ازاماتتىق قورعاۋ سالاسىنداعى ءبىرىنشى كەزەكتەگى شارالاردىڭ 2023-2027 جىلدارعا ارنالعان كەشەندى جوسپارىنا تۇزەتۋلەر ەنگىزىلدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى, دەپ حابارلايدى Egemen.kz.
ايتا كەتەيىك, بيىل قاڭتار ايىندا سەيسميكالىق قاۋىپسىزدىك ماسەلەلەرى جونىندەگى كەڭەستە مەملەكەت باسشىسى قاسىم-جومارت توقاەۆ توتەنشە جاعدايلاردىڭ الدىن الۋ جانە جويۋ جۇيەسىنىڭ ماتەريالدى-تەحنيكالىق بازاسىن نىعايتۋ شارالارىن قابىلداۋدى تاپسىرعان بولاتىن.
پرەزيدەنت تاپسىرمالارىن ىسكە اسىرۋ شەڭبەرىندە ازاماتتىق قورعاۋ سالاسىنداعى ءبىرىنشى كەزەكتەگى شارالاردىڭ 2023-2027 جىلدارعا ارنالعان كەشەندى جوسپارىنا زاماناۋي اۆياتسيالىق تەحنيكا ساتىپ الۋعا قاتىستى تۇزەتۋلەر ەنگىزىلدى.
ۇكىمەتتىڭ ءباسپاسوز قىزمەتىنىڭ حابارلاۋىنشا, قارجى ليزينگى تەتىگىن پايدالانۋ ارقىلى تجم ماتەريالدى-تەحنيكالىق بازاسىن جابدىقتاۋ ءۇشىن 11 اۋە كەمەسىن ساتىپ الۋ جوسپارلانعان. 24,8 ملرد تەڭگە مولشەرىندەگى قاجەتتى سوما رەسپۋبليكالىق بيۋدجەتتەن 2027 جىلعا دەيىن كەزەڭ-كەزەڭىمەن بولىنەدى دەپ كوزدەلگەن. ماسەلەنى رەسپۋبليكالىق بيۋدجەت كوميسسياسى تۇجىرىمدامالىق تۇردە قولداعان.
«تجم ماتەريالدىق-تەحنيكالىق بازاسىن نىعايتۋ اۆياتسيالىق تەحنيكامەن قامتۋ ايماقتارىن كەڭەيتۋگە مۇمكىندىك بەرەدى. اۋە كەمەلەرى جەتۋ قيىن جەرلەردە ورىن العان توتەنشە جاعدايلار ايماقتارىنان ەۆاكۋاتسيالاۋ جانە قۇتقارۋ بولىمشەلەرىنىڭ جەدەل ارەكەت ەتۋىن قامتاماسىز ەتۋ ءۇشىن, سونداي-اق سۋ تاسقىنى جانە ءورت قاۋپى باسىم كەزەڭدەردە مونيتورينگتىڭ تيىمدىلىگىن ارتتىرۋ ماقساتىندا قولدانىلادى», دەلىنگەن حابارلامادا.