بۇگىن – حالىقارالىق ءدىن جانە نانىم-سەنىم نەگىزىندەگى زورلىق-زومبىلىق قۇرباندارىن ەسكە الۋ كۇنى. ونى 2019 جىلدىڭ مامىرىندا بۇۇ باس اسسامبلەياسى بەكىتكەن بولاتىن.
ەسكى كۇندى ەسكە الار بولساق, ءدىني نەمەسە باسقا نانىم-سەنىمگە نەگىزدەلگەن زورلىق-زومبىلىققا ۇشىراپ, قۇربان بولعان ادامداردى ساناپ تاۋىسا المايسىز. ەجەلگى ريمدەگى حريستيانداردى قۋعىنداۋ, كەيىن كرەسشىلەردىڭ مۇسىلمانداردى قىرىپ-جويۋى, دەربەس پىكىرى ءۇشىن عالىمداردى ءولتىرۋ, كاتوليكتەر مەن پروتەستانتتار اراسىنداعى قاقتىعىس جانە تاعى باسقالارى.
اسىلىندا بارلىق ءدىن ءارتۇرلى تەرەزەدەن ءتۇسىپ تۇرعان ءبىر كۇننىڭ ساۋلەسى ىسپەتتى. ول ءيسى ادامزاتتى جاقسى كورۋگە ۇندەۋى كەرەك. كەز كەلگەن جاندى ناسىلىنە, سەنىمىنە, ازاماتتىق ۇستانىمىنا قاراماي, باۋىر بولۋدى ۋاعىزداسا كەرەك-ءتى. مەنىكى سەنەن كۇشتى دەپ ءدىن جارىستىرۋدىڭ ارتى جانجال, سوڭى سوعىسپەن بىتەدى. قۇدايدى قورعاۋدىڭ قاجەتى جوق. ول ءوزىن ونسىز دا قورعاپ الادى.
ءدىن – ادامنىڭ جەكە ماسەلەسى. ونى كوپشىلىك ۇستانعانى جاقسى. الايدا ءدىن جاماعاتتىق ساناعا ورنىققان كەزدە كەۋدەمسوقتىق پەن كەرى يتەرۋشىلىكتەن اباي بولعان ءجون. «سوكراتقا ۋ ىشكىزگەن, يواننا اركتى وتقا ورتەگەن, عايسانى دارعا اسقان, پايعامبارىمىزدى تۇيەنىڭ جەمتىگىنە كومگەن كىم؟ ول – كوپ, ەندەشە كوپتە اقىل جوق» دەپ اباي ءدىني بۋكۆاليزمگە شالدىققان توبىرلىق تۇسىنىكتى مانسۇقتايدى. شاكارىم بولسا بارلىق اقىل ەلەگىنەن وتكىزۋ كەرەكتىگىن ايتادى. ايتپەسە ونىڭ ءتۇبى – قۇردىم دەپ ەسكەرتەدى:
«تازا اقىلمەن تاپپاعان ءدىن,
شىن ءدىن ەمەس – جىندىلىق.
قارمالاعان ءبىر سوقىرسىڭ,
ولگەن وي مەن كوز, قۇلاق».
بۇۇ باس اسسامبلەياسى بۇل اتاۋلى كۇندى بەكىتۋ ارقىلى بارلىق مەملەكەتتىك جانە ۇكىمەتتىك ەمەس ۇيىمدى, بارلىق ءدىني كونفەسسيا وكىلدەرىن ءدىن جانە نانىم-سەنىم نەگىزىندەگى زورلىق-زومبىلىق قۇرباندارى مەن زارداپ شەككەندەردى ەسكە الۋعا شاقىرادى.