اتىراۋ وبلىسىندا مۇناي مەن گاز جىلىوي, ماقات, يساتاي جانە قىزىلقوعا اۋدانىنداعى كەن ورىندارىنان وندىرىلەدى. اسىرەسە جىلىوي اۋدانىندا «قارا التىن» الىناتىن كەنىش كوپ.
ءوندىرىستى دامىتۋعا 69 ملرد تەڭگە بولىنگەن
سونىڭ ءبىرى – «ايرانكول» كەن ورنى. اتاۋىنىڭ «قارا التىنعا» ەمەس, تاعام تۇرىنە قاتىسى جونىندە دەرەك جوق. كەن ورنىنىڭ ماڭىنان كول دە كورىنبەيدى. دەگەنمەن بۇل كەن ورنى اتىراۋ قالاسىنان 215, جىلىوي اۋدانىنىڭ ورتالىعى قۇلسارى قالاسىنان 40 شاقىرىم قاشىقتا ورنالاسقان. اتالعان كەنىشتەن «كاسپي مۇناي» اق-نىڭ مۇنايشىلارى 2006 جىلدان بەرى مۇناي ءوندىرىپ كەلەدى.
كومپانيا باس ديرەكتورىنىڭ ءوندىرىس جونىندەگى ورىنباسارى ءالنۇر شامشيەۆتىڭ دەرەگىنە جۇگىنسەك, كەن ورنى 1979 جىلى اشىلعان. ال مۇناي ءوندىرۋ ءىسى 2000 جىلى باستالعان. مۇناي قورى شامامەن 5,8 ملن توننانى قۇرايدى. باررەلمەن باعالاناتىن «قارا التىن» 1 600–2 500 مەتر تەرەڭدىكتەن الىنادى.
ء«بىزدىڭ كومپانيادا ءبىر عانا كەن ورنى بار. بۇل – «ايرانكول» كەن ورنى. مۇندا 219 ادام جۇمىس ىستەيدى. مۇنايشىلاردىڭ 79 پايىزى – اتىراۋ وبلىسىنىڭ تۇرعىندارى. 90 پايىزىن جىگىتتەر, 10 پايىزىن ايەلدەر قۇرايدى. ارىپتەستەرىمىزدىڭ ورتاشا ەڭبەك وتىلىنە 10 جىل بولعان», دەيدى ءا.شامشيەۆ.
ونىڭ ايتۋىنشا, كەن ورنىندا ءوندىرىستىڭ تيىمدىلىگىن ارتتىرۋعا, قورشاعان ورتاعا اسەردى ازايتۋعا باسا ءمان بەرىلىپ وتىر. وسى ماقساتتا زاماناۋي تەحنولوگيالاردى ەنگىزۋگە قوماقتى ينۆەستيتسيا سالىنعان. ماسەلەن, كەيىنگى 10 جىلدا ءوندىرىستى دامىتۋعا 69 ملرد تەڭگە بولىنگەن. ال 2016 جىلدان بەرى مۇناي قورى مەن ءوندىرۋدى ۇلعايتۋ ءۇشىن 59,7 ملرد تەڭگە ينۆەستيتسيالىق قارجى جۇمسالعان.
مۇناي عانا ەمەس, گاز دا شىعادى
«مۇندا مۇناي ءوندىرۋ, دايىنداۋ جاڭا تەحنولوگيامەن ىسكە اسىرىلادى. باسقاشا ايتقاندا, قورشاعان ورتاعا توگىلىپ, توپىراق قاباتىنا اعىپ جاتقان مۇناي جوق. ماسەلەن, جەر استىنان وندىرىلگەن «قارا التىندى» جيناۋ بەكەتتەرىنە جاڭا تەحنولوگيالار ورناتىلدى. تۇتقىرلىعى جوعارى مۇناي جاڭادان ورناتىلعان ابزۆن قوندىرعىسىمەن ولشەنەدى. ماسەلەن, مۇناي ولشەۋ بەكەتىنىڭ بىرەۋىنە ءبىر مەزگىلدە قۇبىرمەن 14 ۇڭعىمادان ءونىم جەتكىزىلەدى. سودان سوڭ ءونىم تۇندىرعىش سەپاراتورىنا تۇسەدى. مۇندا مۇناي قۇرامىنداعى ىلەسپە سۋدىڭ 95 پايىزى ءبولىنىپ الىنادى. تازارتىلعان ءونىم «DÜCHTING PUMPEN» كومپانياسى شىعارعان سورعىمەن مۇناي دايىنداۋ بەكەتىنە ايدالادى. بۇل بەكەتتە ءونىم تاۋارلىق ساپاعا دەيىن دايىندالادى», دەپ ءتۇسىندىردى ءا.شامشيەۆ.
