31 تامىزدا وڭتۇستىك كورەيانىڭ مۋنگيون قالاسىندا دزيۋدودان جاستار اراسىنداعى ازيا بىرىنشىلىگىنىڭ شىمىلدىعى تۇرىلەدى. بۇل جارىستا ەلىمىزدىڭ تۋى استىندا مىنا بالۋاندار ونەر كورسەتەدى: ەرلەر – دانيار ق ۇلىشەۆ, ماديار سەرىكوۆ (60 كگ), ايان بايكەنجەەۆ (66 كگ), ەرنار كەڭەسحان (73 كگ), گلەب ازاروۆ, دانيل كرىلوۆ (81 كگ), يگور راكوۆ (90 كگ), ءدىناسىل تاتتىمبەك (100 كگ) جانە جانتىلەك نۇرتىلەپ ۇلى (+100 كگ). قىزدار – سابينا يۋلداشبەكوۆا, تاسنيم ءابدۋالي (48 كگ), اياۋلىم قايرات, نۇرايلىم سارسەنبەك (52 كگ), دينا مۇحانبەت (57 كگ), ۇلدانا تاڭجارىقوۆا (63 كگ), ءادىل ساعيرا (73 كگ), اناستاسيا ناگاچەۆسكايا (78 كگ) جانە رۋسلانا ماحاتوۆا (+78 كگ).
ۆەلوسپورتتان «رۋمىنيا تۋرى» اياقتالدى. بۇل كوپكۇندىكتە «Astana Qazaqstan Development Team» كلۋبى ساپىندا ونەر كورسەتكەن يلحان دوستيەۆ دارا شىقسا, ونىڭ كوماندالىق ارىپتەسى داۆيدە تونەاتتي ەكىنشى ورىن يەلەندى.
الماتىدا ۇستەل تەننيسىنەن قازاقستان كۋبوگى اياقتالدى. ەرلەر باسەكەسىندە جەرگىلىكتى ويىنشىلاردىڭ (داستان جانە ايدوس كەنجەعۇلوۆتار, سانجار جۇبانوۆ, ابدۋللا ماماي, شي دانيان) تەگەۋرىنىنە ەشكىم شىدامادى. فينالدا ولار شىمكەنت قالاسىنىڭ وكىلدەرىن (يريسبەك ارتىقمەتوۆ, بەكۇلان جامال, باقداۋلەت اكىمالى) 3:0 ەسەبىمەن ويسىراتا ۇتتى. قولا مەدالدى شىعىس قازاقستان وبلىسى يەلەندى. قىزدار سايىسىندا قاراعاندى وبلىسى (زاۋرەش اقاشەۆا, اراي اشكەەۆا, جانەركە كوشكىمباەۆا, ءالبينا جاقسىلىقوۆا, ۆيكتوريا موچالكينا) توپ جاردى. اقتىق سىندا ولار الماتىلىقتاردان (سارۆينوز مىرقادىروۆا, انەل باقىت, ايا الىمباەۆا, گۇزەل تورشاەۆا, ايشا مەڭدىعاليەۆا) ايلاسىن اسىردى. ۇزدىك ۇشتىكتى استانا قالاسىنىڭ تەننيسشىلەرى تۇيىندەدى.
پولشانىڭ كراكوۆ قالاسىندا تەننيستەن جاسوسپىرىمدەر اراسىندا ۇيىمداستىرىلعان ITF J100 تۋرنيرىندە دامير جالعاسباي جەڭىمپاز اتاندى. 16 جاستاعى قازاقتىڭ ۇلى شەشۋشى تۇستا ماجارستاندىق كولوش كينچەشتى 6:3, 6:4 ەسەبىمەن قاپى قالدىردى. سونداي-اق قارت قۇرلىقتىڭ تاعى بىرقاتار ەلىندە جالاۋى جەلبىرەگەن جارىستاردا ايىم قاناعاتوۆا, اليسا كورولەۆا, اسقار ءامىر سىندى جاس ورەندەرىمىز تابىستى ونەر كورسەتتى.
