دۇنيەجۇزىلىك كوشپەلىلەر ويىندارىندا قۇسبەگىلەردىڭ دە شەبەرلىگى سىنالادى. ەلىمىزدىڭ قۇسبەگىلەرى اقمولا وبلىسىندا دايىندىقتى پىسىقتاپ, وقۋ-جاتتىعۋ جيىنىن وتكىزىپ جاتىر.
قۇسبەگىلىك (ساياتشىلىق) فەدەراتسياسىنىڭ اتقارۋشى ديرەكتورى بازاربەك كۇنتۋعان ءدۇبىرلى دوداعا قاتىساتىن ۇزدىكتەر بىلتىر اتىراۋ قالاسىندا وتكەن قازاقستان چەمپيوناتىندا ىرىكتەۋدەن ءوتىپ, جولداما يەلەنگەنىن جەتكىزدى.
«قۇسبەگىلىك سايىسىنان ساياتشىلارىمىز بۇركىت, يتەلگى جانە قارشىعاسىن سايىسقا سالادى. ياعني 9 قۇسبەگى دوداعا قوسىلىپ, تۇلەكتەن ۇشىرىپ تۇلەتكەن قىراعى قىراندارىنىڭ الەۋەتىن باعامدايدى. بۇعان دەيىن الماتى قالاسىندا جاتتىعۋ جيىنى بولدى, ەندى 27 تامىز بەن 7 قىركۇيەك ارالىعىندا استانا قالاسىندا قورىتىندى جاتتىعۋدى وتكىزەمىز. قاتىسۋشىلار دا شيراپ, قىران قۇستارىنىڭ دا بابى جاقسارىپ كەلەدى», دەدى ب.كۇنتۋعان.
قۇسبەگىلەرىمىز باس بايگەدەن ءۇمىتتى, دەگەنمەن قىرعىزستان, موڭعوليا, ەۋروپا ەلدەرىنەن دە قاتىسۋعا ىقىلاس تانىتقان ساياتشىلاردىڭ دا قارىمى وسال ەمەس.
دۇنيەجۇزىلىك كوشپەلىلەر ويىندارىندا بۇركىتتى شىرعاعا سالۋ سايىسىندا ارمان قوشقاروۆ, ەرزات بايقاداموۆ, سەرىكبەك كۇنتۋعان ۇلى قىراندارىنىڭ توماعاسىن سىپىرىپ دوداعا قوسادى. قۇسبەگىلىكتەن ۇلتتىق قۇرامانىڭ مۇشەسى يبراگيم بازارباەۆ قارسىلاستاردىڭ قارىمدى ەكەنىن, قىراندارىنىڭ دا تەپكىسى مىقتى, العىر ەكەنىن ايتتى. يتەلگى قۇسىنىڭ سىنىنا يبراگيم بازارباەۆ, ەرلان كەنجەتاەۆ, باعداۋلەت باباجان قاتىسسا, قارشىعا سالۋدان داۋرەن ارشاباي, باعدات كەۋەنوۆ, قۇدايبەرگەن ءرابىل دۇنيەجۇزىلىك كوشپەلىلەر ويىندارىندا شەبەرلىگىن سىنايدى.
«قىران قۇسىمىز جازداي تۇلەكتە بولدى. قازىر بابىنا ەنىپ كەلەدى. ەتىن تارتىپ, جىلدامدىققا باۋلىپ جاتىرمىز. وزگە مەملەكەتتەردەن كەلەتىن قۇسبەگىلەردىڭ دە قىرانى قارىمدى. ءۇش سانات بويىنشا سىنعا تۇسەتىن قۇراماداعى وزگە جىگىتتەردىڭ دە قىراندارى العىر, ءبارىمىز دە جۇلدەلى ورىن يەلەنۋگە بارىمىزدى سالامىز», دەدى سەرىكبەك كۇنتۋعان ۇلى.
قۇسبەگىلەردىڭ شەبەرلىگىن كورەرمەندەر 12-13 قىركۇيەك كۇندەرى ەتنو- اۋىل اۋماعىنداعى الاڭنان تاماشالايدى. دۇنيەجۇزىلىك كوشپەلىلەر ويىندارىنا كانادا, موڭعوليا, قىرعىزستان, قىتاي, گرۋزيا, رەسەي, تۇركيا, يسپانيا, ماجارستان ەلدەرىنەن كەلەتىن ساياتشىلار قيالاپ ۇشقان قىران قۇستارىن قولعا شاقىرۋدان جانە شىرعاعا سالۋدان سىنعا تۇسەدى. تورەشىلەر ۋاقىت بەزبەنىنە سالىپ, قۇستاردىڭ ۇشۋ جىلدامدىعىن باعامداپ جۇلدە ۇلەستىرەدى.