قازىر «ايرانكولدە» 200 ۇڭعىما مۇناي بەرىپ تۇر. ونىڭ ىشىندە 43 ۇڭعىما تەلەمەترياعا قوسىلعان. وسىلايشا, ۇڭعىما ەرنەۋى مەن سورعى پارامەترلەرىنە مونيتروينگ جۇرگىزىلىپ وتىر. كەن ورنىنان جىلىنا 900 مىڭ توننا «قارا التىن» وندىرىلەدى. شيكىزاتتىق كومىرسۋتەكتىڭ 50 پايىزى وتاندىق زاۋىتتارعا جەتكىزىلەدى. مۇنايمەن بىرگە جىلىنا 20 ملن تەكشە مەتر شاماسىندا ىلەسپە گاز الىنادى. ىلەسپە گاز اۋاعا جاعىلمايدى. كوگىلدىر وتىن كەن ورنىنداعى ۆاحتالىق كەنتتەگى قاجەتتىلىككە جانە وندىرىستىك قوندىرعىلارعا قولدانىلادى.
كاسىپورىن قىزمەتى ونلاين جۇيەمەن جابدىقتالعان
وندىرىسكە ەنگىزىلگەن جاڭا تەحنولوگيانىڭ ءبىرى – «Smart Field» جۇيەسى. بۇل تەحنولوگيا كەن ورنىنداعى جۇمىستىڭ ءبارىن ونلاين باقىلاۋعا جول اشتى. سونداي-اق جاھان ەلدەرى قىزىعۋشىلىق تانىتقان ESG ستاندارتتارىنا سايكەس جاسىل تەحنولوگيالاردى ەنگىزۋدى كوزدەيتىن دامۋ ستراتەگياسى بار.
«Smart Field Airankol» جەدەل باسقارۋ ورتالىعىندا مۇناي وندىرۋگە قاتىسى بار ءىستىڭ ءبارى ايناداعىداي كورىنىپ تۇر. تسيفرلاندىرۋ جانە اقپاراتتىق تەحنولوگيا ءبولىمىنىڭ باسشىسى المات يماشەۆتىڭ ايتۋىنا قاراعاندا, ارنايى ماماندار كەن ورنىنداعى مۇناي وندىرىلەتىن ۇڭعىمالارعا ءبىر ورتالىقتان باقىلاۋ جۇرگىزەدى.
«وزىق تەحنولوگيانىڭ كومەگىمەن قۇبىرداعى مۇنايدىڭ قىسىمى, تەمپەراتۋراسى, كولەمى ناقتى دالدىكپەن كورىنىپ تۇرادى. ۇڭعىمالاردان مۇناي جيناۋ, دايىنداۋ بەكەتتەرىنە تارتىلعان قۇبىر بويىندا اقاۋ انىقتالسا, قىسىم تومەندەپ, مۇناي اعىنىنىڭ كولەمى ازايسا, ماماندار «قارا التىن» الاتىن سورعىعا جەدەل جەتەدى. ماماندار ورتالىقتاعى مالىمەتتەردى تاۋلىك بويى ءجىتى قاداعالايدى», دەيدى ول.
ءالنۇر شامشيەۆتىڭ پىكىرىنە سۇيەنسەك, «Smart Field» تەحنولوگياسىنىڭ ءتيىمدى جۇيە ەكەنى بايقالىپ وتىر. اسىرەسە «Odoo» باعدارلاماسى – مۇنايشىلاردىڭ قۇجاتىن, مەديتسينالىق ساقتاندىرۋ, ىسساپارعا بارۋ, ەڭبەك دەمالىسىنا شىعۋ كەزەڭىن ونلاين قاداعالاۋعا تاپتىرمايتىن ءتاسىل. مۇنايشىلار قولىنا قاعاز ۇستاپ, كابينەت ارالاپ جۇرمەيدى. ارنايى باعدارلامادا ىسساپارعا باراتىن مۇنايشى تۋرالى مالىمەت دايىن تۇرادى. سونداي-اق جول ءجۇرۋ بيلەتىن الۋ, ىسساپارعا بارۋ-قايتۋ شىعىنى, بۇيرىق شىعارۋ, قول قويۋ تولىعىمەن ونلاين رەجىمدە اتقارىلادى.
