قورشاعان ورتانىڭ تازالىعىن باقىلايدى

تاريحي-مادەني جانە تۋ­ريستىك نىسانداردىڭ ەكو­لوگيالىق جاي-كۇيى, كو­رىكتى ورىنداردى اباتتاندىرۋ, كيەلى ورىنداردىڭ كۇتىمىنە قاتىستى قول­عا الىنعان يگى باستاما 15 تامىزدان 15 قىركۇيەككە دەيىن جالعاسىن تاپپاق. قوعامدىق ەكو-باقىلاۋ رەس­پۋبليكالىق اكتسياسىنىڭ اياسىندا اپتا سايىن بىرنەشە تاقىرىپ قامتىلماق. الدىمەن تۋريستىك جانە تاريحي-مادەني نىسانداردىڭ ەكو-مونيتورينگ اپتالىعى باستالىپ, 22 تامىزعا دەيىن جالعاسادى. ودان كەيىن 23–30 تامىز ارالىعىندا اباتتاندىرۋ, ونىڭ ىشىندە جاسىل جەلەكتەردى كۇتۋ جانە سۋارۋ سالاسىنداعى ەكو-مونيتورينگ اپتالىعى وتەدى. ستيحيا­لىق پوليگونداردى ارالاۋ شاراسى 31 تامىز – 7 قىركۇيەك ارالىعىندا ۇيىمداستىرىلماق. 8–15 قىركۇيەك ارالىعىندا جەر قويناۋىن پايدالانۋ نىساندارىنا باقىلاۋ جۇرگىزۋ اپتالىعى ۇيىمداستىرىلماق.

جوبانىڭ ماقساتى – حالىقتى تا­بي­­عاتتى قورعاۋعا جانە وعان ۇقىپ­­­تى قاراۋعا تارتۋ, كۇردەلى ماسە­لە­لەر­دىڭ ءتۇيىنىن تارقاتۋدا ازاماتتىق قو­عام­نىڭ بەلسەندى مۇشەلەرىن تار­تا وتىرىپ شەشۋگە كۇش سالۋ. جوبا تاريحي-مادەني جانە تۋريستىك وبەك­تىلەردى ساقتاۋ ىسىندە قورشاعان ورتاعا ۇقىپتى قاراۋ جانە الەۋمەتتىك جا­ۋاپ­كەرشىلىك مادەنيەتىن قا­لىپ­تاستىرۋدا ماڭىزدى قادام سانال­ماق. ءبىر اي بويى وتەتىن اكتسياعا قو­عام­دىق كەڭەس مۇشەلەرى, «قازاق­ستان­نىڭ ازاماتتىق اليانسى» زتب, «قازاقستاننىڭ ەكولوگيالىق ۇيىم­دارى قاۋىمداستىعى» زتب, «قا­زاق­ستاندىق قوعامدىق كەڭەستەر قاۋىم­داستىعى» رقب, «قازاقستاننىڭ ەكو­لوگيالىق قورى» قق, «الەۋمەتتىك باستامالار قورى» قق وكىلدەرى سىندى 600-دەن اسا ۇەۇ, ەكو-بلوگەرلەر, ەكو-ەرىكتىلەر, ازاماتتىق سەكتور, باق وكىلدەرى قاتىسپاق.

ۇيىمداستىرۋشىلار اكتسيا اياسىندا رەسپۋبليكا بويىنشا بارلىعى 1,5 مىڭنان اسا ادامنىڭ قاتىسۋىمەن 300 مونيتورينگتىك ءىس-شارا وتكىزۋ جوسپارلانعانىن جەتكىزدى.

15 تامىزدا استانا قالاسى­نىڭ ماڭىنداعى «بوزوق» مۇراجاي-قو­رىعىندا, الماتى وبلىسىنىڭ كورىكتى مەكەنى «كولساي كولدەرى» ۇلتتىق پاركىندە, تۇركىستان وبلىسىنىڭ «ازىرەت سۇلتان» مۇراجاي-قورى­عىندا قوعامدىق مونيتورينگ جۇر­گىزۋ شەڭبەرىندە ايلىق اكتسيا باس­تاۋ الدى.

