8-13 قىركۇيەك كۇندەرى وتەتىن V دۇنيەجۇزىلىك كوشپەلىلەر ويىندارىنا قاتىساتىن كوماندالار سايىس تۇرلەرىنەن ازىرلىكتى پىسىقتاپ جاتىر. ەتنوسپورت ويىندارىنىڭ باعدارلاماسىنا اسىق اتۋ سپورتى دا ەنىپ, ۇلتتىق ويىنىمىزدان وتەتىن دوداعا 15 مەملەكەتتەن كوماندا كەلمەك.
قاتىسۋشىلاردىڭ الدى استانا قالاسىنا ات باسىن بۇردى. اسىق اتۋدان موڭعوليا ۇلتتىق قۇراماسىنىڭ باس باپكەرى قانات زاباي ۇلى باستاعان اسىقشىلار كەلدى. موڭعوليادا اسىق سپورتىن ناسيحاتتاپ, دامىتىپ جۇرگەن قانداسىمىز اسىق اتۋ سپورتىنىڭ نەگىزىن قالاۋشى, قازاقستان ۇلتتىق قۇراماسىنىڭ باس باپكەرى جومارت سابىرجان ۇلى باستاعان ماماندارمەن ديدارلاسىپ, ءدۇبىرلى دودانىڭ ءوتۋ بارىسىمەن تانىستى.
تاجىريبە الماسۋ ماقساتىنداعى باسقوسۋدا قانات زاباي ۇلى اسىق اتۋ سپورتىنىڭ موڭعوليادا دامۋ قارقىنى تۋرالى بايانداپ, كوشپەلىلەر ويىندارىنا موڭعول قۇراماسى 7 قىركۇيەك كۇنى تولىق قۇرامدا كەلەتىنىن جەتكىزدى.