«كەن ورنىنداعى بارلىق جۇمىسقا قاشىقتان باقىلاۋ جۇرگىزىلەدى. ورتالىقتا مۇناي ءوندىرۋ, قۇبىر بويىنداعى, مۇناي, سۋ جينايتىن قازاندىقتارداعى بارلىق دەرەك كورىنىپ تۇرادى. ينجەنەرلەر كەنىشتەگى احۋالدى قالت جىبەرمەيدى. مۇناي وندىرىلەتىن اۋماق, جالپى كەن ورنى درونمەن باقىلانىپ, كۇدىك تۋدىرعان دەرەكتىڭ ءبارى تىركەلەدى», دەيدى ءا.شامشيەۆ.
كومپانيا – ۇزدىك 50 سالىق تولەۋشى قاتارىندا
بيىل كومپانيانىڭ وندىرگەن 1 توننا مۇناي ءۇشىن تولەنەتىن سالىق كورسەتكىشى ارتقان. سالىقتىڭ وسى ءتۇرى بويىنشا «تەڭىزشەۆرويل» جشس-دان كەيىنگى ەكىنشى ورىندا تۇر. باس ديرەكتوردىڭ قارجى جانە ەكونوميكا جونىندەگى ورىنباسارى تۇرار ابدىباەۆتىڭ دەرەگىنشە, مۇنايشىلارعا جالاقى كەشىكتىرىلمەي بەرىلەدى.
«وندىرىسكە ەنگىزىلگەن جاڭا تەحنولوگيا مۇنايدى وندىرۋگە, دايىنداۋعا جۇمسالاتىن شىعىندى ازايتتى. جۇمىس تيىمدىلىگى مەن كىرىس ارتتى. ەڭ تومەنگى جالاقى 850 مىڭ تەڭگەدەن باستالادى. جالاقى مۇنايشىنىڭ ەڭبەك ءوتىلى مەن لاۋازىمىنا بايلانىستى تولەنەدى. كومپانيانىڭ ەسەبىنەن ماماندار بىلىكتىلىگىن جەتىلدىرىپ, وقۋ ورتالىعىندا جاڭا تەحنولوگيا مەڭگەرۋ كۋرسىنان وتەدى. زەينەتكە شىققان جۇمىسشىلارعا 10 ايلىق جالاقى مولشەرىندە بىرجولعى تولەم بەرىلەدى. كەيىنگى ون جىلدا 551 ملرد تەڭگە سالىق تولەندى. كومپانيا 2022 جىلدان بەرى ەلىمىزدەگى ەڭ ءىرى 50 سالىق تولەۋشىنىڭ قاتارىنا كىردى», دەيدى ت.ابدىباەۆ.
مۇنايشىلار 14 كۇندىك اۋىسىممەن جۇمىس ىستەيدى. ءبىر اۋىسىمدا 110 مۇنايشى بار. جۇمىس بەرۋشى مەن مۇنايشىلار اراسىندا ەڭبەك داۋى جوق. تابىسى مول, بىرلىگى جاراسقان كومپانياعا ءجاميلا عۇماروۆانىڭ جۇمىسقا ورنالاسقانىنا 20 جىل بولىپتى.
«ۆاحتالىق جۇمىسقا اتىراۋ قالاسىنان كەلەمىن. جاز مەزگىلىندەگى اپتاپ, قىستاعى سۋىق اعزاعا دا, كوڭىل-كۇيگە دە اسەر ەتەدى. ونىڭ ۇستىنە, جۇمىستان كەيىن شارشاۋ بولادى عوي. ۆاحتالىق كەنتتەگى جاتاقحانادا شارشاعانىڭدى باساتىن, كۇندەلىكتى تۇرمىسقا قولايلى جاعداي جاسالىپ وتىر. تۇراقتى جۇمىسىمىز بار, جالاقىمىز كەشىكتىرىلگەن ەمەس. مەرەكەلەرگە بايلانىستى سىياقى بەرىلەدى», دەيدى ءجاميلا عۇماروۆا.
«ايرانكول» كەن ورنىنىڭ اۋماعىندا مۇنايدى جيناۋ, دايىنداۋ بەكەتتەرى, ەلەكتر ستانساسى بار. ۆاحتالىق كەنتتەگى جاتاقحانالار 120 ورىنعا ەسەپتەلگەن. ونىڭ ماڭىندا جاسىل جەلەك كوپ. 2021-2023 جىلدارى 820, بيىل 100 كوشەت ەگىلگەن. مۇنايشىلار ءۇشىن سپورت زال, فەلدشەرلىك بەكەت, مونشا-كىر جۋ كەشەنى اشىلعان. اسحانادا ءبىر مەزگىلدە 100 ادام تاماق ىشەدى. ءدامى ءتىل ۇيىرەتىن اس ءمازىرى كۇن سايىن وزگەرتىلەدى. ۇلكەن شاھارداعى مەيرامحانالاردىڭ اس مازىرىنەن كەم ەمەس.
اتىراۋ وبلىسى