مەرگەندەر ءمۇلت كەتپەيدى

ءداستۇرلى ساداق اتۋدان ۇلتتىق قۇ­رامانىڭ باس باپكەرى دياس احمە­توۆتىڭ ايتۋىنشا, دۇنيەجۇزىلىك كوشپەلىلەر ويىندارىندا سىنعا تۇسۋگە 35 مەملەكەتتىڭ مەرگەندەرى ءوتىنىش جولداعان.

«ەلوردادا وتەتىن سايىسقا ءوتىنىش جولداعان ەلدەردىڭ دەلەگاتسياسىن تىركەۋ جۇمىستارى ءجۇرىپ جاتىر. سپورتشىلارىمىزدىڭ دايىندىعى جاقسى, دەيتۇرعانمەن ماجارستان, قىرعىزستان, مالايزيا, تۇركيا, رەسەي سىندى مەملەكەتتەن كەلەتىن ساداقشىلاردىڭ دا شەبەرلىگى جو­عارى. بىراق ءتول سپورتىمىزدان ءوز جەرىمىزدە وتەتىن الاماندا ساڭ­لاقتارىمىز بارىن سالىپ, ەل مە­رەيىن ۇستەم ەتەتىنىنە سەنىمدىمىز», دەدى د.احمەتوۆ.

ۇلتتىق قۇراما مۇشەسى باقبەرگەن ءسالىموۆ وراسان جاۋاپكەرشىلىك جۇكتەلەتىنىن ايتتى.

«دۇنيەجۇزىلىك كوشپەلىلەر ويىن­دارى 2014 جىلدان بەرى تۇراقتى تۇردە وتكىزىلىپ كەلەدى. بيىلعى دودانى ۇيىمداستىرۋ مارتەبەسى بىزگە بۇيىردى. ءوز جەرىمىزدە وتەتىن سا­يىستا بارىمىزدى سالامىز. قالىڭ جانكۇيەردىڭ دە زور سەنىم ارتىپ وتىرعانىن بىلەمىز. سايىس وتەتىن الاڭدا جاتتىعۋ جۇرگىزۋ ءبىز ءۇشىن دە زور مۇمكىندىك بولىپ وتىر. ويتكەنى جەر جاعدايىن تولىقتاي زەردەلەپ, كليماتىن, جەلدىڭ قاي باعىتتا سوعاتىنىن باعامداپ, الدىن الا زەرتتەپ كەلەمىز», دەدى ساداقشى ب.ءسالىموۆ.

ايەلدەر اراسىندا سىنعا تۇسە­­تىن اجار راحمەتقىزى ايتۋلى دو­­دانىڭ باستالۋىنا ساناۋلى كۇن قالعاندىقتان, دايىندىق جۇمىس­ى كۇشەيتىلگەنىن جەتكىزدى.

«بىزدەن قالىڭ كورەرمەن تەك التىن مەدال كۇتەتىنى بەلگىلى. جان­كۇيەرلەردىڭ سەنىم ۇدەسىنەن شىعۋدان ايانىپ قالمايمىز. ءداس­تۇرلى ساداق اتۋ سپورتىنىڭ ەلى­مىز­دە كەڭ قانات جايۋىنا دۇ­نيە­جۇزىلىك كوشپەلىلەر ويىندا­رى سەرپىن بەرەتىنى ءسوزسىز. زامان­داستارىمىزدىڭ اراسىندا ۇلتتىق سپورتقا قىزىعۋشىلار قاتا­رى ارتىپ كەلە جاتقانى قۋانتادى», دەيدى مەرگەن قىز.

ء«داستۇرلى ساداق اتۋ» فەدەراتسيا­سى دا ۇلتتىق سپورت تۇرلەرى قاۋىم­داستىعىنىڭ قۇرامىنا كىرەدى. 89 ەلدەن 2 مىڭنان اسا سپورتشى قاتىساتىن دۇنيەجۇزىلىك كوشپەلىلەر ويىندارىندا ءداستۇرلى ساداق اتۋدان سىن­عا تۇسەتىن مەرگەندەردىڭ ونەرىن كورەر­مەندەر «كوشپەلىلەر عالامى» ەتنواۋلىنىڭ الاڭىندا تاماشالايدى.

ءداستۇرلى ساداق اتۋ سايىسى­نا قاتىسۋشى مەرگەندەردىڭ جەتەك­شىلەرى, ياعني ءار ەلدەن كەلگەن كوماندا باسشىلارى 8 قىركۇيەكتە مان­دات­تىق كوميسسيا تالقىلاۋىنا قاتىسادى. مەرگەندەر دوداسىنا قاتىساتىن سپورتشىنىڭ ساداعى, جەبەسى تالاپقا ساي بولۋى قاتاڭ ەسكەرىلەدى. ءار ەلدەن كەلەتىن كوماندا قۇرامىندا 18 جاستان اسقان 6 ەر, 4 ايەل ساداقشى دوداعا قوسىلادى.

ءداستۇرلى ساداق اتۋشىلار استانا تورىندە وتەتىن كوشپەلىلەر ويىندارىندا بىرنەشە نىساناعا تيگىزۋدەن سايىسقا تۇسەدى. تۇرىكتىڭ «پۋتا» دەپ اتالاتىن نىساناسىنا ەرلەر 70 مەتر قاشىقتىقتان اتاتىن بولسا, ايەلدەر 60 مەتردەن كوزدەيدى. قازاقتىڭ «Qalqan» دەپ اتا­لاتىن نىساناسى­­نىڭ ديامەترى 60 سم بولادى. تۇرىكتىڭ پۋتا نىساناسىنا قاراعاندا قاشىقتىق جاقىنداۋ: ەرلەر 60 مەتر, ايەلدەر 50 مەتردەن ادىرناسىن تارتادى. جامبى نىساناسىندا جەردەن 170 سم بيىككە ىلىنگەن جامبىنى قاعىپ ءتۇسىرۋ ءۇشىن ەرلەر دە, ايەلدەر دە 30 مەتر قاشىقتىقتان شەبەرلىگىن سىنايدى. ءداستۇرلى ساداق اتۋدان كوماندالىق سايىس تا وسى جامبى اتۋ ءستيلى بويىنشا وتەدى.

ءداستۇرلى ساداق اتۋدان تۇركيا ەلىنىڭ مەرگەندەرى وتە تەگەۋرىندى. سەبەبى بۇل ەلدە بىرنەشە جىلدان بەرى حالىقارالىق تۋرنير تۇراقتى وتكىزىلىپ كەلەدى. ساداق اتۋدى كاسى­بي سپورت رەتىندە تانىپ, ەرەكشە كوڭىل بولەدى. ماجارستاننىڭ دا ساداق­شى­لارى قياداعىنى قاعىپ تۇسىرەتىن دەڭگەيدە. قىرعىزدار مەن تاجىكتەر دە ساداق اتۋعا ايرىقشا كوڭىل ءبولىپ, دامۋىنا سەرپىن بەرىپ وتىر.