزيكالىق دايىندىعىن دا بايقاپ كوردىك. وسى قارقىندى باسەڭدەتپەي, كوكپاردان دۇنيەجۇزىلىك كوشپەلىلەر ويىندارىنىڭ چەمپيونى اتانۋعا بارىمىزدى سالامىز», دەدى باس باپكەر.
ۇلتتىق قۇراما مۇشەسى ابىلايحان نىشانبەكوۆ قاشاندا العاشقى ويىننىڭ جەڭىل سوقپايتىنىن ايتتى.
«اتتاردىڭ دا كۇشىن, ءوزىمىزدىڭ دە قارىمىمىزدى سىناپ كوردىك. قارسىلاس كوماندانى ويسىراي ۇتىلعانىنا قاراپ وسال دەۋگە كەلمەيدى. ءبىزدىڭ جىگىتتەر بارىن سالىپ, ءوز شەبەرلىگىن كورسەتتى. الدا ءالى دە تارتىستى ويىندار كۇتىپ تۇر, جانكۇيەرلەردى قولداۋعا شاقىرامىز», دەدى ا.نىشانبەكوۆ.
كوكپاردان ۇلتتىق قۇراما ەندى ءوز توبىندا رەسەي, قىتاي, اقش قۇراما كومانداسىنا قارسى ويىن وتكىزەدى. ۆ توبىندا قىرعىزستان, موڭعوليا, ماجارستان, تۇركيا قۇرامالارى سىنعا تۇسەدى. كەشە ا توبىنداعى ءبىرىنشى ويىندى وتكىزگەن رەسەي قۇراماسى قىتاي كوكپارشىلارىن 4:1 ەسەبىمەن ۇتتى.
دۇنيەجۇزىلىك كوشپەلىلەر ويىندارىنا كوكپاردان 9 مەملەكەتتىڭ كومانداسى قاتىسادى. جالپى, 104 كوكپارشى تىركەلگەن. سايىس «قازانات» يپپودرومىنىڭ الاڭىندا ءوتىپ جاتىر.