ەلوردا ىرگەسىندە وتكەن اك­تسيا­عا «قازاقستاندىق قوعامدىق كە­ڭەستەر قاۋىمداستىعى» رقب باس­شى­سى ءسالىمباي شۇنەەۆ, استانا قا­لاسى قوعامدىق كەڭەسىنىڭ توراعاسى زۇلپىحار عايىپوۆ, «قا­زاقستاننىڭ ەكولوگيالىق ۇيىم­دا­رى قاۋىمداستىعى» زتب جوبا مە­نەد­جەرى سابينا ءسابيتوۆا, «قازاق­ستان­نىڭ ەكولوگيالىق قورى» قق جو­بالارىنىڭ ۇيلەستىرۋشىسى ­نازەر­كە ورالبەكوۆا قاتىستى.

«مۇنداي تاريحي-مادەني ورىن­داردىڭ باسىندا قۇرىلىس جۇ­مىستارىن جۇرگىزگەندە تابيعاتتى بۇل­دىرمەۋگە, قورشاعان ورتانىڭ فلو­راسى مەن فاۋناسىن ساقتاۋعا بارىنشا كۇش سالۋىمىز كەرەك. «بوزوق» مەملەكەتتىك تاريحي-مادەني مۇراجاي-قورىعىن قالپىنا كەلتى­رىپ, اباتتاندىرۋ جۇمىسى باستالعان ەكەن. تاريحي ورىن, بابالارىمىز­دىڭ تەك كوشپەلى حالىق بولماعا­نىن, وركەنيەتتىڭ تۋىن كوتەرىپ قالا سالعانىن ايگىلەيتىن كيەلى مە­كەننىڭ ءبىرى – وسى جەر. وسىنداي تاريحي ورىنداردى قالپىنا كەلتى­­رىپ, وسكەلەڭ ۇرپاققا ناسيحات­­تاۋى­مىز كەرەك. كەيدە قۇرىلىس ءجۇ­­­رىپ, جوندەۋ جاسالعاندا تابيعاتقا زيان كەلتىرۋ دەرەگى دە تىركەلەدى. وسىن­­­­داي كەلەڭسىزدىكتىڭ الدىن الۋ ماقسا­­­­­تىن­دا قۇرىلعان قوعامدىق ­كوميس­­­­سيا مونيتورينگ جۇرگىزەدى», دەدى ز.عايىپوۆ.

سونىمەن قاتار ول مۇراجاي-قو­رىقتىڭ اۋماعى قورشالىپ, كۇتىمگە الىنعالى اۋىپ كەتكەن جابايى اڭ-قۇس قايتا جەرسىنىپ, تابيعات تۇلەي باستاعانىن دا جەتكىزدى.

«كولساي كولدەرى» مەملەكەتتىك ۇلت­تىق تابيعي پاركىندە قوناەۆ قا­لا­سىنىڭ قوعامدىق كەڭەس توراعاسى سەرگەي گوريانوي اكتسياعا قاتىسسا, تۇر­كىستان وبلىسىنداعى «ازىرەت سۇل­تان» مەملەكەتتىك تاريحي-مادەني مۇ­راجاي-قورىعىندا وبلىستىق قو­عام­­دىق كەڭەس مۇشەلەرى باقىتجان بەيسەمباەۆ, زۋپپارحان چالدانوۆ, ينارا نامازباەۆا باستاعان توپ تا­ريحي-مادەني ەسكەرتكىشتەردىڭ ساق­تا­لۋىنا, تۋريستىك ورىنداردىڭ تازا­لى­عىنا باقىلاۋ جۇرگىزدى.