نيۋ-يوركتە الەمنىڭ سەگىز تانىمال تەننيسشىسىنىڭ قاتىسۋىمەن وتكەن UTS ءتۋرنيرى اياقتالدى. جۇلدە قورى 1 ملن دوللاردى قۇراعان كوممەرتسيالىق جوباعا الەكساندر بۋبليك تە قاتىستى. ەلىمىزدىڭ ءبىرىنشى راكەتكاسى شيرەك فينالدا گرەكيالىق ستەفانوس تسيتسيپاستى (3:2) ۇتىپ, جارتىلاي فينالدا اۋستراليالىق الەكس دە مينوردان (3:1) ايلاسىن اسىردى. بىراق فينالدا ول فرانتسيالىق گاەل مونفيسكە (1:3) ەسە جىبەردى. باس جۇلدەنى ولجالاعان ساڭلاق 301 000 دوللاردى السا, اقتىق سىندا سۇرىنگەن بۋبليك 161 000 دوللاردى يەمدەندى.
رەسەيلىك ۋمار كرەملەۆ جەتەكشىلىك ەتەتىن حالىقارالىق بوكس قاۋىمداستىعىن (IBO) قۇردىمعا كەتىرۋ ماقساتىمەن قۇرىلعان World Boxing ۇيىمىنىڭ قاتارى تاعى بەس مەملەكەتپەن تولىقتى. ولار – تايپەي, پاكىستان, بۋتان, فيدجي جانە ەكۆادور. ءسويتىپ, اتالعان فەدەراتسيانىڭ مۇشەلىگىنە ەنگەن ەلدەر سانى 42-گە جەتتى. جۋىردا ولاردىڭ قاتارىنا قازاقستان دا قوسىلۋعا ءتيىس. سەبەبى IBO-نىڭ قۇرامىندا قالعان كوماندالار الداعى وليمپيا ويىندارىنان شەتتەتىلەدى.
فۋتزالدان ۋەفا چەمپيوندار ليگاسىنىڭ نەگىزگى كەزەڭىنىڭ جارىس كەستەسى جاريالاندى. ءتورتىنشى توپتاعى ماتچ مىنا كوماندالار اراسىندا وتەدى: 22 قازان: «سەمەي» – «سپورتينگ» (پورتۋگاليا), «قايرات» – «حالاداش» (ماجارستان). 23 قازان: «حالاداش» – «سپورتينگ», «قايرات» – «سەمەي», 25 قازان: «سەمەي» – «حالاداش», «قايرات» – «سپورتينگ».
بىرىككەن اراب امىرلىكتەرىنىڭ ء(باا) ءال-اين قالاسىندا بوكستان جاسوسپىرىمدەر اراسىنداعى ازيا بىرىنشىلىگىنىڭ شىمىلدىعى ءتۇرىلدى. پارسى شىعاناعىندا قازاق ەلىنىڭ نامىسىن ماديرا جۇماحان (46 كگ), ايىم تاڭقىباەۆا (48 كگ), سيلا بيبولسىنقىزى (50 كگ), ءجاميلا بولاتبەكقىزى (52 كگ), شىرىن ماناپوۆا (54 كگ), ايعانىم قادىرحان (57 كگ), سوفيا ۆاششەنكو (60 كگ), الينا قۇدايگەنوۆا (63 كگ), ايسۇلۋ مۇحيت (66 كگ), كاميلا وسپانوۆا (70 كگ), زارينا تولىباي (75 كگ), ايدانا ۋبايدوللاقىزى (80 كگ) جانە سابينا جاقسىلىق (+80 كگ) سىندى بۇرىمدىلار قورعايدى.
تالدىقورعاندا ساداق اتۋدان ەرەسەكتەر مەن جاستار اراسىنداعى ەل چەمپيوناتى مارەگە جەتتى. وعان رەسپۋبليكامىزدىڭ بارلىق وڭىرىنەن كەلگەن 200-گە تارتا مەرگەن قاتىستى. جالپى ەسەپتە جەتىسۋ وبلىسى جەڭىمپاز اتانسا, ەكىنشى ورىندى شىمكەنت قالاسى يەلەندى. ال اقمولا وبلىسى ءۇشىنشى ساتىعا تابان تىرەدى.
اقش-تىڭ ايگىلى Forbes جۋرنالى كەيىنگى ءبىر جىلدا ەڭ كوپ تابىس تاپقان توپ-10 تەننيسشىنىڭ ەسىمىن اتادى. بۇل كوشتى كارلوس الكاراس باستاپ تۇر. جوعارىدا ايتىلعان مەرزىم ارالىعىندا «ۇلكەن دۋلىعا» ساناتىنداعى تۋرنيرلەردە ءتورت مارتە توپ جارعان 21 جاستاعى يسپانيالىق ويىنشىنىڭ ەسەپشوتىنا 42,3 ملن دوللار اۋدارىلدى. ودان كەيىنگى ورىندارعا نوۆاك دجوكوۆيچ (37,2 ملن), كوكو گاۋفف (27,1 ملن), يگا شۆەنتەك (26,7 ملن), ياننيك سيننەر (26,6 ملن), رافاەل نادال (23,3 ملن), دانيل مەدۆەدەۆ (20,3 ملن), ناومي وساكا (14,6 ملن), كاسپەر رۋد (13,9 ملن), ارينا سوبولەنكو (13,7 ملن) جايعاستى.
پەرۋ استاناسى ليمادا جەڭىل اتلەتيكادان جاستار اراسىندا الەم بىرىنشىلىگىنىڭ جالاۋى جەلبىرەدى. بۇل جارىستا فاينا مەيىرمانوۆا, الينا چيستياكوۆا, يرينا كونيششەۆا, بوگدان گونچاروۆ, كريستينا ەرمولا سىندى جەرلەستەرىمىز باق سىنايدى.
وزبەكستاننىڭ سامارقاند قالاسىندا ەسكەك ەسۋدەن ءوتىپ جاتقان وليمپيادالىق ەمەس قاشىقتىقتارداعى الەم بىرىنشىلىگىندە ماريا بروۆكوۆا ك-1 جاتتىعۋىندا 500 مەترلىك قاشىقتىقتى 02:09.731 مينۋتتا ءجۇزىپ ءوتىپ, قولا مەدال يەلەندى. وتانداسىمىز تەك ۋكراينا مەن چيلي سپورتشىلارىنان قالىپ قويدى.