سۇڭقارلار سايىسىنىڭ ءجونى بولەك

اۋىل شارۋاشىلىعى مينيسترلىگى ۆەتەري­ناريالىق باقىلاۋ جانە قاداعالاۋ كوميتەتىنىڭ استانا قالاسى بويىنشا اۋماق­تىق ينسپەكتسياسىنىڭ, ەلوردا اكىمدىگىنىڭ, «استانا ۆەت­سەرۆيس» كمم-نىڭ وكىلدە­رى نىسانداردى ارالاپ كوردى. كوش­پەلىلەر ويىندارىندا سپورت­شىلار مىنەتىن جىلقى­لار «ار­عىماق» ات-سپورتتىق سا­ۋىقتىرۋ كەشەنى مەن «قا­زانات» يپ­پو­درومىنىڭ قو­رالارىنا بايلانادى.

ەتنوسپورت دوداسىنا قۇسبە­گىلىك سايىس بويىنشا بار­لىعى 45 باس قۇس قاتىسادى. ەلور­داعا ەلىمىزدىڭ ساياتشىلارى باپ­تاعان قىراندارىنان سىرت موڭ­عوليادان 3 باس بۇركىت, قىر­عىز­ستاننان 3 باس بۇركىت, 3 باس يتەل­گى, 3 باس قارشىعا جەتكىزىلەدى. قۇستار استانالىق تسيرككە جاي­عاستىرىلىپ, قاۋىپسىزدىك شاراسى قاتاڭ ساقتالادى.

كوشپەلىلەر ويىندارىندا قۇسبەگىلەر بۇركىت, قارشىعا, جانە سۇڭقار سايىسى بويىنشا شەبەرلىك كورسەتەدى. كوماندا قۇرامىندا ءۇش قۇسبەگى, ءبىر باپكەر ءھام ءبىر ۆەتەرينار مامان بولادى. 18 جاستان اسقان سپورتشىلار عانا قاتىسا الادى. سايىستا سۇڭقاردى جەمتىككە ۇشىرىپ ابجىلدىگىن سىنايدى. 3 مينۋت ىشىندە اۋەلەپ ۇشقان سۇڭقار جەردەگى جەمتىككە نەشە مارتە شۇيىلگەنى جانە قانشا ۋاقىتتا جەتكەنىن تورەشىلەر ەسەپكە الىپ باعالايدى.

بۇركىت سالۋدان دا ءار كوماندادا ءۇش سپورتشى بولادى. ولار ەكى جاتتىعۋ بويىنشا قىراندارىنىڭ شەبەرلىگىن پاش ەتەدى. الدىمەن قولعا شاقىرسا, ەكىنشى سىناقتا شىرعاعا تۇ­سىرۋدەن ەپتىلىگىن ايگىلەيدى. تو­رەشىنىڭ بەلگىسىنەن كەيىن قولى­نا جەمتىك ۇستاعان بۇركىتشى اقيىعىن وزىنە شاقىرادى.

قارشىعاسىن باپتاپ كەلگەن قۇسبەگىلەر دە وسى تالاپپەن قاتىسادى. قىراعى قۇسىنىڭ ۇشقىرلىعى, جەردەگى جەمتىككە نەشە مارتە ءشۇيىلىپ تۇسكەنى سارالانادى. كوشپەلىلەر ويىندارىندا ساياتشىلاردىڭ سايىسى رەسپۋبليكالىق «قۇسبەگىلىك» فەدەراتسياسىنىڭ ەرەجەسىمەن ۇيىمداستىرىلادى.