ەكىباستۇز قالاسىنا قاراستى زەلەنايا روششا اۋىلىنىڭ وقۋشىلارى جاڭا وقۋ جىلىندا تاماشا سىيلىققا كەنەلدى. «تابىس» شارۋا قوجالىعىنىڭ باسشىسى مانات العامباروۆ ءوز قاراجاتى ەسەبىنەن اۋىل مەكتەبىنىڭ باستاۋىش سىنىپتارىنا ارنالعان قوسىمشا عيمارات سالىپ بەرگەن. بۇدان بىلاي اۋىل بالالارى ءبىر اۋىسىمدا وقيدى.
زەلەنايا روششا اۋىلىنداعى مەكتەپتىڭ نەگىزى 1964 جىلى قالانعان. بىراق نىسان ابدەن ەسكىرگەنىنە بايلانىستى 2018 جىلى جەرگىلىكتى بيۋدجەت ەسەبىنەن جالپى اۋماعى 1020 شارشى مەتر بولاتىن جاڭا عيمارات تۇرعىزىلعان. پەشپەن جىلىتىلاتىن ەسكى جۇيەنىڭ ورنىنا مودۋلدىك قازاندىق ورناتىلدى. سول كەزدە «تابىس» شق قولداۋىمەن سپورت زالى دا سالىنعان بولاتىن. ەندى بيىل كاسىپكەر مانات العامباروۆ مەكتەپكە كەزەكتى سىيلىعىن جاسادى. ونىڭ جەكە قاراجاتىنا اۋماعى 143 شارشى مەتر قوسىمشا عيمارات تۇرعىزىلدى. وندا باستاۋىش سىنىپ بالالارى وقيدى دەپ كۇتىلىپ وتىر.
وسى ۋاقىتقا دەيىن ورىن جەتىسپەۋشىلىگىنە بايلانىستى مەكتەپتىڭ باستاۋىش سىنىپتارى ەكى اۋىسىمدا وقىپ كەلگەن. ەندى باستاۋىشتاعى 19 بالا وقۋىن جاڭادان سالىنعان كەڭ ءارى جارىق كابينەتتەردە باستايدى. ال جوعارى سىنىپتار 2018 جىلى تۇرعىزىلعان مەكتەپ عيماراتىندا وقۋىن جالعاستىرادى.
پاۆلودار وبلىسىنىڭ اكىمى اسايىن بايحانوۆ كاسىپكەردىڭ تارتۋى ماقتاۋعا لايىق باستاما ەكەنىن اتاپ ءوتتى.
– تۋعان اۋىلىنا, ونىڭ تۇرعىندارىنا, كەلەشەگىنە جاۋاپكەرشىلىكپەن قاراپ, وسكەلەڭ ۇرپاقتىڭ بولاشاعىنا وي جۇگىرتىپ وتىرعان كاسىپكەر ازاماتتىڭ ءىسى قۇرمەتكە ابدەن لايىق. تۋعان ءوڭىرىنىڭ تاعدىرىنا بەيجاي قاراماي, كومەك قولىن سوزعان بارلىق مەتسەنات پەن دەمەۋشىگە العىسىمدى بىلدىرەمىن. ءبىز ءوز تاراپىمىزدان ازاماتتارىمىزدىڭ ءال-اۋقاتىن جانە وبلىستىڭ وركەندەۋىن ارتتىرۋ ءۇشىن بار كۇشىمىزدى سالامىز, – دەدى ءوڭىر باسشىسى.
جاڭا عيماراتپەن تانىسقان اسايىن بايحانوۆ روبوتتەحنيكا كابينەتىنىڭ جابدىقتارى مەن سپورت قۇرالدارىن ساتىپ الۋ ءۇشىن زەلەنەيا روششا مەكتەبىنە 30 ملن تەڭگەنىڭ سەرتيفيكاتىن تابىستادى.
جالپى, قازىرگى ۋاقىتتا ەرتىس – بايان وڭىرىندەگى مەكتەپتەردە 6 مىڭنان استام ورىن تاپشىلىعى بار. جاڭا وقۋ جىلىندا 7 مەكتەپ وقۋشىلارى ءۇش اۋىسىمدا وقيتىن بولادى. مەكتەپتەردەگى ورىن تاپشىلىعى ماسەلەسىن «جايلى مەكتەپ» ۇلتتىق جوباسى اياسىندا شەشۋ كوزدەلگەن.
ماسەلەن, وبلىس ورتالىعىنداعى «دوستىق» شاعىن اۋدانىنىڭ وقۋشىلارى بيىلعى قاراشا ايىنان باستاپ جاڭا مەكتەپتە وقيدى. اۋماقتا «جايلى مەكتەپ» ۇلتتىق جوباسى اياسىندا 1 200 بالاعا ارنالعان زامانعا ساي ءبىلىم ۇياسى پايدالانۋعا بەرىلەدى. بۇگىندە قۇرىلىس جۇمىستارى اياقتالۋ شەگىندە. وڭىرلىك ءبىلىم بەرۋ باسقارماسىنىڭ مالىمەتىنشە, جاڭا عيمارات قالانىڭ اتالعان بولىگىندەگى ورىن تاپشىلىعىن شەشەدى. ال مەكتەپ زامانعا ساي وقۋ جابدىقتارىمەن قامتىلادى. ال جالپى پاۆلودار وبلىسىندا بارلىعى بەس جايلى مەكتەپ سالىنادى دەگەن جوسپار بار.
پاۆلودار وبلىسى,
ەكىباستۇز قالاسى,
زەلەنايا روششا اۋىلى