ءاربىر ءسابي باقىتتى ءومىر سۇرۋگە قۇقىلى. تاعدىردىڭ تاۋقىمەتىن كەشسە دە, جاقسىلىقتان كۇدەر ۇزبەۋى كەرەك. وسى رەتتە جەتىسۋ وڭىرىندە بالالاردى وڭالتۋ ورتالىعى جۇمىس ىستەيدى. بۇل مەكەمەلەردە ءبىر مەزگىلدە 500-دەي بالا ەم الا الادى. ولارعا بىلىكتى ماماندار قىزمەت كورسەتەدى. زاماناۋي قۇرال-جابدىقتارمەن تولىق جاراقتانعان نىساندار تالاي بالاعا كەشەندى قولداۋ كورسەتىپ, دەنساۋلىعىن وڭالتۋعا سەپ بولىپ وتىر.
ەرەكشە كۇتىمدى قاجەت ەتەتىن بالالارعا ساۋىقتىرۋ ورتالىقتارى اۋاداي قاجەت. ماسەلەن, مۇندا پسيحونەۆرولوگيالىق پاتولوگياسى, تىرەك-قيمىل اپپاراتى بۇزىلعان ءبىر جارىم جاستان ون سەگىز جاسقا دەيىنگى مۇگەدەك بالالارعا بيۋدجەت قاراجاتى ەسەبىنەن ارناۋلى الەۋمەتتىك قىزمەت كورسەتەدى. اۆا تەراپياسى, ەمدىك ماسساج, دەنەشىنىقتىرۋ, سۋ راسىمدەرى جانە ءتيىمدى وڭالتۋعا قاجەتتى باسقا دا ادىستەر قولدانىلادى. وسىنداي نىساننىڭ ءبىرى ءۇشارال قالاسىندا ورنالاسقان «جانسايا» كۇندىزگى ورتالىق 50 ورىنعا ارنالعان.
ورتالىق اشىلعانعا دەيىن الاكول اۋدانىندا مۇگەدەكتىگى بار بالالارعا ارنالعان مۇنداي وڭالتۋ نىسانى بولعان جوق. اتا-انالار ءوز قاراجاتىنا بالالارىن الماتى, استانا قالالارىنا وڭالتۋعا اپارىپ جۇرگەن. «جانسايا» ورتالىعى اشىلعاننان كەيىن قازىر ماسەلە جەرگىلىكتى جەردە شەشىمىن تاۋىپ, ورتالىق بالالارعا تەگىن قىزمەت كورسەتىپ جاتىر.
الەۋمەتتىك نىسانعا كەلۋشى اتا-انالاردىڭ ءبىرى, ءۇشارال قالاسىنىڭ تۇرعىنى ايگۇل كاريموۆا قىزى ءامينانىڭ وسى وڭالتۋ ورتالىعىنان ەم شارالارىن الىپ جۇرگەنىنە ەكى جىلعا جۋىقتاعانىن ايتادى.
«بالام ورتالىققا العاش كەلگەن كەزدە جۇرمەيتىن, قازىر جۇرەدى. مۇندا بىلىكتى ماماندار جۇمىس ىستەيدى. ولاردىڭ قىزمەتتەرىنە ريزامىن, العىسىم شەكسىز. بۇل جەردە قىزىم ەمدىك دەنەشىنىقتىرۋ, ەڭبەك, مۋزىكا ساباقتارىنا قاتىسادى, ماسساج الادى, بالامەن لوگوپەد, پسيحولوگ, دەفەكتولوگ ماماندار جۇمىس ىستەيدى. مۇنداي كەشەندى ەم شارالارى بالامنىڭ دەنساۋلىعىنا وڭ اسەرىن تيگىزىپ وتىر», دەيدى ا.كاريموۆا.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنە قاراعاندا, مۇندا «يميترون» سەرۋەندەۋ ترەناجەرى, نەيرو-ورتوپەديالىق وڭالتۋعا ارنالعان كومبينەزون, قادامدىق ترەناجەر, تىرەك راماسى, فيزيوتەراپيالىق قۇرالدار سياقتى وڭالتۋ جابدىقتارىمەن قامتىلعان. 50 ورىنعا ارنالعان «جانسايا» ورتالىعى 2022 جىلدىڭ تامىز ايىندا اشىلعان. ورتالىقتا 57 ادام جۇمىس ىستەيدى.
قازىر ورتالىقتا 35 بالا وڭالتۋدان ءوتىپ جاتىر. ال وبلىستاعى جالپى سانى 6 وڭالتۋ ورتالىعىندا 380 بالا ارنايى الەۋمەتتىك قىزمەت الادى.
ايتا كەتەيىك, جالپى 6 بالالاردى وڭالتۋ ورتالىعىنىڭ بەسەۋى جەتىسۋ وبلىسى قۇرىلعاننان كەيىن اشىلدى.
جەتىسۋ وبلىسى