بۇگىندە ەلىمىزدىڭ شىعىسىنداعى شالعاي ەلدى مەكەندەردە ساپارىن جالعاستىرىپ جاتقان «سالاماتتى قازاقستان» پويىزىنىڭ مەديتسينا قىزمەتكەرلەرى وتكەن اپتادا, ياعني 26 تامىز بەن 1 قىركۇيەك ارالىعىندا اقىسىز 613 ادامنىڭ دەنساۋلىعىن قارادى, ولاردىڭ 180-ءى – بالا. جىلجىمالى قۇرامداعى مەدياتور مەن زاڭگەر ماماندار بولسا, ءتيىستى مەرزىمدە الەۋمەتتىك-ەڭبەك قۇقىعى ماسەلەلەرى بويىنشا شىعىس قازاقستان مەن اباي وبلىستارىنىڭ 177 تۇرعىنىنا كەڭەس بەردى.
مامىر ايىنىڭ باسىندا ساپارعا شىققان پويىز ۇجىمى بۇعان دەيىن ماڭعىستاۋ, اتىراۋ, اقتوبە, باتىس قازاقستان, قوستاناي, اقمولا, سولتۇستىك قازاقستان جانە پاۆلودار وبلىستارىندا بولدى. 44 610 ازاماتتى (ونىڭ ىشىندە 13 034 بالا) مەديتسينالىق قىزمەتپەن قامتىعان دارىگەرلەر ەڭبەگىنەن تىس, مەدياتور مەن زاڭگەرلەر 2 431 ارىزدى قاراستىرىپ, جەرگىلىكتى ازاماتتاردىڭ قۇقىقتىق, ەڭبەك كيكىلجىڭدەرىن شەشۋگە كۇش سالدى. ماسەلەن, اۋىل, بەلاعاش, تيشينسكايا جانە چەرەمشانكا ستانسالارىندا پويىز زاڭگەرلەرى كوپبالالى وتباسىلارعا, مۇگەدەكتى بار ادامدارعا, زەينەتكەرلەرگە قولۇشىن سوزىپ, مۇراگەرلىك, شيپاجايدا ەمدەلۋ, شاعىن قارجى ۇيىمدارىنا بەرەشەك, زەينەتاقىنى الدىن الا ەسەپتەۋ, اليمەنت, م ۇلىكتى ءبولۋ, سالىق ەسەبىن تاپسىرۋ, ەڭبەك داۋلارى بويىنشا ارىز-شاعىمداردى زەردەلەدى.
«سالاماتتى قازاقستان» پويىزىندا زاڭگەرلەردى كورىپ تاڭعالدىم. مەدياتور شولپان اعزامقىزى مەنى مۇقيات تىڭداپ, ماسەلەمدى شەشىپ بەردى, كونستيتۋتسيا كۇنى ەڭبەك قۇقىعىمدى لايىقتى قورعاي الدى. كاسىبي, ساۋاتتى تۇردە كورسەتىلگەن كومەككە شىن جۇرەكتەن العىس ايتقىم كەلەدى», دەيدى اباي وبلىسىنىڭ اۋىل ستانساسىندا قۇقىقتىق كەڭەسكە جۇگىنگەن كوپبالالى انا. ناتيجەسىندە بۇل تۇرعىنعا بالا كۇتىمىنەن سوڭ جۇمىسقا شىققاندا مەكتەپتە قىسقارىپ قالعان ەڭبەك ساعاتتارى, ياعني وتباسى كىرىسى قايتا قالپىنا كەلتىرىلدى.
پويىز ۆاگوندارىندا قابىلداۋ 13.00–14.00 تۇسكى ۇزىلىسپەن ساعات 09.00–18.00 ارالىعىندا جۇرگىزىلەدى. ازاماتتاردا وزدەرىمەن بىرگە جەكە كۋالىگى بولسا جەتكىلىكتى.
وسى ورايدا شىعىس ايماقتا ورنالاسقان التاي, تاۋسامالى بەكەتتەرىندە پويىز جانىندا دەمەۋشىلەردىڭ قولداۋىمەن ارنايى قايىرىمدىلىق كونتسەرتتەرى ءوتىپ جاتىر. كونتسەرتتەر لەگى وڭىرلەردە جىل اياعىنا دەيىن جالعاسادى.
