استانادا ترياتلون ساياباعىنداعى كوپىردىڭ استىندا جاڭا مۇرال سالىندى. دۇنيەجۇزىلىك كوشپەلىلەر ويىندارىنىڭ ءدۇبىرى جاقىنداپ قالعانىن ايگىلەيتىن مۇرالدا جامبى اتۋشى مەرگەن بەينەلەنگەن.
بيىكتىگى 4 مەتر مۇرال ۇلتتىق ويىندار دوداسىنان حاباردار ەتىپ قانا قويماي, كوشپەلىلەردىڭ كۇشى مەن دالدىگىنىڭ رامىزىنە دە اينالماق. ەلوردادا بۇعان دەيىن دە ايتۋلى الاماننىڭ داڭقىن اسىراتىن مۇرال كوپقاباتتى تۇرعىن ءۇيدىڭ قابىرعاسىنا بەدەرلەنگەن ەدى.
دۇنيەجۇزىلىك كوشپەلىلەر ويىندارى – ۇلتتىق سپورت تۇرلەرىنە ارنالعان حالىقارالىق دودا. مادەني مۇرانى ناسيحاتتاپ, كوشپەلى ءومىر رۋحىنان سىر شەرتىپ, حالىقتىق ويىنداردى ايگىلەيتىن ەتنوسپورت الامانىنىڭ اۋقىمى جىلدان-جىلعا كەڭەيىپ كەلەدى.