قوستانايداعى ارماتۋرا-وقشاۋلاعىش زاۋىتى جوعارى كەرنەۋلى ەلەكتر جەلىلەرىندە پايدالانىلاتىن شىنى, پوليمەر, فارفوردان قۇيىلعان وقشاۋلاعىشتار مەن جەلىلىك ارماتۋرا شىعارادى.
2014 جىلى رۋدنىي قالاسىندا ىسكە قوسىلعان بىرەگەي كاسىپورىن تاياۋدا وبلىس ورتالىعىنا كوشىرىلدى. بۇعان دەيىن جوعارى ۆولتتى ەلەكتر جەلىلەرى ءۇشىن جىلىنا 500 مىڭداي وقشاۋلاعىش شىعارىپ كەلگەن زاۋىت ەندى ءونىم كولەمىن 1,5 ملن-عا دەيىن ۇلعايتتى. ونىمدەرىن وزبەكستان, ەستونيا, قىتاي, كامەرۋن, تۋنيس, تۇركيا, پولشا, برازيليا ەلدەرىنە ەكسپورتتاۋدى كوزدەپ وتىر.
زاۋىتتىڭ اتقارۋشى ديرەكتورى سامات مۇكەنوۆتىڭ ايتۋىنا قاراعاندا, الەمدە مۇنداي 13-اق كاسىپورىن بار. وسى ون ءۇشتىڭ ورتاسىنان ويىپ تۇرىپ ورىن العان قوستاناي ارماتۋرا-وقشاۋلاعىش زاۋىتىنىڭ ونىمدەرى جوعارى سۇرانىسقا يە.
«ونجىلدىق تاريحى بار كاسىپورىندى بيىل رۋدنىي قالاسىنان قوستانايعا كوشىرۋ تۋرالى شەشىم قابىلداندى. وبلىس ورتالىعىنداعى جۇمىسىمىز تابىستى بولادى دەپ سەنەمىز. بۇعان دەيىن دە جوعارى كورسەتكىشتەرگە قول جەتكىزدىك. جۇمىسكەرلەردىڭ جالاقىسى ءوستى. بۇرىن ولار قولىنا 168 مىڭ تەڭگە الىپ كەلسە, ەندى 268 مىڭ تەڭگە الادى. جۇمىسشى ەڭبەگى لايىقتى باعالانۋى كەرەك. ءبىزدىڭ زاۋىت – ەلىمىزدەگى ەلەكتر جەلىسىنە ارنالعان شىنى يزولياتورلاردىڭ بارلىق ءتۇرىن وندىرۋگە يندۋستريالىق سەرتيفيكاتقا يە بىرەگەي ءارى جالعىز كاسىپورىن. سوندىقتان ءوز ءونىمىمىزدىڭ ساپاسىنا جانە قاۋىپسىزدىك تالاپتارىنا ساي ەكەنىنە كەپىلدىك بەرەمىز. زاۋىت تەك ەلىمىزدىڭ ەمەس, ءبىرتالاي شەت مەملەكەتتىڭ ەنەرگەتيكا سالاسىن دامىتۋعا بارىنشا اتسالىسادى. بۇگىندە ەكسپورت كولەمىن ۇلعايتىپ, الىس-جاقىن شەتەلدەرگە ءونىم جەتكىزۋدى باستادىق», دەيدى كاسىپورىن باسشىسى ارتەم بۋتين.
كاسىپورىننىڭ تۇراقتى تۇتىنۋشىلارىنىڭ قاتارىندا «قازاقستان تەمىر جولى», «KEGOC», «قازترانسويل», «قازاقمىس» سىندى ءىرى كومپانيالار بار.
«قازاقستان ارماتۋرا-وقشاۋلاعىش زاۋىتى» جشس – تمد كەڭىستىگىندەگى ەڭ ءىرى زاۋىت وڭتۇستىك – ورال ارماتۋرا-وقشاۋلاعىش زاۋىتىنىڭ ەنشىلەس كومپانياسى ەكەنىن ايتا كەتكەن ءجون. كاسىپورىن قالا بيۋدجەتىنە سالىق تۇرىندە قوماقتى قارجى قۇيىپ وتىر. رۋدنىيدا جۇمىس ىستەگەن سوڭعى 4 جىل ىشىندە قالا بيۋدجەتىنە 5 ملرد تەڭگەگە جۋىق سالىق تولەگەن.
وقشاۋلاعىش زاۋىتى, قازىرشە, تولىق تسيكلدى وندىرىسكە كوشە قويعان جوق. كاسىپورىنعا قاجەت شيكىزات جىلىنا 10 ملن شىنى بولشەك دايىندايتىن وڭتۇستىك – ورال زاۋىتىندا دايىندالادى. ال ارماتۋرالار ورسك – حاليلوۆ مەتالل كومبيناتىندا قۇيىلادى.
«سوڭعى ون جىل ىشىندە 4,2 ملن يزولياتور شىعاردىق. بۇگىنگە دەيىن 11,6 ملرد تەڭگەگە ءونىم ساتىپپىز. ونىمدەرىمىزدى ەلدەگى ەنەرگيالىق كومپانيالاردىڭ ءبارى الادى. جالپى, ەلىمىزدە يزولياتورلارعا سۇرانىس جوعارى. وسى سۇرانىستى وتەۋ ءۇشىن جىلىنا 1 ملن-عا جۋىق وقشاۋلاعىش شىعارۋىمىز كەرەك. وتاندىق كومپانيالاردان ارتىلعانىن رەسەيگە, ازەربايجانعا, ءتىپتى وزبەكستان, قىرعىزستان ەلدەرىندە قىتاي كومپانيالارى سالىپ جاتقان نىساندارعا دا جىبەرەمىز», دەيدى زاۋىت باسشىسى.
وقشاۋلاعىشتار ارنايى ۆيبراتسيالىق ستانوكتاردىڭ كومەگىمەن دايىندالادى. ودان كەيىن ارنايى قۇرىلعى ارقىلى دايىن ءونىمنىڭ بەرىكتىگى سىنالادى.
«مۇنداي قۇرىلعىمەن جۇمىس ىستەۋ اسا قيىن ەمەس. تەك تەحنولوگيا مەن قوسپا مولشەرىن قاتاڭ ساقتاپ وتىرۋ كەرەك. شىنى جانە فارفور يزولياتورلاردى نىعايتقىش تسەمەنت ەرىتىندىسىن دايىنداۋ بارىسىندا قاجەت قوسپالار ميكرونمەن ولشەنەدى. ودان ارتىق ەشتەڭە قوسۋعا بولمايدى. ءونىم دايىن بولعان سوڭ, جەتى تاۋلىك بويى كەبەدى. ودان كەيىن وقشاۋلاعىش بويىنداعى بۇكىل ىلعالدان ادا بولعانشا, تاعى دا جەتى كۇنگە ارنايى كامەراعا سالامىز. ودان كەيىن يزولياتورلار سىناق تسەحىنا جىبەرىلەدى», دەيدى اتقارۋشى ديرەكتور سامات مۇكەنوۆ.
كاسىپورىن الداعى ۋاقىتتا ەلەكتر باعاناسىنا جەلى بەكىتەتىن ارماتۋرانى وزىمىزدەن شىعارۋ ماسەلەسىن قاراستىرىپ جاتىر.
قوستاناي وبلىسى