پاريج وليمپياداسىنىڭ ءدۇبىرى ءالى باسىلا قويعان جوق. ءدۇبىرلى دودادا اتىراۋلىق سپورتشىلار اتىنان دزيۋدوشىلار ءابيبا ابۋجاقىنوۆا مەن ەسميگۇل كۋيۋلوۆا باق سىنادى.
ەكى دزيۋدوشى دا وليمپياداعا دەيىن حالىقارالىق سايىستارعا قاتىسىپ, جۇلدەلى ورالىپ جۇرگەن ەدى. جاتتىقتىرۋشىسى مەيىرجان ەسماعامبەتوۆپەن بىرگە قارسىلاستارىنىڭ وسال تۇسىن زەرتتەدى. الايدا «باق شابا ما, باپ شابا ما؟» دەگەندەي, كىل مىقتىلاردىڭ باسەكەسىندە ەكەۋى دە جۇلدە العان جوق. الەمدىك دودادا ءابيبا ابۋجاقىنوۆا بەسىنشى ورىن يەلەنسە, ەسميگۇل كۋيۋلوۆا العاشقى بەلدەسۋىندە قارسىلاسىنان جەڭىلىپ قالدى. كەيىن ەكەۋى دە كوماندالىق سايىستا قارسىلاسىنا ەسە جىبەردى.
«وليمپياداعا جۇلدە الۋ ءۇشىن بارعان ەدىم. الايدا جەڭىلىپ قالعانىمدى مويىندايمىن. جانكۇيەرلەرىمنىڭ ءۇمىتىن اقتاي الماعانىما وكىنەمىن. بارلىق جانكۇيەرىمنەن كەشىرىم سۇرايمىن. اقتالاتىن ءجونىم جوق. التىن الۋ ءۇشىن بارىمدى سالا كۇرەسكەنىممەن, جۇلدەسىز قالدىم. قولا مەدال ءۇشىن سايىستاعى قارسىلاسىما باسىمدىق تانىتا المادىم», دەپ كوزىنە جاس الدى ءا.ابۋجاقىنوۆا.
اقيىق اقىن تولەگەن ايبەرگەنوۆتىڭ «بايگە بەرەم جىعىلعان پالۋانعا دا, ادالدىعى سەزىلىپ تۇرار بولسا...», دەپ جىرلاعانداي, اسىرەسە ءابيبا ابۋجاقىنوۆاعا توسىنسىي ۇسىنىپ جاتقاندار از ەمەس. ماسەلەن, ءماجىلىس دەپۋتاتى ايداربەك حودجانازاروۆ وعان جاڭا كولىك سىيلادى.
«تۇنىمەن دوڭبەكشىپ ۇيىقتاي المادىم. وعان سەبەپ – ءابيبا قارىنداسىمنىڭ كوز جاسى. بۇل – نامىستىڭ كوز جاسى. بۇل – تەكتىلىكتىڭ بەلگىسى. بۇل – ۇلكەن تاربيەنىڭ ۇلگىسى. قىسقاسى, ابيباعا ءوز اتىمنان ارنايى سىياقى بەرەمىن. پاريجدە قازاقستاننىڭ ابىرويىن قورعايمىن دەپ بارىن سالدى. جاراقات السا دا قايتقان جوق. وسىنداي ەڭبەكتى باعالاۋ, وسىنداي پاتريوتتىقتى ناسيحاتتاۋ كەرەك», دەدى ءماجىلىس دەپۋتاتى.
اتىراۋلىقتار دا دزيۋدوشى ارۋلارعا قۇرمەت كورسەتۋدەن تىس قالمادى. الەمدىك دودادا ەل نامىسىن قورعاعان دزيۋدوشى قىزدارعا كولىك سىيلاپ, قولداۋ كورسەتتى. وبلىس اكىمىنىڭ ءباسپاسوز حاتشىسى رۋسلان جۇماعازيەۆتىڭ ايتۋىنشا, «Zeekr» اۆتوكولىگى دەمەۋشىلەردىڭ قارجىسىنا الىنعان.
«وليمپيادا – الەمنىڭ ەڭ مىقتى سپورتشىلارى سىنعا تۇسەتىن دودا. سول سەبەپتەن, بۇل سايىستا توپ جارۋ وڭاي ەمەس. وسى تۇرعىدان ايتقاندا, اتىراۋلىق دزيۋدوشىلارعا كىنا ارتۋدىڭ ءجونى جوق. كەرىسىنشە, سپورتشىلارىمىزدى جىگەرلەندىرگەن ءجون عوي. دەمەۋشىلەر اتىراۋ وبلىسىنىڭ جۇرتشىلىعى اتىنان ءابيبا ابۋجاقىنوۆا مەن ەسميگۇل كۋيۋلوۆاعا كولىك سىيلاۋدى ءجون كوردى», دەيدى ر.جۇماعازيەۆ.
دزيۋدوشى ءابيبا ابۋجاقىنوۆا قولداۋ كورسەتكەندەرگە ريزاشىلىعىن ءبىلدىردى. ءوزىن وليمپياداعا دايىنداعان باپكەرىن دە ۇمىتقان جوق.
«جىعىلعاندا جانىمنان تابىلعان جاناشىرلارىما العىسىم شەكسىز. باپكەرىم جەڭىستە دە, جەڭىلىستە دە قاسىمنان تابىلىپ, مەنى بار قۇرمەتكە لايىق كوردى. وسىنداي قولداۋدان كەيىن مەنىڭ سىنۋعا, جەڭىلۋگە, نالۋعا جانە كۇرەسپەۋگە قۇقىعىم جوق دەپ ويلايمىن. مەن ءالى-اق جارق ەتەمىن», دەدى ءا.ابۋجاقىنوۆا.
اتىراۋ وبلىسى