جوعارى اۋديتورلىق پالاتانىڭ نۇسقاماسىن ورىنداۋ شەڭبەرىندە قازاقستاندا ىشكى ساۋدا سۋبەكتىلەرىن مەملەكەتتىك قولداۋدىڭ جاڭا شارالارى ازىرلەنىپ, بەكىتىلدى, دەپ حابارلايدى Egemen.kz.
جوعارى اۋديتورلىق پالاتانىڭ ءباسپاسوز قىزمەتىنىڭ حابارلاۋىنشا, بيىل ساۋدا جانە ينتەگراتسيا مينيسترلىگىنىڭ جانە ونىڭ ۆەدومستۆولىق باعىنىشتى ۇيىمدارىنىڭ قىزمەتىنە مەملەكەتتىك اۋديت جۇرگىزىلگەن. اۋديت بارىسىندا رەسپۋبليكادا ساۋدا ينفراقۇرىلىمىنىڭ ودان ءارى دامۋىن تەجەيتىن سەبەپتەردىڭ ءبىرى بيزنەستىڭ وسى باعىتتا ينۆەستيتسيالاۋ مۇمكىندىكتەرىنىڭ شەكتەۋلى ەكەنى انىقتالعان. وسىعان بايلانىستى ساۋدا جانە ينتەگراتسيا مينيسترلىگىنە كاسىپكەرلىك سۋبەكتىلەرىنىڭ قارجىلىق الەۋەتىن ارتتىرۋدىڭ ناقتى مەحانيزمدەرىن ايقىنداۋ تاپسىرىلدى.
ناتيجەسىندە ءمينيستردىڭ بيىل 21 ماۋسىمداعى بۇيرىعىمەن ىشكى ساۋدا سۋبەكتىلەرىنە جەكە كاسىپكەرلىكتى مەملەكەتتىك قولداۋ شارالارىن كورسەتۋ قاعيدالارى بەكىتىلدى. ولار قازىرگى زامانعى ساۋدا ينفراقۇرىلىمىن قالىپتاستىرۋ بويىنشا ءىس-شارالاردى ىنتالاندىرۋعا باعىتتالعان.
ايتا كەتەيىك, ءبىرىنشى كەزەڭدە مەملەكەت بۇل باعىتقا 4 ملرد تەڭگە بولگەن. سونىمەن قاتار «دامۋ» قورىنان قارجىلاندىرۋدى وسى جىلدىڭ قازان ايىندا باستاۋ جوسپارلانعان.
سونداي-اق ەرەجەدە مەملەكەتتىك قولداۋ الۋشىلار ءۇشىن وتاندىق ءوندىرىستىڭ ازىق-ت ۇلىك جانە ازىق-ت ۇلىك ەمەس تاۋارلارىن ساۋدا ورىندارىنا ورنالاستىرۋ بويىنشا قارسى مىندەتتەمەلەر كوزدەلگەن. بۇل ەلىمىزدىڭ تاۋار وندىرۋشىلەردىڭ ءونىمدى وتكىزۋ ارنالارىنا قولجەتىمدىلىگىن ارتتىرادى.