تۇركيانىڭ ىستانبۇل قالاسىندا مۋاي-تايدان تۇركى ەلدەرىنىڭ چەمپيوناتى ءوتتى. بۇل جارىستا قازاقستان قۇراماسى جاقسى ناتيجە كورسەتىپ, 11 جۇلدە ولجالادى. اتاپ ايتساق, ءشامىل ەرماعامبەتوۆ (54 كگ) پەن ەۆگەني زيمين (+91 كگ) التىن تۇعىرعا كوتەرىلسە, ارىستان قۋانىشەۆ (67 كگ) پەن الەكساندر تساريكوۆ (81 كگ) كۇمىسپەن كۇپتەلدى. ال ديدار جاپپارقۇلوۆ (48 كگ), ءابدى-راحمان ابىشەۆ (51 كگ), زاكىر بەليالوۆ (57 كگ), ەرنات سماعۇلوۆ (60 كگ), رۋسلان زاياكين (71 كگ), ديانا پيۆتسوۆا (48 كگ) جانە اناستاسيا كونيۋشكو (51 كگ) قولاعا قول سوزدى.
كانادالىق لەيلا فەرناندەسپەن جۇپتاسىپ ونەر كورسەتكەن قازاقستاننىڭ ەكىنشى راكەتكاسى يۋليا پۋتينتسەۆا تسينتسينناتيدەگى WTA-1000 ءتۋرنيرىنىڭ جارتىلاي فينالىندا ديانا شنايدەر (رەسەي)/ليندا نوسكوۆانى (چەحيا) 6:3, 6:4 ەسەبىمەن ۇتتى. فينالدا ولار ايشا مۇحامماد (اقش)/ەرين رۋتليفف (جاڭا زەلانديا) جۇبىمەن ەسە جىبەردى – 6:3, 1:6, 4:10. ءدال وسى جارىستىڭ جەكەلەگەن سايىسىندا پۋتينتسەۆا ءۇشىنشى كەزەڭدە يسپانيالىق پاۋلا بادوسادان ۇتىلسا, ەلەنا رىباكينا ەكىنشى اينالىمدا كانادالىق لەيبا فەرناندەسكە ەسە جىبەردى.
يتاليانىڭ ۆەلوشاباندوزى البەرتو بەتتيول «استانا» كلۋبىنىڭ جەيدەسىن كيدى. 30 جاستاعى توسكانا ءوڭىرىنىڭ تۋماسى كەزىندە جاستار اراسىندا ەۋروپا چەمپيونى اتانعان. 2016 جىلى ول دجيرو د’يتالياعا جانە 2017 جىلى «تۋر دە فرانسقا» قاتىستى. ءار جىلدارى «فلاندريا تۋرى» (2019) مەن «ميلان-تۋرين» (2024) تۋرنيرلەرىندە توپ جاردى. وسى كۇنگە دەيىن بەتتيول اقش-تىڭ «EF Education-EasyPost» كلۋبىنىڭ نامىسىن قورعاپ كەلدى.
فۋتبولدان قازاقستان كۋبوگىنىڭ فينالى 29 قىركۇيەكتە ساعات 17.00-دە الماتىداعى ورتالىق ستاديوندا وتەدى. 32-رەت ۇيىمداستىرىلاتىن جارىستىڭ فينالىندا «اتىراۋ» مەن «اقتوبە» شەبەرلىك بايقاسادى. وسى مەجەگە جەتكەن كوماندالار اقشالاي سىيلىققا يە بولادى. ال باس جۇلدەنى ولجالاعان ۇجىم كەلەسى ماۋسىمدا قازاقستان سۋپەركۋبوگى ءۇشىن تالاسىپ, ەۋروكۋبوكتىڭ ىرىكتەۋ كەزەڭىندە كۇش سىناسادى.
قازاقستان تاەكۆوندو فەدەراتسياسىنىڭ پرەزيدەنتى ۆياچەسلاۆ كيم باستاپ, ۆيتسە-پرەزيدەنتتەر قانات ساعىناەۆ, شاديار قوندىباەۆ, ارمان شىلمانوۆ جانە باس حاتشى ولجاس بەسباەۆ تا قىزمەتىنەن كەتەدى. وعان سەبەپ – وليمپيا ويىندارىنداعى ساتسىزدىك. بۇل جارىسقا قازاقستاننىڭ ەكى دايان شەبەرلەرى عانا قاتىسىپ, ەكەۋى دە ەلگە قۇر قول قايتتى.
20–30 قىركۇيەك ارالىعىندا الماتىداعى الەكساندر اسانوۆ اتىنداعى كلۋبتا ستەند اتۋدان ازيا كۋبوگىنىڭ جالاۋى جەلبىرەيدى. اتالعان دوداعا 40 مەملەكەتتەن قۇرالايدى كوزگە اتقان 500-گە جۋىق مەرگەن كەلەدى.