ەلىمىزدىڭ بارلىق وڭىرىندەگى 140 الىس بەكەت پەن ولاردىڭ ماڭايىنداعى اۋىل-ايماققا تەگىن مەديتسينالىق-الەۋمەتتىك كومەك كورسەتۋگە ارنالعان پويىزدىڭ قوزعالىس كەستەسى شالعاي مەكەندەردە مەديتسينالىق پۋنكتتەردىڭ جوقتىعىن ەسكەرە وتىرىپ جانە ازاماتتار مەن مەملەكەتتىك ورگانداردىڭ ءوتىنىشى نەگىزىندە ازىرلەندى. جوبا دارىگەرلەرى ورتاشا العاندا ءار ستانساعا 1-2 كۇن توقتاپ, اۋىل تۇرعىندارىنا العاشقى مەديتسينالىق-سانيتارلىق جانە كونسۋلتاتسيالىق-دياگنوستيكالىق كومەك كورسەتەدى. زەرتحانالىق ادىستەردى قولدانا وتىرىپ ناۋقاستاردى تەكسەرەدى.
قۇرام قىزمەتىنە 40 مامان جۇمىلدىرىلدى. اتاپ ايتقاندا, دەنساۋلىق كەرۋەنىندە تەراپەۆت, حيرۋرگ, پەدياتر, پسيحولوگ, نەۆروپاتولوگ, ۋلترادىبىستىق دياگنوستيكا, جالپى تاجىريبە دارىگەرى, رەنتگەنولوگ, جۇرەك, ءتىس, كوز, قۇلاق, تاماق جانە مۇرىن دارىگەرى, ونكولوگ-ماممولوگ, گينەكولوگ جانە ۋرولوگ سىندى بىلىكتى دارىگەرلەر جانە كومەكشى ماماندار بار. قاجەت جاعدايدا دارىگەرلەر شاعىن وپەراتسيالار جۇرگىزىپ, جوسپارلى ەمدەۋگە جولداما بەرەدى. ال مەدياتور مەن زاڭگەر حالىققا داۋدى سوتقا دەيىن شەشۋ سەكىلدى وزەكتى ماسەلەلەر جونىندە كەڭەس بەرىپ, ازاماتتاردىڭ زەينەتاقى-جاردەماقى, الەۋمەتتىك تولەم جانە اتاۋلى الەۋمەتتىك كومەك الۋ تۋرالى سۇراقتارىنا جاۋاپ بەرەدى.
الەۋمەتتىك جوبا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى جانە دەنساۋلىق ساقتاۋ مينيسترلىگىنىڭ ءوزارا ىنتىماقتاستىعى نەگىزىندە جۇزەگە اسىپ جاتىر.
«كوبىنەسە شالعاي اۋىلداردا اۋرۋحانالار بولمايدى جانە تۇرعىنداردىڭ بارلىعى كەز كەلگەن ۋاقىتتا اۋدان ورتالىعىنا بارا المايدى. ونىڭ ۇستىنە بيىل, بارشاڭىزعا بەلگىلى, بىرقاتار ءوڭىردى سۋ الىپ, قيىندىق تۋىندادى. ال مەديتسينالىق پويىز جاعدايىندا بالالاردى قاراتىپ, ەرەسەكتەردىڭ وزىنە دە بارلىق ماماننان بىردەن كەڭەس الۋدىڭ جاقسى مۇمكىندىگى تۋىندادى. پويىزعا ەڭ زاماناۋي مەديتسينالىق جابدىقتار قويىلىپ, ءتىپتى ادامدارعا شاعىن وتالار جاساۋ قاراستىرىلعان», دەيدى الفيا اديەۆا.
جالپى, 2010–2023 جىلدار ارالىعى مەديتسينالىق پويىزدار 1 991 ستانسادا بولىپ, 658 407 ادامنىڭ, ونىڭ ىشىندە 142 660 بالانىڭ دەنساۋلىعى تەكسەرىلدى. تەك 2023 جىلى عانا 100 مىڭعا جۋىق اۋىل تۇرعىنىنا اقىسىز جاردەم جاسالىپ, 8 ايدىڭ ىشىندە بارلىق 17 وبلىستاعى 121 شالعاي ستانسا قامتىلدى. وسىلايشا, ورتاشا العاندا پويىز 18 مىڭ شاقىرىمعا جۋىق جول ءجۇرىپ, 88 994 ازاماتتىڭ دەنساۋلىعىن جاقسارتۋعا ۇلەس قوستى. ونىڭ ىشىندە 19 222-ءسى – بالا. 9 802 ادامعا اقىسىز قۇقىقتىق جانە مەدياتيۆتىك, ياعني تاتۋلاستىرۋ كومەگى كورسەتىلدى.