ۇزدىك وقۋشىلارعا مورالدىق قولداۋ قاجەت
پارلامەنت ءماجىلىسىنىڭ جالپى وتىرىسىندا دەپۋتاتتار رامازان سارپەكوۆ پەن گۇلميرا يسىمباەۆا ءبىلىم جانە عىلىم ءمينيسترى جانسەيىت تۇيمەباەۆقا ساۋال جولدادى, دەپ حابارلادى وسى پالاتانىڭ ءباسپاسوز قىزمەتى.
ساۋالدا بىلاي دەلىنەدى: ء“بىر-ەكى كۇننەن سوڭ مەكتەپ بىتىرۋشىلەرگە اتتەستات تاپسىرۋ ءراسىمى وتەتىنى بەلگىلى. سوڭعى كەزدە ۇلتتىق بىرىڭعاي تەستىلەۋدىڭ ناتيجەسى بويىنشا 1-2 بالل جەتپەي قالعان “التىن بەلگىگە” ۇمىتكەر وقۋشىلار جايىندا وزىڭىزگە بىرنەشە ساۋال جولدادىق, بىراق ءالى جاۋاپ تۇسكەن جوق. ماسەلەنىڭ قالاي جانە قاشان شەشىمىن تاباتىنىن تەك ءبىز عانا ەمەس, بىزگە سەنىم ارتىپ حابارلاسقان جانە قابىلداۋىمىزدا بولعان اتا-انالار دا كۇتىپ وتىر.
كوپشىلىكتى قاتتى ويلاندىرىپ وتىرعان ماسەلە – مەكتەپتە 11 جىل بويى تەك ۇزدىك وقىعان وقۋشىنىڭ بىرىڭعاي تەستىڭ قورىتىندىسى بويىنشا ءبىر ء“تورت” دەگەن باعاعا بولا “التىن بەلگى” تۇرماق, ەرەكشە (قىزىل) اتتەستاتقا يە بولا الماۋى. ال, 10-11 سىنىپتى عانا ۇزدىك وقىعان وقۋشىعا مۇنداي اتتەستات بەرىلەدى. ءبىزدىڭ ويىمىزشا, مۇنداي جاعداي – “التىن بەلگىگە” ۇمىتكەر بولعان وقۋشى ءۇشىن ادىلەتسىزدىك. ولار ماتەريالدىق دۇنيە سۇراپ وتىرعان جوق, تەك ەڭبەكتەرىنە سايكەس جوعارى دارەجەدەگى اتتەستاتقا قول جەتكىزۋدى قالايدى. ماسەلە وسىلاي شەشىلگەن جاعدايدا مۇنىڭ ۇلكەن ءومىر جولىنا قادام باسىپ, الدىنا زور ءۇمىت قويىپ وتىرعان ۇزدىك وقۋشىلارعا مورالدىق قولداۋ بولاتىنى ءسوزسىز.
سوندىقتان 1 سىنىپتان باستاپ تەك قانا ۇزدىك وقۋدى ماقسات ەتىپ, ەرەكشە ءبىلىم دەڭگەيىمەن دايارلانىپ كەلگەن “التىن بەلگىگە” ۇسىنىلعان وقۋشىلارعا قولۇشىن بەرۋگە كىم دە بولسا مىندەتتى دەپ ەسەپتەيمىز.
ۋاقىتتىڭ تىعىزدىعىنا بايلانىستى وسى ماسەلەگە تەزىرەك كوڭىل اۋدارىپ, قابىلداعان شەشىم جايىندا جازباشا تۇردە حابار بەرۋىڭىزدى سۇرايمىز”.