ەلىمىزدىڭ ۇلتتىق ءال-اۋقات قورى وڭىرلەردىڭ سپورت ينفراقۇرىلىمىن دامىتىپ, حالىقتىڭ بۇقارالىق سپورتپەن اينالىسۋىمەن جاعداي جاساپ كەلەدى. سونداي جاڭا نىسانداردىڭ ءبىرى «سامۇرىق-قازىنا» قورىنىڭ باسشىسى نۇرلان جاقىپوۆتىڭ قاتىسۋىمەن اباي وبلىسى جاڭاسەمەي اۋدانىنىڭ ءشۇلبى كەنتىندە ىسكە قوسىلدى.
جاڭاسەمەي اۋدانى – بيىل جەكە اۋدان بولىپ قايتا قۇرىلىپ, جەرگىلىكتى حالىقتىڭ مەرەيىن اسىرعان جاڭا اۋدانداردىڭ ءبىرى. وڭىرگە الەۋمەتتىك ينۆەستيتسيالاردى تارتۋدىڭ ماڭىزى زور. سوندىقتان شۇلبىدە اشىلعان سپورت نىسانىنا حالىق ءدان ريزا. كوپفۋنكتسيونالدى نىسان اۋا-تىرەك قۇرىلىمىندا سالىنعان. 1,6 مىڭ شارشى مەترگە شاقتالعان كەشەندە ۆولەيبول, شاعىن فۋتبول, بوكس, كۇرەس, ۇستەل تەننيسى, جەڭىل اتلەتيكامەن اينالىسۋعا جاعداي جاسالعان. بارلىق قاجەتتى قۇرال-جابدىق بار. الداعى ۋاقىتتا مۇندا سپورت سەكتسيالارى اشىلادى. نىسان قۇرىلىسى «سامۇرىق-قازىنا» اق كومپانيالارى توبى اتىنان بىرىڭعاي قايىرىمدىلىق وپەراتورى «Samruk-Kazyna Trust» قورى ارقىلى قارجىلاندىرىلدى.
«سامۇرىق-قازىنا» قورىنىڭ باسقارما توراعاسى نۇرلان جاقىپوۆتىڭ ايتۋىنشا, قور كوپشىلىك اراسىندا سالاماتتى ءومىر سالتىن ناسيحاتتاپ, كورپوراتيۆتىك الەۋمەتتىك جاۋاپكەرشىلىك اياسىندا اۋىلدىق جەرلەرگە الەۋمەتتىك جوبالاردى جۇزەگە اسىرىپ كەلەدى.
«مەن ءوزىم دە سپورتپەن اينالىسقاندى ۇناتامىن جانە ءتۇرلى مارافوندارعا بەلسەندى قاتىسامىن. ماسەلەن, بيىل ماۋسىمدا قور قايىرىمدىلىق مارافونىن ۇيىمداستىردى. جينالعان قاراجاتقا كەلەسى اپتادا ءبىلىم كۇنىنە وراي استانادا ينكليۋزيا سىنىپتارىن اشامىز. سپورت نىسانى سالىنعان ءشۇلبى اۋىلىنان بولاشاق وليمپيادا چەمپيوندارى شىعۋى مۇمكىن. بۇل سپورت كەشەنى جاستاردىڭ تالانتىن اشىپ, بيىكتەردەن كورىنۋگە مۇمكىندىك بەرەدى دەپ سەنەمىن», دەپ اتاپ ءوتتى قور باسشىسى.
ءوز كەزەگىندە وبلىس اكىمىنىڭ ورىنباسارى جاسۇلان سارسەباەۆ ءوڭىردىڭ سپورت ينفراقۇرىلىمىنىڭ دامۋىنا قوسقان ۇلەسى ءۇشىن «سامۇرىق-قازىنا» قورىنا العىسىن ءبىلدىردى. جاقىندا رەسپۋبليكالىق مارافون جارىسىنان جۇلدەمەن ورالعان 13 جاستاعى ازامات بازاربەكوۆ تە سپورت كەشەنىنىڭ اشىلعانىنا ءدان ريزا.
«جاقىندا پاريجدە بولعان وليمپيادادان كەيىن ءبىز دە ەلدوس سمەتوۆ, دەمەۋ جادىراەۆ, ناريمان قۇربانوۆ سياقتى چەمپيون بولىپ, ەلىمىزدىڭ نامىسىن قورعاعىمىز كەلەدى. اۋىلدا تالانتتى بالالار كوپ. سوندىقتان سپورت كەشەنىن سالىپ بەرگەن اعالارىمىزعا راحمەت», دەيدى جاس سپورتشى.
ايتا كەتسەك, قوردىڭ بىرىڭعاي قايىرىمدىلىق وپەراتورى «Samruk-Kazyna Trust» ارقىلى وڭىرلەردە سپورت ينفراقۇرىلىمىن دامىتۋ اياسىندا 10 اۋا-تىرەك قۇرىلىمىنداعى كەشەن جانە 1 دەنەشىنىقتىرۋ-ساۋىقتىرۋ كەشەنى جانە 28 امبەباپ سپورت الاڭى سالىندى.
سونىمەن قاتار «سامۇرىق-قازىنا» اق باسقارما توراعاسى نۇرلان جاقىپوۆ شىعىس ايماقتاعى ءشۇلبى گەس-تە ارنايى بولدى. اتالعان ستانتسيانىڭ ەكىنشى كەزەگىن سالۋ جوباسىنىڭ ىسكە اسۋ بارىسىمەن ەگجەي-تەگجەي تانىستى. نۇرلان جاقىپوۆ ستانتسياداعى جۇمىستاردىڭ جوعارى دەڭگەيىندە جۇرگىزىلىپ جاتقانىن اتاپ ءوتتى. – ۇسىنىلعان جوبالاردىڭ بارلىعى وتە ماڭىزدى. سوندىقتان ولاردى قىسقا مەرزىمدە جۇزەگە اسىرۋ ءۇشىن بارلىق شارانى قابىلداۋ قاجەت. بۇل رەتتە جوبالاردىڭ وتەلۋى, قاجەتتى تاريفتەرمەن قامتاماسىز ەتىلۋى ماڭىزدى. جوبالاردىڭ ىسكە اسىرىلۋىن تۇراقتى باقىلاپ وتىرۋ قاجەت, – دەپ اتاپ ءوتتى قور باسشىسى. قۋاتى 702 مۆت بولاتىن اباي وبلىسىنداعى ءشۇلبى گەس ەرتىس وزەنىنىڭ بويىندا ورنالاسقان. بۇل – ەرتىس گەس كاسكادىنداعى ءۇشىنشى ستانتسيا. قۋاتى بويىنشا قازاقستانداعى ەڭ ءىرى ستانتسيا سانالادى. قازىرگى تاڭدا ءشۇلبى گەس قۋاتىن 1050 مۆت-قا دەيىن ۇلعايتۋدى كوزدەيتىن جوبا ىسكە اسىرىلۋدا. بۇل ەلەكتر ەنەرگياسىن ءوندىرۋدى 40%-عا ارتتىرۋعا مۇمكىندىك بەرەتىن بولادى.